Mirero 14:1-35
14 Mufumakadzi o ṱalifhaho vhukuma u fhaṱa nnḓu yawe,+Fhedzi mufumakadzi wa tsilu u i thutha nga zwanḓa zwawe.
2 Ane a tshimbila nga u luga hawe u ofha Yehova,Fhedzi wa nḓila dza vhufhura* u a Mu nyadza.
3 Ṱhamu ya u ḓikukumusa i mulomoni wa tsilu,Fhedzi milomo ya vhaṱali i tsireledza vhaṋe vhayo.
4 Hu si na kholomo mukungwa u a kuna,Fhedzi maanḓa a mboho a ita uri hu vhe na khaṋo nnzhi.
5 Ṱhanzi i fhulufhedzeaho i nga si zwifhe,Fhedzi ṱhanzi ya mazwifhi i zwifha tshifhinga tshoṱhe.+
6 Mugoḓi u ṱoḓa vhuṱali a si vhu wane,Fhedzi wa ṱhalukanyo u wana nḓivho nga hu leluwaho.+
7 Ṱutshela kule na tsilu,Ngauri a u nga wani nḓivho mulomoni waḽo.+
8 Vhuṱali vhu ita uri wa maano a pfesese nḓila ine a khou tshimbila khayo,Fhedzi matsilu a fhurwa* nga vhutsilu hao.+
9 Vha matsilu ndi vhane vha ri vhe na mulandu vha zwi ita miswaswo,+Fhedzi vho lugaho vha a ḓiimisela u pfumedzana.
10 Mbilu i ḓivha vhuṱungu hayo,A i kovhekani dakalo ḽayo na muṅwe.
11 Nnḓu ya muvhi i ḓo thuthwa,+Fhedzi dennde ḽa o lugaho ḽi ḓo khwaṱha.
12 Hu na nḓila ine muthu a vhona yo luga,+Fhedzi i tshi isa lufuni.+
13 Mbilu i nga pfa vhuṱungu naho hu tshi khou seiwa,Dakalo ḽi nga ḓisa vhuṱungu.
14 Wa zwiito zwi sa ḓivhalei mbiluni u ḓo kaṋa mvelelo dza nḓila dzawe,+Fhedzi wavhuḓi u kaṋa malamba a zwivhuya zwawe.+
15 Tsilu* ḽi tenda zwoṱhe zwine zwa ambiwa,Fhedzi wa vhuṱali u elekanya nga ha zwine a ḓo zwi ita.+
16 O ṱalifhaho u na vhusedzi, u a ṱutshela kule na vhuvhi,Fhedzi tsilu a ḽi na ndavha, ḽi ḓifhulufhela nga ho kalulaho.
17 Ane a ṱavhanya u sinyuwa u ita zwa vhutsilu,+Fhedzi ane a humbulisisa* u a vhengiwa.
18 Ifa ḽa vha si na tshenzhelo ndi vhutsilu,Fhedzi vho ṱalifhaho vha lambedzwa nga nḓivho.+
19 Vhaitazwivhi vha ḓo gwadama phanḓa ha vhavhuya,Vhavhi vha ḓo gwadama khoroni dza vho lugaho.
20 Mushai u vhengwa na nga vhahura vhawe,+Fhedzi mupfumi u na khonani nnzhi.+
21 Ane a nyadza muhura wawe u ita tshivhi,Fhedzi ane a pfela mushai vhuṱungu u ḓo takala.+
22 Naa vhane vha vhamba maano mavhi a vha nga ḓo pambuwa?
Fhedzi vhane vha ita zwivhuya vha ḓo wana lufuno lu sa shanduki na ngoho.+
23 U shuma nga maanḓa kha mishumo yoṱhe zwi a vhuyedza,Fhedzi u sokou amba zwi ita uri u shaye.+
24 Khare ya vhaṱali ndi lupfumo lwavho;Fhedzi vhutsilu ha matsilu ndi vhutsilu.+
25 Ṱhanzi ya ngoho i tshidza vhathu,Fhedzi mufhuri u zwifha tshifhinga tshoṱhe.
26 Hu na fhulufhelo ḽo khwaṱhaho kha u ofha Yehova,+Ḽi ḓo vha vhushavhelo kha vhana vhawe.+
27 U ofha Yehova ndi tshone tshisima tsha vhutshilo,Hu humisa muthu zwikwekweni zwa lufu.
28 Vhugala ha khosi ndi u ḓala ha vhathu,+Fhedzi muvhusi a si na vhalanda u ḓo tshinyala.
29 Ane a lenga u sinyuwa u na ṱhalukanyo khulu,+Fhedzi ane a vha na mbilu ṱhukhu u ṱana vhutsilu hawe.+
30 Mbilu yo dzikaho i ṋea muvhili vhutshilo,*Fhedzi vivho ḽi ita uri marambo a sine.+
31 Ane a fhura a ḓiṱukufhadzaho u sema Musiki wawe,+Fhedzi ane a pfela mushai vhuṱungu u a Mu hulisa.+
32 Muvhi u wiswa nga vhuvhi hawe,Fhedzi muvhuya u ḓo wana vhushavhelo nga u fhulufhedzea hawe.+
33 Vhuṱali vhu mbiluni ya a re na ṱhalukanyo,+Fhedzi tsilu ḽi a ḓiṱana.
34 Zwivhuya zwi hulisa lushaka,+Fhedzi tshivhi tshi nyadzisa vhathu.
35 Khosi i takadzwa nga mulanda ane a ita zwithu nga vhuṱali,+Fhedzi i sinyuswa nga ane a ita zwithu zwi shonisaho.+
Ṱhaluso dzi re magumoni a siaṱari
^ Kana “dzo kombamaho.”
^ Kana khamusi, “matsilu a fhura vhaṅwe.”
^ Kana “A si na tshenzhelo.”
^ Kana “munna a re na vhukoni ha u humbula.”
^ Kana “mutakalo.”
