Nzumbululo I Yaho Kha Yohane 14:1-20
14 Nda vhona Ngwana+ yo ima Thavhani ya Tsioni,+ i na vha 144 000+ vho ṅwaliwaho dzina ḽayo na ḽa Khotsi+ ayo kha phanḓa dzavho.
2 Nda pfa ipfi ḽi tshi bva ṱaḓulu ḽi tshi nga muungo wa maḓi manzhi, ḽi tshi nga mubvumo muhulu; ḽeneḽo ipfi ḽo vha ḽi tshi nga ḽa vhathu vhane vha khou imba vha tshi lidza na haripa.
3 Vhenevho vha nga vha khou imba luimbo luswa+ vhe phanḓa ha khuluṋoni na phanḓa ha zwivhumbiwa zwiṋa zwi tshilaho+ na vhahulwane,+ a hu na we a kona u guda lwonolwo luimbo nga nnḓa ha vha 144 000,+ vho rengwaho kha ḽifhasi.
4 A vho ngo ḓifara luvhi nga zwa vhudzekani na vhafumakadzi. A vho ngo ita zwa vhudzekani.+ Vha dzula vha tshi tevhela Ngwana hoṱhe hune ya ya.+ Vho rengwa+ kha vhathu uri vha vhe vha u thoma+ u ṋekedzwa kha Mudzimu na Ngwana,
5 a ho ngo waniwa vhufhura milomoni yavho; a vha solei.+
6 Nda vhona muṅwe muruṅwa a tshi khou fhufha makoleni,* a tshi khou ḓivhadza mafhungo maḓifha a lini na lini kha vha dzulaho kha ḽifhasi, kha tshaka dzoṱhe, ndimi* dzoṱhe na vhathu vhoṱhe.+
7 A tshi khou vhidzelela a tshi ri: “Ofhani Mudzimu ni mu ṋee vhugala ngauri tshifhinga tsha khaṱhulo yawe tsho swika,+ rabelani We a sika ḽiṱaḓulu, ḽifhasi, lwanzhe+ na zwisima zwa maḓi.”
8 Ha tevhela muruṅwa wa vhuvhili, a ri: “O wa! O wa+ Babele Ḽihulu,+ we a ita uri tshaka dzoṱhe dzi nwe waini yawe ine ya ita uri vhathu vha tame u ḓifara luvhi nga zwa vhudzekani!”*+
9 Ha tevhela muruṅwa wa vhuraru a tshi khou vhidzelela a tshi ri: “Ane a rabela tshivhanda na tshifanyiso tshatsho,+ a swaiwa kha phanḓa kana kha tshanḓa,+
10 na ene u ḓo nwa waini ya Mudzimu, ine ya vha mbiti dzawe.+ Yeneyo ndi waini i songo ṱanganyiswaho na tshithu, ine Mudzimu a ḓo i shela kha tshinwelo tsha mbiti dzawe. Onoyo u ḓo tambudzwa nga mulilo na tsevhela+ e phanḓa ha vharuṅwa vhakhethwa na phanḓa ha Ngwana.
11 Vhutsi ha mulilo une wa vha tambudza vhu ḓo duba lini na lini,+ a vha nga aweli vhusiku na masiari, vhenevho vhane vha rabela tshivhanda na tshifanyiso tshatsho, na vhoṱhe vha re na luswayo lwa dzina ḽatsho.+
12 Ndi ngazwo vhakhethwa+ vhane vha tevhedza milayo ya Mudzimu na u vha na lutendo+ lu fanaho na lwa Yesu vha tshi tea u konḓelela.”
13 Nda pfa ipfi ḽi bvaho ṱaḓulu ḽi tshi ri, “Ṅwala uri: Vha a takala vhane u bva zwino vha fa vhe na vhuthihi na Murena.+ Muya mukhethwa wa ri, kha vha awele kha mishumo yavho ngauri zwe vha zwi ita a zwi nga hangwiwi.”*
14 Nda vhona gole ḽitshena, o dzulaho khaḽo a tshi nga murwa muthu,+ e na khare ya musuku ṱhohoni yawe, o fara segere ya vhuhali.
15 Ha bva muṅwe muruṅwa nḓuni khethwa ya thembele, a tshi khou vhidzelela o dzulaho kha gole, a tshi ri: “Dzhia segere yau u kaṋe, ngauri tshifhinga tsha u kaṋa tsho swika, zwo zwaliwaho zwo vhibva.”+
16 O dzulaho kha gole a kaṋa kha ḽifhasi a tshi shumisa segere yawe, ḽifhasi ḽa kaṋiwa.
17 Ha dovha ha bva muṅwe muruṅwa nḓuni khethwa ya thembele i re ṱaḓulu; na ene o vha e na segere ya vhuhali.
18 Ha bva muṅwe muruṅwa aḽeṱareni, ane a langa mulilo. A vhidzelela o faraho segere ya vhuhali, a ri: “Dzhia segere yau ya vhuhali u kuvhanganye nḓirivhe dza ḽifhasi ngauri dzo vhibva.”+
19 Muruṅwa a kuvhanganya nḓirivhe dza ḽifhasi a tshi shumisa segere yawe, a dzi posa hune ha sukelwa hone nḓirivhe, hune ha imela mbiti dza Mudzimu.+
20 Nḓirivhe dza sukiwa nnḓa ha muḓi, ha bva malofha a guma nga milomo ya bere, a elela stadia dza 1 600.*
Ṱhaluso dzi re magumoni a siaṱari
^ Kana “tshikhalani.”
^ Kana “nyambo.”
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Thevhedz., “zwe vha zwi ita zwi ḓo vha tevhela.”
^ Khilomithara dzi ṱoḓaho u vha 296. Tshiṱediamu tshi lingana na mithara dza 185. Sedzani Ṱhume. B14.
