Kha Vhaefesa 1:1-23
1 Nṋe Paulo, muapostola wa Kristo Yesu nge Mudzimu a zwi funa, ndi ṅwalela vhakhethwa vha re Efesa+ vha fhulufhedzeaho vha re na vhuthihi na Kristo Yesu ndi ri:
2 Ngavhe Mudzimu Khotsi ashu na Murena washu Yesu Kristo, vha tshi ni sumbedza vhuthu vhuhulu na u ita uri ni vhe na mulalo.
3 Nga hu rendwe Mudzimu a re Khotsi a Murena washu Yesu Kristo, ngauri o ri fhaṱutshedza nga phaṱhutshedzo dzoṱhe dzi bvaho khae dzi re ṱaḓulu, samusi ri vhafunziwa vha Kristo,+
4 ngauri o ri nanga uri ri vhe vhathihi nae* shango ḽi sa athu u sikwa, uri ri sumbedze lufuno na u vha vhakhethwa ri sa solei+ phanḓa hawe.
5 Ngauri o dzula o ri nanga+ uri a ri dzhie sa vharwa vhawe+ a tshi shumisa Yesu Kristo u ya nga zwine a zwi takalela na u zwi funa,+
6 uri a rendwe nge a shumisa Murwa wawe ane a mu funa+ uri a ri sumbedze vhuthu hawe vhuhulu.+
7 O ri rengulula na u ri vhofholola a tshi shumisa Murwa wawe. Ro hangwelwa zwivhi+ nga malofha awe.+ Ngangoho vhuthu ha Mudzimu ndi vhuhulu.
8 O ri sumbedza vhuthu vhuhulu nga u ita uri ri vhe na vhuṱali hoṱhe na ṱhalukanyo yoṱhe,
9 a ri ḓivhadza tshiphiri tshikhethwa+ tsha zwine a zwi funa. Tshenetsho tshiphiri tshi tshimbidzana na zwe a vha a tshi takalela u zwi ita u tendelana na zwe a ḓiimisela u zwi ita,
10 uri a dzudzanye zwithu u ya nga zwifhinga zwo vhewaho, uri a kuvhanganye zwithu zwoṱhe zwi re ṱaḓulu na zwa kha ḽifhasi+ a tshi shumisa Kristo. Zwithu zwoṱhe zwi ḓo kuvhanganywa hu tshi shumiswa Kristo,
11 ane ra vha na vhuthihi nae na ane ra vha maḽaifa nae,+ ngauri Mudzimu o dzula o ri nanga nge a zwi funa, ngauri u ita zwithu zwoṱhe u ya nga he a dzudzanya ngaho nga nḓila ine a zwi funa.
12 Riṋe ri vha u thoma u tenda Kristo, Mudzimu o dzula o ri nanga uri ri mu rende na u mu ṋea vhugala.
13 Fhedzi na inwi no tenda Kristo nge na pfa mafhungo ngoho, ane a vha mafhungo maḓifha nga ha u tshidzwa haṋu nga Mudzimu. Musi no no tenda, no swaiwa+ nga muya mukhethwa we Mudzimu a u fhulufhedzisa,
14 une wa khwaṱhisedza uri ri ḓo wana ifa ḽashu.+ Mudzimu o ita zwenezwi u itela u vhofholola vhathu vhawe+ nga tshirengululi,+ uri a rendwe.
15 Ndi ngazwo u bva tshee nda pfa nga ha lutendo lune na vha nalwo kha Murena Yesu na nḓila ine na funa ngayo vhakhethwa vhoṱhe,
16 ndi tshi dzula ndi tshi livhuwa Mudzimu nga nṱhani haṋu. Ndi dzula ndi tshi ni rabelela,
17 uri Mudzimu wa Murena washu Yesu Kristo, Khotsi wa vhugala, a ni ṋee vhuṱali na u ni dzumbululela nḓivho yo teaho nga hae.+
18 Mudzimu o vula mbilu dzaṋu uri ni vhone na u ḓivha fhulufhelo ḽine a ni ṋea ḽone na phaṱhutshedzo khulu dze a dzi fhulufhedzisa vhakhethwa,+
19 uri ni ḓivhe nga ha maanḓa mahulu e a a sumbedza riṋe vhane ra mu tenda.+ Eneo maanḓa o vhonala kha mishumo ye a i ita,
20 o a shumisa musi a tshi vusa Kristo vhafuni, a mu dzudza kha tshanḓa tshawe tsha u ḽa+ ngei ṱaḓulu,
21 o mu hulisa u fhira vhane vha langa, vha re na maanḓa, vharangaphanḓa, madzina oṱhe+ na mivhuso yoṱhe, kha ḽino shango* na ḽi ḓaho.
22 O vhea na zwithu zwoṱhe nga fhasi ha milenzhe yawe,+ a ita uri a vhe ṱhoho ya* zwithu zwoṱhe tshivhidzoni,+
23 tshine tsha vha muvhili wawe,+ tshi ḓadzwaho ngae, ene ane a khunyeledza zwithu zwoṱhe.
Ṱhaluso dzi re magumoni a siaṱari
^ Ndi Kristo.
^ Sedzani Mutevhe Wa Ṱhalutshedzo Ya Maipfi.
^ Kana “a range phanḓa.”
