TSHIṰOHO TSHI RE KHA GWATI | MAZWIFHI ANE A ITA URI ZWI RI KONḒELE U FUNA MUDZIMU

Zwi Itaho Uri Vhaṅwe Vha Si Fune Mudzimu

TAMBANI

“‘U tea u funa Yehova Mudzimu wau nga mbilu yau yoṱhe na nga zwoṱhe zwine wa vha zwone na nga ṱhalukanyo yau yoṱhe.’ Ndi wone mulayo muhulwane na wa u thoma.”—Yesu Kristo, 33 C.E. *

Vhaṅwe vhathu zwi a vha konḓela u funa Mudzimu. Vha vhona u nga Mudzimu ha pfesesei, u kule navho kana u na tshiṱuhu. Ipfani zwe vhaṅwe vha zwi amba:

“Ndo rabela kha Mudzimu uri a nthuse, fhedzi ndo vha ndi tshi khou pfa u nga u kule na nṋe lune nda nga si kone u mu swikelela. Ndo vha ndi sa humbuli u nga Mudzimu ndi muthu ane a vha na maḓipfele.”—Marco, Italy.
“Naho ndo vha ndi tshi ṱoḓa u shumela Mudzimu, ndo zwi dzhia uri u kule na nṋe. Ndo vha ndi tshi humbula u nga u na tshiṱuhu nahone zwine a zwi ita ndi u ri pfisa vhuṱungu fhedzi. Ndo vha ndi sa tendi uri u a pfela vhuṱungu.”—Rosa, Guatemala.
“Musi ndi tshee muṱuku, ndo vha ndi tshi tenda uri Mudzimu o lindela u vhona vhukhakhi hashu uri a kone u ri pfisa vhuṱungu musi zwi tshi ṱoḓea. Fhedzi nga murahu, ndo zwi dzhia uri ha dzheneleli kha mafhungo ashu. Mudzimu o vha a tshi tou nga minisita ane a ṱhogomela mafhungo a vhane a vha ranga phanḓa, fhedzi a si na ndavha navho.”—Raymonde, Canada.

Inwi ni zwi vhona hani? Naa zwi a konadzea u funa Mudzimu? Ndi kale Vhakriste vha tshi khou ḓivhudzisa yeneyo mbudziso. Zwavhuḓivhuḓi, tshifhingani tsha kale, vhunzhi ha Vhakriste vha mazwifhi vho vha vha sa rabeli Mudzimu Ramaanḓaoṱhe. Ndi ngani? Ndi ngauri vhathu vho vha vha tshi mu ofha nga maanḓa. Muḓivhazwakale ane a pfi Will Durant o zwi vhea nga heyi nḓila: “Muitazwivhi a nga rabela hani kha Mudzimu a tshuwisaho na ane a vha kule na vhathu?”

Zwo ḓa hani uri Mudzimu a dzhiiwe sa ane a ‘tshuwisa na ane a vha kule na vhathu’? Bivhili i ri mini nga ha Mudzimu? Naa u guda ngoho nga ha Mudzimu zwi nga ni thusa uri ni mu fune?

^ phar. 3 Mateo 22:37, 38.