1. Ndi ngafhi hune ra nga guda hone nga ha vhumatshelo?

NAA no no vhuya na sedza mafhungo kha thelevishini nahone na ḓivhudzisa uri, ‘Naa iḽi shango ḽi ḓo fhelela ngafhi?’ Zwiitea zwi khaulaho mbilu zwi itea nga u ṱavhanya nahone zwi songo lavhelelwa lune a huna ane a ḓivha zwine zwa ḓo itea tshifhingani tshi ḓaho. (Yak. 4:14) Naho zwo ralo, Yehova u a ḓivha zwine zwa ḓo itea tshifhingani tshi ḓaho. (Yesaya 46:10) Ipfi ḽawe ḽo amba hu tshee nga phanḓa nga zwithu zwivhi zwine zwa khou itea misini yashu na nga zwithu zwi mangadzaho zwine zwa ḓo itea hu si kale.

2, 3. Ndi mbudziso ifhio ye vhafunziwa vha Yesu vha mu vhudzisa yone, nahone o vha fhindula hani?

² Yesu Kristo o amba nga ha Muvhuso wa Mudzimu, une wa ḓo fhelisa vhuvhi nahone wa ita uri ḽifhasi ḽi vhe paradiso. (Luka 4:43) Vhathu vho vha vha tshi ṱoḓa u ḓivha uri wonoyo Muvhuso u ḓo ḓa lini. Zwi re zwone ndi uri vhafunziwa vha Yesu vho mu vhudzisa vha ri: “Ri vhudze zwiné ra ḓo ḓivha ngazwo’ zwauri u vhuya hau na vhufhelo ha ḽifhasi zwi tsini.” (Mateo 24:3) Yesu a tshi vha fhindula a amba uri ndi Yehova Mudzimu fhedzi ane a ḓivha kokotolo tshifhinga tshine ano maitele a zwithu a ḓo fhela ngatsho. (Mateo 24:36) Fhedzi  Yesu o vha vhudza zwithu zwine zwa ḓo itea kha ḽifhasi wonoyo Muvhuso u sa athu ḓisela vhathu mulalo wa ngoho na u tsireledzea. Zwe a zwi amba hu tshee nga phanḓa zwi khou itea zwino!

³ Ri sa athu ṱolisisa vhuṱanzi ha uri ri khou tshila “vhufhelo[ni] ha ḽifhasi,” kha ri vusuluse nga u tou pfufhifhadza nndwa ye vhathu vha vha vha nga si kone u i vhona. Yo lwelwa ṱaḓulu nahone mvelelo dzayo dzi a ri kwama.

4, 5. (a) Ho itea mini ṱaḓulu musi Yesu a tshi kha ḓi tou bva u vhewa khuluṋonini uri a vhe Khosi? (b) U ya nga Ndzumbululo 12:12, nndwa ye ya vuwa ṱaḓulu yo bveledza mini?

⁴ Ndima yo fhiraho ya yeneyi bugu yo ṱalutshedza uri Yesu Kristo o vha Khosi ngei ṱaḓulu nga ṅwaha wa 1914. (Daniele 7:13, 14) Yesu o dzhia vhukando musi a tshi kha ḓi tou bva u ṋewa maanḓa a Muvhuso. Bivhili i ri: “Ha vuwa nndwa ngei ṱaḓulu: Mikaele [ḽiṅwe dzina ḽa Yesu] na vharuṅwa vhawe vha tshi lwa na ḽiḽa ḽigweṋa [Sathane Diabolo]. Ḽiḽa ḽigweṋa ḽi tshi farisana na vharuṅwa vhaḽo u lwa.” * Sathane na vharuṅwa vhawe vhavhi, madimoni, vho kundwa nndwani yeneyo nahone vha pandelwa ṱaḓulu vha poswa kha ḽifhasi. Vhana vha muya vha fulufhedzeaho vha Mudzimu vho takala musi Sathane na madimoni awe vha tshi pandelwa. Naho zwo ralo, vhathu vha ṋama vho vha vha sa ḓo takala. Nṱhani hazwo, Bivhili yo dzula yo amba uri: “Yawee! ḽifhasi . . . ngauri Diabolo o tsela henengeo ha vho inwi e na mbiti khulu, a tshi zwi ḓivha zwauri o salelwa nga tshifhinga tshiṱuku.”—Ndzumbululo 12:7, 9, 12.

⁵ Ṱhogomelani zwe zwa vha zwi tshi ḓo itea musi yeneyo nndwa i tshi fhela ngei ṱaḓulu. Sathane o vha a tshi ḓo ḓisela vho dzulaho kha ḽifhasi khombo, kana khakhathi nga ṅwambo wa uri o sinyuwa. Samusi ni tshi ḓo zwi vhona, zwino ri khou tshila kha tshenetsho tshifhinga tsha khombo.  Fhedzi yeneyo khombo i ḓo vha pfufhi vhukuma—i ḓo vha ya “tshifhinga tshiṱuku” fhedzi. Na Sathane u a zwi ḓivha zwenezwo. Bivhili i amba uri tshenetshi tshifhinga ndi ‘maḓuvha a vhufhelo.’ (2 Timotheo 3:1) Ri takala lungafhani uri hu si kale Mudzimu u ḓo fhelisa ṱhuṱhuwedzo ya Diabolo kha ḽifhasi! Kha ri ṱhogomele zwiṅwe zwa zwithu zwe zwa dzula zwo ambiwa Bivhilini zwine zwa khou itea zwa zwino. Zwenezwi zwithu zwi sumbedza uri ri khou tshila maḓuvhani a vhufhelo na uri hu si kale Muvhuso wa Mudzimu u ḓo ḓisa phaṱhutshedzo dzi sa fheli kha vhoṱhe vhane vha funa Yehova. Kha ri thome nga u ṱolisisa mbonalo nṋa dza tshiga dze Yesu a amba uri dzi ḓo vhonala tshifhingani tshine ra khou tshila khatsho.

6, 7. Maipfi a Yesu nga ha dzinndwa na nḓala a khou ḓadzea hani ṋamusi?

⁶ “Lushaka lu ḓo vutshela lushaka; muvhuso u ḓo vutshela muvhuso.” (Mateo 24:7) Ho vhulahwa vhathu vhanzhi-vhanzhi nndwani dze dza itea ḓanani ḽa miṅwaha ḽo fhiraho. Muṅwe muḓivhazwakale wa Britain o ṅwala a ri: “Ḓanani ḽa vhu-20 ḽa miṅwaha ho shululwa malofha manzhi u fhira o shululwaho kha maṅwe maḓana kha ḓivhazwakale yoṱhe . . . Nndwa yo vha i tshi tou vha nzulele kha ḽeneḽi ḓana ḽa miṅwaha, zwo vha zwi si gathi zwifhinga zwine ha vha  hu si na dzinndwa.” Muvhigo une wa bva kha Worldwatch Institute uri: “Vhathu vho andaho kararu vho fa nndwani nga ḓana [ḽa vhu-20] u fhira nndwani dzoṱhe dza ḓana ḽa u thoma ḽa miṅwaha AD u swika nga 1899.” Nndwa dzo vhulaha vhathu vha fhiraho milioni dza 100 u bva nga 1914. Naho arali ri tshi ḓivha vhuṱungu vhune ra vhu pfa musi ane ra mu funa a tshi fa nndwani, ri nga si kone u pfesesa vhuṱungu vhune ha pfiwa nga vhathu vha dzimilioni vhe vhafunwa vhavho vha vhulahwa nndwani.

⁷ “Hu ḓo ḓa nḓala.” (Mateo 24:7) Vhaṱoḓisisi vha amba uri mveledzo ya zwiḽiwa yo engedzea vhukuma miṅwaha ya 30 yo fhiraho. Naho zwo ralo, nḓala i bvela phanḓa nga ṅwambo wa uri vhathu vhanzhi a vha na tshelede yo eḓanaho ya u renga zwiḽiwa kana a vha na masimu ane vha nga lima khao zwiliṅwa. Vhathu vha dzimilioni vha dzula vho farwa nga nḓala. Dzangano ḽa Shango ḽa Mutakalo ḽi anganyela uri ṅwaha muṅwe na muṅwe hu fa vhana vha fhiraho milioni ṱhanu nga ṅwambo wa u shaya zwiḽiwa zwi re na pfushi.

8, 9. Ndi mini zwine zwa sumbedza uri vhuporofita ha Yesu nga ha midzinginyo na malwadze ho ḓadzea?

⁸ “Hu ḓo vha na midzinginyo mihulu.” (Luka 21:11) U ya nga Tsenguluso ya Ḓivhamavu ya United States, u bva nga 1990 ho vha na mbalotshikati ya midzinginyo ya 17 ye ya vha i na maanḓa lwe ya tshinyadza zwifhaṱo nahone ya  fhandula mavu. Nga u tou angaredza, ṅwaha muṅwe na muṅwe ho vha na midzinginyo ya maanḓa ye ya piḓimula zwifhaṱo. Iṅwe bugu i ri: “Midzinginyo yo vhulaha vhathu vha maḓana a zwigidi miṅwahani ya 100 yo fhiraho nahone mvelaphanḓa siani ḽa thekinolodzhi yo tou fhungudza zwiṱuku tshivhalo tsha dzimpfu.”

⁹ “Hu ḓo vha na . . . malwadze.” (Luka 21:11) Naho ho itwa mvelaphanḓa siani ḽa zwa ngalafho, malwadze a kale na maswa a bvela phanḓa u vhulaha vhathu. Muṅwe muvhigo u amba uri malwadze a ḓivheaho a 20—u katela vhulwadze ha lufhiha, ha dali, na ha kholera—o no anza mahumini a zwenezwino a miṅwaha, nahone maṅwe ao ha tsha alafhea nga mishonga yo ḓoweleaho. Zwi re zwone ndi uri ho no bvelela malwadze maswa a 30. Maṅwe a hone ha na dzilafho nahone a a vhulaha.

10. Ndi zwithu zwifhio zwo ambiwaho kha 2 Timotheo 3:1-5 zwine na zwi vhona kha vhathu ṋamusi?

¹⁰ Bivhili yo ṱalusa zwiṅwe zwiitea zwihulwane zwine zwa ḓo itea shangoni nahone ya amba hu tshee nga phanḓa nga tshanduko khulwane kha matshilele a vhathu maḓuvhani a vhufhelo. Muapostola Paulo o ṱalusa zwine vhathu nga u tou angaredza vha ḓo vha vhe zwone. Kha 2 Timotheo 3:1-5 ri  a vhala: “Maḓuvhani a vhufhelo hu ḓo vha na zwifhinga zwi lemelaho.” Paulo o amba uri vhathu vha ḓo vha

• vha funaho hu tshi naka zwavho fhedzi

• vhatami vha mali

• vhanyadzi vha vhabebi

• vha sa ili tshithu

• vhadzia u shaya lufuno

• vha sa ḓivhofhi

• vha u sokou penga naḽo

• vhane u tama u ḓiphina ha fhira u tama Mudzimu

• vhane vha tou vha na tshifanyiso tsha u nga vha ofha Mudzimu, ngeno maanḓa aho vho a landula

11. Psalme ya 92:7 i ṱalusa hani zwine zwa ḓo itea kha vhavhi?

¹¹ Naa vhathu vha hune na dzula hone vho tou ralo? A zwi timatimisi uri vho tou ralo. Vhathu vha re na nḓowelo mmbi vha wanala huṅwe na huṅwe. Hezwi zwi sumbedza uri hu si kale Mudzimu u ḓo dzhia vhukando, ngauri Bivhili i ri: “Vhavhi vha tshi mela sa hatsi, vhatshinyi vha tshi ṱharamuwa sa maluvha, tshavho hu ḓo vha u lovha tshoṱhe.”—Psalme ya 92:7.

12, 13. “Nḓivho” yo anda hani kha tshino “tshifhinga tsha vhufhelo”?

¹² Vhukuma, maḓuvha a vhufhelo o  ḓala khombo, samusi Bivhili yo dzula yo amba. Naho zwo ralo, kha ḽino shango ḽi re na khakhathi, hu na zwithu zwi takadzaho zwine zwa khou itea vhukati ha vhagwadameli vha Yehova.

¹³ Bugu ya Bivhili ya Daniele yo dzula yo amba uri ‘nḓivho i ḓo anda.’ Zwenezwo zwi ḓo itea lini? Nga “tshifhinga tsha vhufhelo.” (Daniele 12:4) Zwihuluhulu u bva nga 1914, Yehova o thusa vhane vha tama nga mbilu yoṱhe u mu shumela uri vha pfesese Bivhili. Vho pfesesa vhukuma mafhungo-ngoho a ndeme nga ha dzina ḽa Mudzimu na ndivho yawe, tshiṱhavhelo tshi rengululaho tsha Yesu Kristo, vhuimo ha vhafu, na mvuwo. Zwiṅwe hafhu, vhagwadameli vha Yehova vho guda u tshila nga nḓila ine ya vha vhuyedza na ine ya ḓisa thendo kha Mudzimu. Vho dovha vha pfesesa nga vhuḓalo zwine zwa ḓo itwa nga Muvhuso wa Mudzimu na nḓila ine wa ḓo dzudzanya ngayo mafhungo kha ḽifhasi. Vha ita mini nga yeneyi nḓivho? Yeneyo mbudziso i ri isa kha vhuṅwe vhuporofita vhune ha khou ḓadzea kha ano maḓuvha a vhufhelo.

14. U huwelelwa ha mafhungo maḓifha a Muvhuso ho phaḓalala lungafhani ṋamusi, nahone a khou huwelelwa nga vhafhio?

¹⁴ Kha vhuporofita hawe ha “vhufhelo ha ḽifhasi,” Yesu Kristo o amba uri “mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe.” (Mateo 24:3, 14) Kha ḽifhasi ḽoṱhe, mafhungo maḓifha a Muvhuso—zwine Muvhuso wa vha zwone, zwine wa ḓo zwi ita, na nḓila ine ra nga wana ngayo phaṱutshedzo dzawo—a khou huwelelwa mashangoni a fhiraho 230, nga nyambo dzi fhiraho 400. Ṱhanzi dza Yehova vha dzimilioni vha khou huwelela nga u fhisea mafhungo maḓifha a Muvhuso. Vha bva kha “tshakha na khoro, na mbeu na ndimi dzoṱhe.” (Ndzumbululo 7:9) Ṱhanzi dzi fara pfunzo dza Bivhili dza mahala dza hayani na vhathu vha dzimilioni vhane vha ṱoḓa u ḓivha zwine vhukuma Bivhili ya zwi funza. Vhukuma zwenezwi ndi u ḓadzea hu swayeaho lungafhani ha vhuporofita, zwihuluhulu u bva tshee Yesu a amba hu tshee nga phanḓa uri Vhakriste vha ngoho vha ḓo “vhéngwa nga vhoṱhe”!—Luka 21:17.

15. (a) Naa ni a tenda uri ri khou tshila maḓuvhani a vhufhelo, nahone ndi ngani ni tshi zwi tenda? (b) “Vhufhelo” vhu ḓo amba mini kha vhane vha hanedza Yehova na vhane vha ḓivhea nga fhasi ha vhuvhusi ha Muvhuso wa Mudzimu?

¹⁵ Samusi ṋamusi hu tshi khou ḓadzea vhuporofita vhunzhi ha Bivhili, naa a ni tendi uri ri khou tshila maḓuvhani a vhufhelo? Musi mafhungo maḓifha o no huwelelwa nga nḓila ine ya ḓo fusha Yehova, ndi hone “vhufhelo” vhu tshi ḓo ḓa ngangoho. (Mateo 24:14) “Vhufhelo” zwi amba tshifhinga tshine Mudzimu a ḓo fhelisa ngatsho vhuvhi kha ḽifhasi. Yehova u ḓo shumisa Yesu na vharuṅwa vha maanḓa u itela u fhelisa vhoṱhe vhane vha Mu hanedza nga khole. (2 Vha-Thesalonika 1:6-9) Sathane na madimoni awe a vha tsha ḓo xedza dzitshaka. Nga murahu ha zwenezwo, Muvhuso wa Mudzimu u ḓo fhaṱutshedza vhoṱhe vhane vha ḓivhea nga fhasi ha vhuvhusi hawo ho lugaho.—Ndzumbululo 20:1-3; 21:3-5.

16. Ndi mini zwine zwa ḓo vha vhuṱali u zwi ita?

¹⁶ Samusi maitele a Sathane a tsini na u fhela, ri fanela u ḓivhudzisa uri, ‘Ndi fanela u ita mini?’ Ndi zwa ndeme u bvela phanḓa u guda nga ha Yehova na zwine a zwi ṱoḓa kha riṋe. (Yohane 17:3) Gudani Bivhili nga mafulufulu. Ḓiḓowedzeni u konana misi yoṱhe na vhane vha ṱoḓa u ita zwi funwaho nga Yehova. (Vha-Heberu 10:24, 25) Dzhenisani nḓivho nnzhi ye Yehova Mudzimu a ita uri vhathu vha i wane shangoni ḽoṱhe, nahone ni ite tshanduko dzi ṱoḓeaho vhutshiloni haṋu u itela uri ni tondiwe nga Mudzimu.—Yakobo 4:8.

17. Ndi ngani u fheliswa ha vhavhi hu tshi ḓo swika vhunzhi ha vhathu vha songo zwi lindela?

¹⁷ Yesu o dzula o amba uri vhunzhi ha vhathu vha ḓo nyadza vhuṱanzi ha uri ri khou tshila maḓuvhani a vhufhelo. Vhavhi vha ḓo lozwiwa nga u ṱavhanya nahone zwi songo lavhelelwa. Yeneyo ndozwo i ḓo swika vhunzhi ha vhathu vha songo zwi lindela, u fana na mbava ine ya ḓa vhusiku. (1 Vha-Thesalonika 5:2) Yesu o sevha a ri: “Murwa-muthu a tshi vhuya, zwi ḓo nga misi iḽa ya Noaxe. Zwe vha ita misi iḽa maḓi  mahulu á sathu u ḓa, ndi zwiné vha ḓo ita u swika hu tshi vhuya Murwa-muthu. Vho vha vha tshi ḽa, vha tshi nwa, vha tshi dzea, vha tshi dzewa, Noaxe a vhuya a dzhena gungwani; vha si sedze tshithu ha vhuya ha ḓa maḓi mahulu a vha fhedza. Zwi ḓo ralo musi Murwa-muthu a tshi vhuya.”—Mateo 24:37-39.

18. Ndi tsevho ifhio ya Yesu ine ra fanela u i dzhiela nṱha?

¹⁸ Nga zwenezwo, Yesu o vhudza vhathetshelesi vhawe a ri: “Hone ḓi-thanyeleni, uri dzimbilu dzaṋu dzi sa ḓo lemedzwa nga vhupangwa na nga u nwesa na nga u vhilaelela vhutshilo vhuno, ḓuvha heḽo ḽa vhilula u ni ḓela. Ngauri ḽi ḓo nga tshifu u̗ wela vhoṱhe vho dzulaho kha shango ḽoṱhe. Fhaṱuwani-ha, ni dzule ni tshi rabela, uri ni ḓo kona u ponyoka hezwo zwoṱhe, zwiné zwa ḓo vha hone, ni kone u ima [ri vha ṱanganedzeaho] phanḓa ha Murwa-muthu.” (Luka 21:34-36) Ndi zwa vhuṱali u dzhiela nṱha maipfi a Yesu. Ndi ngani? Nga ṅwambo wa uri vhane vha ṱanganedzwa nga Yehova Mudzimu na Yesu Kristo “Murwa-muthu,” vha na tshilavhelelwa tsha u ponyoka vhufhelo ha maitele a zwithu a Sathane nahone vha tshila tshoṱhe shangoni ḽiswa ḽavhuḓi ḽi re tsini vhukuma!—Yohane 3:16; 2 Petro 3:13.