Naa no no vhudzwa tshiphiri nga muṅwe muthu?— * Bivhili i amba nga ha tshiphiri tsho khetheaho tshi vhidzwaho “tshiphiri tshikhethwa.” Ndi tshikhethwa ngauri tshi bva ha Mudzimu. Tshi vhidzwa tshiphiri ngauri vhathu vho vha vha sa ḓivhi nga hatsho. Na vharuṅwa vho ṱoḓa u ḓivha zwo engedzeaho nga ha zwenezwi. Naa ni a takalela u ḓivha uri tshiphiri ndi mini?—

Kale-kale, Mudzimu o sika munna na mufumakadzi vha u thoma. Madzina avho o vha e Adamu na Eva. Mudzimu o vha ṋea haya havhuḓi hu vhidzwaho tsimuni ya Edeni. Arali Adamu na Eva vha vhe vho thetshelesa Mudzimu, vhone na vhana vhavho vho vha vha tshi ḓo ita uri ḽifhasi ḽoṱhe ḽi vhe paradiso u fana na yeneyo tsimu. Nahone vho vha vha tshi ḓo tshila lwa tshoṱhe Paradisoni. Fhedzi naa ni a humbula zwe Adamu na Eva vha ita?—

Adamu na Eva vho litsha u thetshelesa Mudzimu, ndi ngazwo ṋamusi ri sa khou tshila paradisoni. Fhedzi Mudzimu o amba uri o vha a tshi ḓo ita uri ḽifhasi ḽoṱhe ḽi vhe ḽavhuḓi, nahone muṅwe na muṅwe o vha a tshi ḓo takala nahone a tshila lwa tshoṱhe. O vha a tshi ḓo zwi ita nga nḓila-ḓe? Ho fhela tshifhinga tshilapfu, vhathu vha sa zwi ḓivhi. Tsho vha tshi tshiphiri.

Musi Yesu o ḓa kha ḽifhasi, o funza vhathu zwo engedzeaho nga ha tshenetshi tshiphiri. O sumbedza uri tshi amba nga ha Muvhuso wa Mudzimu. Yesu o vhudza vhathu uri vha rabelele uri hoyu Muvhuso u ḓe. U ḓo ita uri ḽifhasi ḽi vhe paradiso yavhuḓi.

Naa ni a takalela u ḓivha tshenetshi tshiphiri?— Ni zwi humbule uri vhane vha thetshelesa Yehova ndi vhone fhedzi vhane vha ḓo tshila Paradisoni. Bivhili i ri vhudza mafhungo manzhi nga ha vhanna na vhafumakadzi vhe vha thetshelesa Yehova. Naa ni nga takalela u guda nga havho?— Kha ri pfe uri vhaṅwe vha vho vho vha vhe vhafhio nahone ri nga vha edzisa nga nḓila-ḓe.