1, 2. Vhuimo ho vha vhu hani musi Samuele a tshi amba na vhathu vha lushaka lwa Isiraele nahone ndi ngani zwo vha zwi tshi ṱoḓea uri a vha sudzuluse uri vha rembuluwe?

 SAMUELE o lavhelesa zwifhaṱuwo zwa vhathu vha lushaka lwa hawe. Vho vha vho kuvhangana muḓini wa Giligala, vho vhidzwa nga onoyo munna a fulufhedzeaho we a vha e muporofita na muhaṱuli lwa mahumi a miṅwaha. Ho vha hu nga ṅwedzi wa May kana June u ya nga khalenda ya musalauno; vhuriha ho vha ho no dzhena. Goroi yo vha yo no vhibva dzinguni ḽeneḽo nahone yo lugela u kaṋiwa. Gogo ḽo vha ḽo pangula nḓevhe ḽo tou tshete. Samuele o vha a tshi ḓo kona hani u swikelela mbilu dzavho?

² Vhathu vha lwonolwo lushaka vho vha vha sa ḓivhi uri vhuimo vhune vha vha khaho ho dzika lungafhani. Vho omelela kha ḽa uri vha ṱoḓa u vhuswa nga khosi ya muthu wa ṋama. A vho ngo zwi pfesesa uri zwenezwo zwo vha zwi tshi sumbedza u nyadza vhukuma Yehova, Mudzimu wavho na muporofita wawe. Zwi re zwone ndi uri vho vha vha sa ṱoḓi uri Yehova a vhe Khosi yavho! Samuele o vha a tshi ḓo vha sudzulusa hani uri vha rembuluwe?

3, 4. (a) Ndi ngani Samuele o amba nga ha vhuswa hawe? (b) Ndi ngani tsumbo ya Samuele ya lutendo i tshi ri thusa ṋamusi?

³ Samuele o amba na ḽeneḽo gogo a ri: “Ndo no kalaha, ndo no tshena mmvi.” Zwe a zwi amba zwo dzhiiwa zwi zwa ndeme nga nṱhani ha uri o vha e na mmvi. A bvela phanḓa a ri: “Ndo ni ranga phanḓa u bva hanani hanga u swika ṋamusi.” (1 Sam. 11:14, 15; 12) Naho Samuele o vha o no vha mukalaha, o vha a songo hangwa zwe zwa itea musi a tshee muswa. O vha a tshi kha ḓi zwi humbula zwavhuḓi zwenezwo zwifhinga. Tsheo dze a dzi ita zwenezwo kale a tshee mutukana, dzo mu thusa uri a vhe na lutendo nahone a ḓikumedze kha Yehova, Mudzimu wawe.

⁴ Samusi Samuele o vha a tshi dzula na vhathu vha sa fulufhedzei, o vha  a tshi tea u dzula a tshi fhaṱa na u khwaṱhisa lutendo lwawe. Na ṋamusi zwi a konḓa u fhaṱa lutendo nga nṱhani ha uri ri tshila na vhathu vha si na lutendo, vhane vha ḓifara luvhi. (Vhalani Luka 18:8.) Kha ri vhone zwine ra nga zwi guda kha tsumbo ya Samuele, u bva musi a tshee mutukana.

5, 6. Nḓila ye Samuele a aluswa ngayo yo vha yo fhambana hani na ya vhaṅwe vhana, fhedzi ndi ngani vhabebi vhawe vho vha vhe na fulufhelo ḽa uri o vha a tshi ṱhogomelwa zwavhuḓi?

⁵ Samuele ho ngo aluswa u fana na vhaṅwe vhana. Musi a tshi kha ḓi tou bva u lumulwa, khamusi e na miṅwaha miraru kana i fhirahonyana yeneyo, o thoma tshumelo yawe thebanekeleni ya Yehova ngei Silo, hune ha vha vhukule ha khilomithara dza 32 u bva hayani hawe ngei Rama. Vhabebi vhawe, Elikana na Hanna, vho kumedza onoyo mutukana kha Yehova uri a ite tshumelo yo khetheaho, vha mu ita Munazari vhutshilo hawe hoṱhe. a Naa zwenezwi zwi amba uri vhabebi vha Samuele vho vha vho mu laṱa nahone vha sa mu funi?

⁶ A zwo ngo ralo na luthihi. Vho vha vha tshi zwi ḓivha uri murwa wavho u ḓo ṱhogomelwa ngei Silo. Zwi khagala uri samusi Tshifhe Muhulu Eli o vha a tshi langa zwithu nahone a tshi shuma na Samuele, o vha a tshi ḓo ita vhungoho ha uri u a ṱhogomelwa. Zwiṅwe hafhu, ho vha hu na vhafumakadzi vho vhalaho vhane zwa vhonala uri vho vha vha tshi shuma nga nḓila yo dzudzanyeaho u ita mishumo yo fhamba-fhambanaho thebanekeleni.—Ek. 38:8; Vhahaṱ. 11:33-40.

7, 8. (a) Vhabebi vha Samuele vho mu ṱuṱuwedza hani nga lufuno ṅwaha muṅwe na muṅwe? (b) Vhabebi vha nga guda mini ṋamusi kha tsumbo ya vhabebi vha Samuele?

⁷ Zwiṅwe hafhu, Hanna na Elikana a vho ngo vhuya vha hangwa murwa wavho wa tanzhe ane vha mu funesa, we u bebwa hawe ha vha hu phindulo ya thabelo. Hanna o humbela ṅwana wa mutukana kha Mudzimu, a fulufhedzisa uri u ḓo mu kumedza uri a dzhenele tshumelo khethwa ya Mudzimu vhutshilo hawe hoṱhe. Musi Hanna a tshi dalela Samuele ṅwaha muṅwe na muṅwe, o vha a tshi mu ḓela na tshiambaro tshiswa tshi si na zwanḓa uri a shume ngatsho tshumeloni yawe thebanekeleni. Vhukuma onoyo mutukana muṱuku o vha a tshi takalela nga maanḓa u dalelwa honoho. A zwi timatimisi uri o vha a tshi takalela vhukuma ṱhuṱhuwedzo ya lufuno na vhulivhisi ha vhabebi vhawe musi vha tshi mu funza nga ha nḓila ine zwa vha ndugelo ngayo u shumela Yehova henefho fhethu hukhethwa.

⁸ Vhabebi vha nga guda zwinzhi ṋamusi kha Hanna na Elikana. Zwo ḓowelea uri vhabebi vha futelele tshoṱhe kha u ṋea vhana vhavho zwithu zwi vhonalaho musi vha tshi khou vha alusa, vha litshelela zwishaiwa zwa muya. Fhedzi vhabebi vha Samuele vho rangisa zwithu zwa muya nahone zwenezwo zwa shela mulenzhe kha zwe murwa wavho a vha zwone musi o no aluwa.—Vhalani Mirero 22:6.

9, 10. (a) Ṱalusani thebanekele na nḓila ye Samuele we a vha a tshee muswa a ḓipfa ngayo nga ha henefho fhethu hukhethwa. (Sedzani na ṱhaluso i re magumoni a siaṱari.) (b) Vhuḓifhinduleli ha Samuele vhu nga vha ho katela na mini, nahone ni vhona u nga vhaswa ṋamusi vha nga edzisa hani tsumbo yawe?

 ⁹ Ri nga mu vhona nga maṱo a muhumbulo onoyo mutukana a tshi khou ḓi aluwa nahone a tshi tsa a tshi gonya zwikwarani u mona na Silo. Musi e henengei nṱha ha tshikwara a tshi lavhelesa muḓi u re fhasi khathihi na govha ḽi re thungo hawo, u tea u vha o takala vhukuma nahone a ḓirwa khana musi a tshi vhona thebanekele ya Yehova. Yeneyo thebanekele yo vha i fhethu hukhethwa vhukuma. b Ho vha ho no fhela miṅwaha ya 400 yo fhaṱiwa nga fhasi ha vhulivhisi ha Mushe nga dzawe, yo vha i yone musanda wa vhurabeli ho kunaho ha Yehova shangoni ḽoṱhe.

¹⁰ Samuele o vha a tshi funa nga maanḓa thebanekele musi a tshi khou ḓi aluwa. Kha mafhungo e a a ṅwala nga murahu, ri vhala zwi tevhelaho: “Samuele ene o vha a tshi shuma phanḓa ha Yehova é mutukana, ó ambara ngadzwana ya muḓali.” (1 Sam. 2:18) Zwi vhonala uri yeneyo ngadzwana ya muḓali i si na zwanḓa i sumbedza uri Samuele o vha a tshi thusa vhotshifhe thebanekeleni. Naho Samuele o vha a sa bvi muṱani wa vhotshifhe, o vha a tshi ita mishumo i katelaho u vula mahothi a dzhenaho muṱani wa thebanekele nga matsheloni na u ṱhogomela Eli we a vha o no kalaha. Naho o vha a tshi takalela dzenedzo ndugelo, nga u ya ha tshifhinga ho vha na zwithu zwe zwa thoma u mu dina. Zwithu zwo vha zwi sa khou tshimbila zwavhuḓi nḓuni ya Yehova.

11, 12. (a) Ndi ufhio mudzi wa zwivhi zwa Hofuni na Pinehasi? (b) Ndi vhuvhi na vhutshinyi zwa mufuda-ḓe zwo itwaho nga Hofuni na Pinehasi thebanekeleni? (Sedzani na ṱhaluso i re magumoni a siaṱari.)

¹¹ Samuele o vhona vhuvhi na vhutshinyi ho kalulaho a tshee muṱuku. Elia o vha e na vharwa vhavhili, Hofuni na Pinehasi. Mafhungo a re buguni ya Samuele a vhalea nga heyi nḓila: “Vharwa vha Eli vho vha vhe vhanna vhavhi, vha sá londi Yehova.” (1 Sam. 2:12) Mbuno mbili dzi re kha dzenedzi ndimana dzi a tshimbidzana. Hofuni na Pinehasi vho vha “vhe vhanna vhavhi”—nga lwa thevhedzaipfi vho vha vhe “vharwa vha sa thusi tshithu”—nga ṅwambo wa uri vho vha vha sa ṱhonifhi Yehova. Vho nyadza tshoṱhe zwilinganyo zwawe zwo lugaho na ṱhoḓea dzawe. Wonoyo ndi wone mudzi wa zwivhi zwoṱhe zwe vha zwi ita.

¹² Mulayo wa Mudzimu wo bula nga ho livhaho mishumo ine ya tea u itwa nga vhotshifhe na nḓila ye vha vha vha tshi fanela u ṋekedza ngayo zwiṱhavhelo thebanekeleni  yawe. Ho vha hu na tshiitisi tshi pfalaho tsha zwenezwo! Zwenezwo zwiṱhavhelo zwo vha zwi tshi imela ndugiselelo dza Mudzimu dza u hangwela zwivhi u itela uri vhathu vha vhe vho kunaho phanḓa hawe, uri vha fanelee u wana phaṱhutshedzo na vhulivhisi hawe. Fhedzi Hofuni na Pinehasi vho ita uri vhaṅwe vhotshifhe vha nyadze tshoṱhe yeneyo ndugiselelo ya zwiṱhavhelo. c

13, 14. (a) Vhathu vha mbilu dzavhuḓi vho kwamiwa hani nga vhuvhi he ha vha vhu tshi itwa thebanekeleni? (b) Eli o kundwa hani u hwala vhuḓifhinduleli hawe sa khotsi na tshifhe muhulu?

¹³ Edzani u vhona nḓila ye Samuele we a vha a tshee muswa a mangala ngayo musi a tshi vhona vhathu vha tshi ita honoho vhutshinyi hu si na ane a vha kaidza! U tea u vha o vhona vhathu vhanzhi lungafhani—u katela na vhashai, vha vhuimo ha fhasi, vho tsikeledzwaho—vha tshi ya henefho thebanekeleni khethwa vha tshi fulufhela uri vha ḓo wana khuthadzo na nungo zwa lwa muya, fhedzi vha vhuyelela hayani vho kulea nungo, vho vhaiswa kana u shoniswa! Nahone u tea u vha o vhaisala vhukuma musi a tshi pfa uri na Hofuni na Pinehasi vho vha vha sa ṱhonifhi milayo ya Yehova malugana na zwa vhudzekani, ngauri vho vha vha tshi ita zwa vhudzekani na vhaṅwe vhafumakadzi vhane vha shuma henefho thebanekeleni. (1 Sam. 2:22) Khamusi o vha a tshi fulufhela uri Eli u ḓo dzhia vhukando a dzudzanya honoho vhuimo.

¹⁴ Eli o vha e vhuimoni havhuḓi ha u dzudzanya yeneyo thaidzo ye ya vha i tshi khou ṋaṋa. Samusi o vha e tshifhe muhulu, o vha e na vhuḓifhinduleli ha zwe zwa vha zwi tshi tea thebanekeleni. O vha e na ndugelo ya u kaidza vharwa vhawe samusi o vha e khotsi avho. Zwiṅwe hafhu, vho vha vha tshi khou ḓivhaisa na u vhaisa vhathu vhanzhi shangoni nga zwiito zwavho. Naho zwo ralo, Eli o kundwa u hwala vhuḓifhinduleli hawe sa khotsi na tshifhe muhulu u itela u dzudzanya honoho vhuimo vhuvhili. Ho ngo khwaṱhisa tshanḓa musi a tshi kaidza vharwa vhawe. (Vhalani 1 Samuele 2:23-25.) Fhedzi vharwa vhawe vho vha vho tea u kaidzwa nga nḓila yo khwaṱhaho. Vho vha vho tewa nga lufu nga nṱhani ha zwivhi zwe vha vha vha tshi khou zwi ita!

15. Ndi ufhio mulaedza wa maanḓa we Yehova a u vhudza Eli nahone muṱa wa Eli wo aravha hani yeneyo tsevho?

¹⁵ Vhuimo ho vhifha lwe Yehova a rumela “munna wa Mudzimu,” muporofita a songo bulwaho nga dzina, uri a ye kha Eli e na mulaedza wa maanḓa wa khaṱulo. Yehova o vhudza Eli a ri: “Vhana vhau U khou vha hulisa wa nyadza Nṋe.” Nga zwenezwo, Mudzimu a amba hu tshee nga phanḓa uri vharwa vhavhi vha Eli vha ḓo fa nga ḓuvha ḽithihi nahone muṱa wa Eli wo vha u tshi ḓo welwa nga dziedzi ḽihulwane, u katela na u xelelwa nga ndugelo ya u vha tshigwada tsha vhotshifhe. Naa yeneyo tsevho ya maanḓa yo ita uri wonoyo  muṱa u shanduke? Mafhungo a sumbedza uri ho sokou vha u shela maḓi nṱha ha tombo.—1 Sam. 2:27–3:1.

16. (a) Ndi mivhigo ifhio ine ra vhala nga hayo malugana na mvelaphanḓa ya Samuele we a vha a tshee muswa? (b) Naa yeneyo mivhigo i a ni ṱuṱuwedza? Ṱalutshedzani.

¹⁶ Honoho vhutshinyi hoṱhe ho kwama hani Samuele we a vha a tshee muswa? Na kha enea mafhungo mavhi, ri pfa muvhigo u takadzaho wa uri Samuele o bvela phanḓa a tshi aluwa nga nḓila yavhuḓi na u ita mvelaphanḓa ya lwa muya. Ni songo hangwa uri kha 1 Samuele 2:18, ro vhala uri Samuele o “shuma phanḓa ha Yehova é mutukana” nga u fulufhedzea. Naho o vha a tshee muṱuku, Samuele o ḓiṋekedzela u shumela Mudzimu. Kha ndimana 21 ya yeneyo ndima, ri vhala maṅwe mafhungo a ṱuṱuwedzaho vhukuma, ane a ri: “Mutukana Samuele a aluwa é na Yehova.” Musi a tshi khou ḓi aluwa, vhushaka hawe na Khotsi awe wa ṱaḓulu ho bvela phanḓa vhu tshi khwaṱha. U vha na vhushaka ha tsini nga u ralo na Yehova ndi tsireledzo yo khwaṱhaho kha vhutshinyi ha mufuda naho u ufhio.

17, 18. (a) Vhaswa vha Vhakriste vha nga edzisa hani tsumbo ya Samuele musi vho sedzana na vhutshinyi? (b) Ndi mini zwine zwa sumbedza uri Samuele o khetha buḓo ḽo teaho?

¹⁷ Zwo vha zwi sa ḓo konḓela Samuele u ḓivhudza uri arali tshifhe muhulu na vharwa vhawe vha tshi ita tshivhi, na ene a nga ita zwine a funa. Fhedzi vhutshinyi ha vhaṅwe, u katela na vhune ha itwa nga vha re na vhuḓifhinduleli, vhu songo vhuya ha ri ṋea tshiitisi tsha u ita tshivhi. Ṋamusi, vhaswa vhanzhi vha Vhakriste vha tevhela tsumbo ya Samuele nahone vha bvela phanḓa vha tshi ‘aluwa vhe na Yehova’—naho vha tshi tshila vhukati ha vhathu vha sa vhei tsumbo yavhuḓi.

¹⁸ Samuele o vhuyelwa hani nga u ḓifara zwavhuḓi? Ri a vhala: “Muṱhannga uḽa Samuele a ḓi aluwa a tshi ya, a tshi funwa nga Mudzimu na nga vhathu.” (1 Sam. 2:26) Nga zwenezwo, Samuele o funwa nga vhathu vhe vha vha vhe vha ndeme khae. Yehova nga dzawe o funa onoyo mutukana nga ṅwambo wa u fulufhedzea hawe. Samuele o vha a tshi zwi ḓivha uri Mudzimu wawe u ḓo dzhia vhukando nga nṱhani ha vhuvhi hoṱhe he ha vha  vhu tshi khou itea Silo, fhedzi khamusi o ḓivhudzisa uri u ḓo zwi ita lini. Yeneyo mbudziso yo fhindulwa vhuṅwe vhusiku.

19, 20. (a) Ṱalusani zwe zwa itea kha Samuele vhuṅwe vhusiku musi e thebanekeleni? (b) Samuele o ḓivha hani hune mulaedza wa bva hone nahone o vha a tshi dzhia hani Eli?

¹⁹ Ho vha hu nga maṱamba-nḓou, fhedzi hu tshe na swiswi; luvhone luhulwane lune lwa vhonetshela denndeni lwo vha lu sa athu dzimiwa. Musi ho tou hwii, Samuele a pfa ipfi ḽi tshi khou mu vhidza. O mbo ḓi humbula uri ndi Eli, we a vha o no kalaha vhukuma nahone a si tsha vhona zwavhuḓi. Samuele a vuwa a gidima “a ya” kha onoyo mukalaha. Edzani u vhona onoyo mutukana nga maṱo a muhumbulo, a tshi khou gidimela kha Eli a songo ambara zwienda u itela u pfa uri u khou ṱoḓa mini! Zwi a kwama maḓipfele u ṱhogomela uri Samuele o vha a tshi ṱhonifha Eli na u mu sumbedza vhuthu. Hu sa londwi zwivhi zwawe zwoṱhe, Eli o vha a tshi kha ḓi vha tshifhe muhulu wa Yehova.—1 Sam. 3:2-5.

²⁰ Samuele a vusa Eli a ri: “Ndi̗ fhano; wo mbidza.” Fhedzi Eli a tshi mu fhindula a amba uri ho ngo mu vhidza nahone a vhudza onoyo mutukana uri a vhuyelele vhulaloni hawe a ye u eḓela. A dovha a pfa ipfi luvhili lwoṱhe! Eli a fheleledza o ṱhogomela zwine zwa khou itea. Ho vha ho no fhela tshifhinga tshilapfu Yehova a sa athu sumbedza vhathu vhawe bono kana mulaedza wa vhuporofita, nahone zwenezwo zwo vha zwi sa mangadzi. Fhedzi Eli a zwi ṱhogomela uri Yehova o vha a tshi khou dovha a amba—zwa zwino o vha a tshi khou amba na onoyo mutukana! Eli a vhudza Samuele uri a ye u eḓela nahone a mu vhudza nḓila yo teaho ine a tea u fhindula ngayo. Samuele a ita nga u ralo. Nga murahunyana a pfa ipfi ḽi tshi mu vhidza ḽi tshi ri: “Samuele! Samuele!” Onoyo mutukana a fhindula a ri: “Amba! Mulanda wau o thetshelesa.”—1 Sam. 3:1, 5-10.

21. Ri nga thetshelesa hani Yehova ṋamusi nahone ndi ngani zwi tshi vhuyedza u ita nga u ralo?

²¹ Yehova o fheleledza o vha na mulanda we a vha a tshi ḓo mu thetshelesa ngei Silo. Samuele o thetshelesa vhutshilo hawe hoṱhe. Naa na inwi ni a thetshelesa Yehova zwifhinga zwoṱhe? A zwi vhuyi zwa ṱoḓa uri ri thome ri pfe ipfi ḽi songo ḓoweleaho ḽi tshi amba na riṋe vhusiku. Ṋamusi ri nga amba uri ri dzula ri tshi pfa ipfi ḽa Mudzimu. Ḽi kha Ipfi ḽawe ḽo fhelelaho ḽine ḽa vha Bivhili. Musi ri tshi bvela phanḓa u thetshelesa Mudzimu na u ita zwine a zwi funa, lutendo lwashu lu ḓo bvela phanḓa lu tshi engedzea. Zwo vha zwo tou ralo na nga Samuele.

22, 23. (a) Mulaedza we u thomani Samuele a vha a tshi ofha u u ḓivhadza, wo fheleledza wo ḓadzea hani? (b) Bvumo ḽa Samuele ḽo bvela hani phanḓa ḽi tshi engedzea?

²² Honoho vhusiku ngei Silo ho vha ha ndeme vhukuma vhutshiloni ha Samuele, ngauri u bva nga tshenetsho tshifhinga o thoma u vha na vhushaka ho khetheaho na Yehova, a vha muporofita na muambeli wa Mudzimu. U thomani onoyo mutukana o ofha u vhudza Eli mulaedza u bvaho ha Yehova, ngauri wo vha u mulevho wa u fhedza wa uri zwe zwa porofitiwa malugana na wonoyo muṱa wo vha zwi tshi ḓo itea hu si kale. Fhedzi Samuele a vha na tshivhindi—nahone Eli a ṱanganedza khaṱulo ya Mudzimu nga u ḓiṱukufhadza.  Nga murahu ha tshifhinganyana, zwoṱhe zwe Yehova a zwi amba zwa ḓadzea: Vhaisiraele vha lwa na Vhafilisita, Hofuni na Pinehasi vha vhulahwa nga ḓuvha ḽithihi nahone Eli a fa musi a tshi pfa uri Mbulungelo khethwa ya Yehova yo dzhiiwa.—1 Sam. 3:10-18; 4:1-18.

²³ Naho zwo ralo, bvumo ḽa uri Samuele ndi muporofita a fulufhedzeaho ḽa ḓi bvela phanḓa ḽi tshi engedzea. Mafhungo a hone a ri: “Yehova a vha nae’,” nahone a bvela phanḓa a tshi amba uri Yehova a khunyeledza vhuporofita hoṱhe ha Samuele.—Vhalani 1 Samuele 3:19.

24. Ndi phetho ifhio ye Vhaisiraele vha i ita nga u ya ha tshifhinga nahone ndi ngani tsho vha tshi tshivhi tshihulwane?

²⁴ Naa Vhaisiraele vho tevhela tsumbo ya Samuele, nahone vha vha vhathu vha muya, vha fulufhedzeaho? Hai. Nga u ya ha tshifhinga, vho ita phetho ya uri a vha ṱoḓi u haṱulwa nga muporofita zwawe. Vho vha vha tshi ṱoḓa u vhuswa nga khosi ya muthu wa ṋama u fana na dziṅwe tshaka. Samuele o tevhela vhulivhisi ha Yehova, a ita zwine vha ṱoḓa. Fhedzi o sumbedza Vhaisiraele uri tshenetsho tsho vha tshi tshivhi tshihulwane. Vho vha vha sa khou landula muthu zwawe, fhedzi vho vha vha tshi khou landula Yehova nga dzawe! Nga zwenezwo, a kuvhanganya vhathu Giligala.

25, 26. Ngei Giligala, mukalaha Samuele o fheleledza o thusa hani vhathu vha hawe uri vha vhone vhuhulwane ha tshivhi tshe vha tshi itela Yehova?

²⁵ Kha ri dovhe ri vhuyelele kha tshenetsho tshifhinga tshi konḓaho musi a tshi khou amba na Vhaisiraele ngei Giligala. Henefho, Samuele we a vha o no vha mukalaha a humbudza Vhaisiraele nga ha nḓila ye a dzula ngayo a tshi fulufhedzea. Nga murahu ha zwenezwo, ri a vhala: “Samuele a vhidzelela Yehova.” A humbela Yehova uri a ḓise mvula ya mibvumo.—1 Sam. 12:17, 18.

²⁶ Zwo vha zwi tshi ḓo konadzea hani uri hu vhe na mvula ya mibvumo nga vhuriha? Zwenezwo zwithu zwo vha zwi sa athu vhuya zwa itea. Arali ho vha hu na vhathu vhe vha timatima kana u holedza khumbelo yawe, zwiito zwavho a zwo ngo ya thambo. Ho mbo ḓi nzwinzwimala. Mimuya ya vhudzula goroi masimuni. Nga murahu ha vha na mibvumo i dzingisaho nḓevhe nahone mvula ya thoma u na. Vhathu vha aravha hani? “Vhathu vhoṱhe vha ofha Yehova na Samuele zwihulu.” Vha fheleledza vho zwi vhona uri vho ita tshivhi tshihulwane.—1 Sam. 12:18, 19.

27. Yehova u ḓipfa hani nga ha vhane vha edzisa lutendo lwa Samuele?

²⁷ Muthu we a swikelela mbilu dzavho dza vhushandukwa a si Samuele, fhedzi ndi Yehova, Mudzimu wawe. U bva vhuswani hawe u swika a tshi kalaha, Samuele o vha e na lutendo kha Mudzimu wawe. Yehova o mu lambedza. Na ṋamusi Yehova ho ngo shanduka. U kha ḓi tikedza vhane vha edzisa lutendo lwa Samuele.