Humbulani nga hovhu vhuimo: Musi Julia a tshi ḓilavhelesa kha tshivhoni, u ḓivhona e na muvhili. U ḓivhudza uri: “Ndi tea u fhungudza muvhili,” naho vhabebi vhawe na khonani dzawe vha tshi mu vhudza uri o sekena.

Julia u kha ḓi tou bva u humbula nga ha u dzhia vhukando vhuhulwane uri a fhungudze “khilogiramu mbili fhedzi.” O vha a tshi khou ṱoḓa u ḓidzima zwiḽiwa lwa maḓuvhanyana . . .

No vha ni tshi ḓo ita mini arali ni tshi ḓipfa u fana na Julia?

A zwi ngo u khakhea u vhilaela nga ha mbonalo yaṋu. Bivhili i khoḓa mbonalo ya vhanna na vhafumakadzi vho vhalaho vha ngaho Sara, Rahele, Abigaili, Yosefa na Davida. Bivhili i amba u ri mufumakadzi ane a pfi Abisaga o vha e “wa lunako luhulu.”​—1 Dzikhosi 1:4.

Naho zwo ralo, vhaswa vhanzhi vha vhilaedziswa vhukuma nga mbonalo yavho. Zwenezwo zwi nga ita uri vha sedzane na thaidzo khulwane. Ṱhogomelani:

• Kha ṱhoḓisiso nthihi, vhasidzana vha phesenthe dza 58 vho amba uri vha na muvhili muhulwane, zwi re zwone ndi uri ho vha hu vha phesenthe dza 17 fhedzi vhe vha vha vhe na muvhili muhulwane.

• Kha iṅwe ṱhoḓisiso, vhafumakadzi vha phesenthe dza 45 vhe vha vha vho sekena vhukuma vho vha vha tshi humbula uri vho khwaṱha!

• Musi vhaṅwe vhaswa vha tshi khou lwela u fhungudza muvhili vho farwa nga vhulwadze ha anorexia​—vhune ha vha vhulwadze vhu re na khombo vhune muthu a ḓidzima zwiḽiwa nga khole u itela uri a sike nga nḓala.

 Arali ni na tsumbadwadze dza anorexia kana vhulwadze naho vhu vhufhio ha u sa ḽa, humbelani thuso. Thomani nga u vhudza mubebi waṋu kana muṅwe muthu muhulwane ane na mu fulufhela. Bivhili i ri: “Khonani ndi ṱhama ya maḓuvha oṱhe; ndi mukomana we a mbebelwa ḓuvha ḽa khombo.”​—Mirero 17:17.

Vhumuthu haṋu ndi hone vhune ha nga ita uri vhathu vha ni takalele kana vha sa ni takalele. Ṱhogomelani murwa wa Khosi Davida ane a pfi Abesalomo. Bivhili i ri vhudza uri:

‘Ho vha hu si ná muṅwe munna we a nga ene nga u naka. Ho vha hu si ná tshinyadzea khae.’​—2 Samuele 14:25.

Hoyu muṱhannga o vha a tshi ḓihudza, e na vhuhovheleli na tshimbevha! Nga zwenezwo Bivhili a i ṱalusi Abesalomo sa muthu wavhuḓi; i mu ṱalusa sa muthu we a vha a sa fulufhedzei, we vengo ḽawe ḽa mu ṱuṱuwedzela uri a vhulahe.

Ndi ngazwo Bivhili i tshi ri ṋea heyi nyeletshedzo:

“Ni ambare vhumuthu vhuswa.”​—Vhakolosa 3:10.

“U ḓinakisa haṋu hu songo vha ha nga nnḓa . . . , fhedzi nga hu vhe ha muthu wa nga ngomu wa mbiluni.”​—1 Petro 3:3, 4.

Naho zwi songo khakhea musi ni tshi ṱoḓa u vhonala ni wavhuḓi, fhedzi tsha ndeme vhukuma u fhira mbonalo yaṋu ndi vhumuthu haṋu. Nga u ya ha tshifhinga, vhumuthu haṋu havhuḓi vhu ḓo kunga vhaṅwe vhathu u fhira u diva/ muvhili wavhuḓi kana mbonalo yavhuḓi! Muṅwe musidzana ane a pfi Phylicia, u ri: “Vhathu vha ḓo vhona lunako lwaṋu nga u ṱavhanya, fhedzi zwine vha sa ḓo vhuya vha zwi hangwa nga inwi ndi vhumuthu haṋu na pfaneleo dzaṋu dzavhuḓi.”

Naa kanzhi a ni takaleli mbonalo yaṋu?

Naa no no vhuya na humbula nga ha u ita muaro kana nga u ḓidzima zwiḽiwa nga nḓila yo kalulaho u itela u khwinisa nḓila ine muvhili waṋu wa sedzea ngayo?

No vha ni tshi nga shandula mini muvhilini waṋu arali no vha ni tshi nga kona u ita nga u ralo?

• VHULAPFU

• TSHILEME

• MAVHUDZI

• TSHIVHUMBEO TSHA MUVHILI

• THIFHAṰUWO

• MUVHALA WA LUKANDA

Arali phindulo yaṋu i ee kha mbudziso mbili dza u thoma, nahone no swaya zwithu zwiraru kana u fhira kha mbudziso ya vhuraru, humbulani hezwi: Zwi nga kha ḓi itea uri vhaṅwe vhathu a vha ni vhoni nga nḓila ine na ḓivhona ngayo. Zwi a leluwa uri ni kaludze zwithu nahone ni vhilaele zwihulu nga mbonalo yaṋu.​—1 Samuele 16:7.