MBUDZISO 5

Ndi Nga Ita Mini Arali Ndi Tshi Khou Shengedzwa Tshikoloni?

TAMBANI

ZWINE ZWA ITA URI ZWI VHE ZWA NDEME

Zwine na zwi ita zwi nga khwinisa kana u ṋaṋisa zwithu.

NO VHA NI TSHI ḒO ITA MINI?

Humbulani nga hovhu vhuimo: Thomas ha ṱoḓi u ya tshikoloni ṋamusi kana matshelo. Ngoho ndi uri ha tsha ṱoḓa u ya tshikoloni na luthihi. Hezwi zwithu zwoṱhe zwo thoma miṅwedzini yo fhiraho musi vhane a dzhena navho tshikolo vha tshi phaḓaladza mazwifhi e a mu tshinya dzina. Nga murahu ha zwenezwo, vha thoma u mu kolela nga u mu vhidza nga madzina a ṱhavhaho. Nga zwiṅwe zwifhinga muṅwe muthu o vha a tshi khuḓa bugu dza Thomas tshanḓani nahone zwa tou nga ho ngo ita nga khole, kana muṅwe wa vhane vha khou tshimbila murahu hawe a mu sukumedza nahone musi Thomas a tshi rembuluwa, a sa vhone uri zwo itwa nga nnyi. Mulovha zwo vha zwo tou hulela, Thomas o rumelwa mulaedza u tshuwisaho nga Inthanethe . . .

Arali no vha ni Thomas, no vha ni tshi ḓo ita’ni?

IMANI NI HUMBULE!

A si uri a hu na zwine na nga ita! Zwi re zwone ndi uri ni nga kunda muthu ane a khou ni shengedza ni songo vhuya na lwa nae. Nga nḓila-ḓe?

DZIKANI. Bivhili i ri: “Tsilu ḽi bula zwoṱhe zwa mbiluni yaḽo; wa vhuṱali u zwi vhulungela ḽa matshelo.” (Mirero 29:11) Arali na dzika—zwa si vhonale uri no sinyuwa—ni nga kha ḓi kula nungo vhane vha khou ni shengedza.
NI SONGO LIFHEDZA. Bivhili i ri: “Ni songo lifhedza vhuvhi nga vhuvhi.” (Vharoma 12:17) U lifhedza zwi ṋaṋisa vhuimo.
NI SONGO ḒIDZHENISA KHOMBONI. Bivhili i ri: “Muthanyi u vhona muvhango a khuda.” (Mirero 22:3) U ya nga hune zwa konadzea ngayo, iledzani u vha vhukati ha vhathu vhane vha nga vusa khakhathi na vhuimo vhune ha nga ita uri ni shengedzwe.
LINGEDZANI U FHINDULA NGA NḒILA I SONGO LAVHELELWAHO. Bivhili i ri: “Phindulo ya vhuthu i dzikisa mbiti.” (Mirero 15:1) Ni nga kha ḓi lingedza u ita na miswaswo. Sa tsumbo, arali muthu ane a khou ni shengedza a ni sea a amba uri no khwaṱha, ni nga kha ḓi ri: “Ni khou amba ngoho, khamusi ndi tea u dzhima u itela u fhungudzanyana mapfura muvhilini!”
ḒIṰUTSHELENI. Nora a re na miṅwaha ya 19 u ri: “U fhumula zwi sumbedza uri no vhibva nahone a ni fani na muthu ane a khou ni shengedza. Zwi sumbedza uri ni a kona u ḓifara—pfaneleo ine muthu ane a khou ni shengedza a si vhe nayo.”—2 Timotheo 2:24.
GUDANI U ḒIFULUFHELA. Kanzhi vhathu vhane shengedza vhaṅwe vha a kona u vhona vhathu vhane vha si ḓifulufhele, samusi vhathu vho raloho vha sa anzeli u ḓilwela. Vhunzhi ha vhathu vhane vha shengedza vhaṅwe vha a kulea nungo musi vha tshi vhona uri a ni vha ofhi.
VHUDZANI MUṄWE MUTHU. Muṅwe muthu we a vha e mudededzi u ri: “Ndi ṱuṱuwedza muṅwe na muṅwe ane a shengedzwa uri a ambe. Zwo tea uri a ambe samusi zwi tshi nga ita uri vhaṅwe vhathu vha si shengedzwe.”

U ḓifulufhela zwi nga ni ṋea maanḓa ane muthu ane a khou ni shengedza a si vhe nao

NO VHA NI TSHI ZWI ḒIVHA?

U shengedzwa a zwi kateli u pfiswa vhuṱungu muvhilini fhedzi, fhedzi zwi katela na:

U Ṱhavhiwa nga maipfi. “Ndi nga si vhuye nda a hangwa madzina a u kola e vha mmbidza ngao kana zwithu zwe vha zwi amba. Vho nnyita uri ndi ḓipfe ndi si tshithu, ndi sa funiwi nahone ndi dzadza. Zwo vha zwi tshi ḓo vha khwine ngavhe vho tou ntwa zwanga.”—Celine, a re na miṅwaha ya 20.
U Nyaliwa. “Vhane nda dzhena navho tshikolo vho thoma u ṱutshela kule na nṋe. Vho vha vha tshi vhivha vhudzulo ṱafulani ine ra leḽa khayo zwiḽiwa zwa nga masiari, hu u itela uri ndi si wane fhethu ha u dzula. Ṅwaha wo vhuya wa tou fhela ndi tshi dzulela u lila na u ḽa ndi ndoṱhe.”—Haley, a re na miṅwaha ya 18.
U Shengedzwa nga Zwishumiswa zwa Elekitironiki. “Nga u ṅwala mafhungo a si gathi kha khomphyutha, ni nga tshinya muthu dzina—kana vhutshilo hawe. Zwi nga pfala u nga ndi u tou kaludza zwithu, fhedzi zwi nga itea!”—Daniel, a re na miṅwaha ya 14.

**MBUDZISO MALUGANA NA U SHENGEDZWA**
NGOHO KANA MAZWIFHI	PHINDULO
1 U shengedza ndi maitele o thomaho kale.	1 Ngoho. Sa tsumbo, Bivhili i amba nga ha vhathu vhalapfu kana Vhanefilimu—tshigwada tshine dzina ḽatsho ḽa amba “Vhane Vha Wisa Vhaṅwe.”—Genesi 6:4.
2 U shengedza ndi u sokou tamba. A si mafhungo ane a dina-vho lini.	2 Mazwifhi. Vhaswa vhanzhi vha a ḓivhulaha nga nṱhani ha u shengedzwa.
3 Uri ni si shengedzwe ni tea u ḓilwela.	3 Mazwifhi. Kanzhi vhathu vhane vha shengedza vhaṅwe vha na maanḓa a fhiraho a vhane vha vha shengedza, nga zwenezwi u ḓilifhedzela a zwi thusi tshithu.
4 Arali na vhona muthu a tshi khou shengedzwa, ni songo zwi dzhena.	4 Mazwifhi. Kha enea mafhungo ni ḓo vha na mulandu arali na sokou ṱanzwa maṱo na lavhelesa. Arali na vhona muthu a tshi khou shengedzwa na sokou ḓifhumutshela, zwi ḓo fana na musi no shela mulenzhe kha honoho u shengedza.
5 Vhathu vhane vha shengedza vhaṅwe kanzhi a vha ḓifulufheli, vha tou vha na vhukoni ha u tshuwisa muthu.	5 Ngoho. Naho vhaṅwe vhashengedzi vhe na tshivhindi, vhanzhi a vha ḓifulufheli nahone vha shengedza vhaṅwe u itela uri vha ḓipfe vhe khwine.
6 Vhathu vhane vha shengedza vhaṅwe vha nga shanduka.	6 Ngoho. Vhane vha shengedza vhaṅwe vha nga shandula nḓila ine vha humbula na u ita ngayo zwithu arali vha wana thuso.

PHINDULO DZA MBUDZISO DZA 10 DZINE VHASWA VHA DZI VHUDZISA