1-3. (a) Ṱalutshedzani zwe zwa itea nga vhusiku he Oitixo a lovha ngaho. (b) Paulo o ita mini, nahone zwenezwi zwi ri funza mini nga hae?

 PAULO o fara muṱangano na vhahawe vhanzhi vha tshivhidzo tsha Tiroasi kamarani ya nṱha. U amba navho tshifhinga tshilapfu samusi hu vhusiku ha u fhedza e navho. Zwino ndi vhukati ha vhusiku. Vho funga mbone nnzhi dzi dugaho nga mapfura henefho kamarani nahone zwa ita uri hu fhise hu dovhe hu vhe na vhutsinyana. Ho vha hu na muṅwe muṱhannga we a vha o dzulela fasiṱereni ane a pfi Oitixo. Musi Paulo a tshi khou amba, Oitixo o mbo ḓi farwa nga khofhe a wela fhasi a tshi bva kha nnḓu ya nṱha ya vhuraru.

² Khamusi Luka o vha e kha vhathu vha u thoma u gidimela kha onoyo muṱhannga samusi o vhe e dokotela. Ho vha hu si na zwe vha vha vha tshi nga thusa Oitixo ngazwo. Vho “wana o fa.” (Mish. 20:9) Fhedzi ha itea vhuṱolo. Paulo a ṱavhanya a kwatama a kuvhatedza onoyo muṱhannga a amba na gogo a ri: “Ni songo vhilaela, u kha ḓi tshila.” Paulo o vusa Oitixo!​—Mish. 20:10.

³ Tshenetsho tshiitea tshi sumbedza uri muya mukhethwa wa Mudzimu u na maanḓa. Musi Oitixo a tshi lovha wo vha u si mulandu wa Paulo. Fhedzi o vha a sa ṱoḓi uri vhahawe vha ṱuwe kha wonoyo muṱangano wo khetheaho vho ṱungufhala kana vha si tsha vha na lutendo kha Yehova nga nṱhani ha zwe zwa itea. Nga u vusa Oitixo, Paulo o khuthadza vhahawe na u vha khwaṱhisa uri vha bvele phanḓa vha tshi huwelela nga u fhisea. Paulo o vha a tshi zwi ḓivha uri vhutshilo ndi ha ndeme. Zwenezwo zwi ri humbudza maipfi awe ane a ri: “A thi na mulandu wa malofha a vhathu vhoṱhe.” (Mish. 20:26) Kha ri haseledze nga ha uri tsumbo ya Paulo i ri thusa hani kha ḽeneḽi sia.

4. Paulo o ṱangana na vhuimo vhufhio vhu ofhisaho?

⁴ Samusi zwo ambiwa kha ndima yo fhiraho, Paulo o ṱangana na zwithu zwi ofhisaho musi e Efesa. Vhathu vha henefho vho vusa bonyongo nga nṱhani ha u huwelela hawe. Vhoṱhe vhe vha vha vha tshi ita midzimu ya zwifanyiso nga siḽiva na u zwi rengisa hu u itela uri vhathu vha gwadamele Arithemisi, vho vha vha tshi khou gwalaba. Mishumo 20:1 i ri: “Musi bonyongo ḽo no dzika, Paulo a vhidza vhafunziwa, a vha ṱuṱuwedza a kona u vha onesa, a ya Makedonia.”

5, 6. (a) Paulo a nga vha o fhedza tshifhinga tshingafhani e Makedonia, nahone o itela mini vhahawe vha henefho? (b) Paulo o vha a tshi dzhia hani vhahawe?

⁵ Musi Paulo a tshi khou ya Makedonia, o ima vhuimazwikepe ha Tiroasi a fhedza tshifhinganyana henefho. O vha o fhulufhela uri Tito we a vha o rumiwa Korinta u ḓo ṱangana nae henefho. (2 Vhakor. 2:12, 13) Fhedzi, musi Paulo a tshi vhona uri Tito ha nga koni u swika, o ya Makedonia he khamusi a fhedza ṅwaha woṱhe “a tshi ṱuṱuwedza zwihulu vhafunziwa vha henefho.” a (Mish. 20:2) Tito o fhedza o ṱangana na Paulo Makedonia, a mu vhudza uri vhahawe kha ḽa Korinta vho ṱanganedza vhurifhi hawe ha u thoma nga mbilu tshena. (2 Vhakor. 7:5-7) Zwenezwo zwo ita uri Paulo a vha ṅwalele vhuṅwe vhurifhi vhune zwino ra vhu ḓivha sa Vhakorinta Ya Vhuvhili.

⁶ Zwi takadzaho ndi zwa uri Luka u amba uri, musi Paulo o dalela vhahawe vha Efesa na vha Makedonia, o vha a tshi vha ṱuṱuwedza. Zwenezwi zwi sumbedza uri Paulo o vha a tshi funa vhahawe. O vha a sa fani na Vhafarisei vhe vha vha vha tshi dzhiela vhaṅwe fhasi. Nṱhani hazwo, o vha a tshi takalela u shumela Mudzimu e na vhahawe. (Yoh. 7:47-49; 1 Vhakor. 3:9) Na musi Paulo a tshi tea u vha kaidza o khwaṱhisa tshanḓa, o vha a sa humbuli uri u khwine khavho.​—2 Vhakor. 2:4.

7. Vhahulwane vha Vhakriste vha nga edzisa hani tsumbo ya Paulo ṋamusi?

⁷ Musalauno, vhahulwane na vhalavhelesi vha ḽiisela vha lingedza u edzisa Paulo. Na musi vha tshi kaidza, tshipikwa tshavho ndi u khwaṱhisa onoyo muthu. Vha lingedza u pfesesa nḓila ine vhaṅwe vha ḓipfa ngayo na u vha ṱuṱuwedza, hu si u vha haṱula. Muṅwe mulavhelesi wa ḽiisela o ri: “Vhahashu vhanzhi vha a zwi funa u ita zwo lugaho, fhedzi vha anzela u ṱangana na zwithu zwine zwa vha shonisa kana zwa vha tshuwisa nahone vha si ḓivhe uri vha tea u ita mini.” Vhahulwane vha nga khwaṱhisa vhahavho.​—Vhahev. 12:12, 13.

8, 9. (a) Paulo o itiswa nga mini uri a si tsha ṋamela tshikepe tsha u ya Siria? (b) Ndi ngani Vhayuda vho vhenga Paulo?

⁸ Musi Paulo a tshi bva Makedonia, o ya Korinta. b Musi o no fhedza miṅwedzi miraru e henefho, o vha o ḓiimisela u bvela phanḓa na lwendo lwawe a ya Kenkrea, he a vha o humbula uri u ḓo ṋamela hone tshikepe a ya Siria. U bva henefho, o vha a tshi ḓo kona u ya Yerusalema u isa miṋeelo kha vhahawe vha shayaho. c (Mish. 24:17; Vharoma 15:25, 26) Fhedzi ha ṱavhanya ha itea zwiṅwe zwithu zwe zwa ita uri Paulo a shandule zwe a vha o zwi humbula. Mishumo 20:3 i ri vhudza zwe zwa itea, i ri: “Vhayuda vho langana u mu vhulaya”!

⁹ Vhayuda vho vha vha tshi vhenga Paulo nga maanḓa ngauri o vha o furalela vhurereli ha Tshiyuda. Nga tshiṅwe tshifhinga tsho fhiraho musi Paulo a tshi khou huwelela henefho Korinta, zwo ita uri Krisipo,  muhulwane wa sinagogo a vhe mutendi. (Mish. 18:7, 8; 1 Vhakor. 1:14) Nga tshiṅwe tshifhinga, Vhayuda vha henefho Korinta vho vhuya vha isa Paulo kha Galioni muvhusi wa vundu ḽa Axaya, vha tshi khou pomoka Paulo uri o pfuka mulayo. Fhedzi Galioni a si vhone Paulo mulandu. Zwenezwo zwa sinyusa Vhayuda zwihulu. (Mish. 18:12-17) Vhayuda vha henefho Korinta vha nga vha vho humbula uri Paulo u ḓo ṱavhanya a ṋamela tshikepe henefho Kenkrea. Nga zwenezwo, vha vhamba maano a uri vha mu lalele nḓilani uri vha mu vhulaye. Kha ri vhone uri Paulo o ita mini?

10. Naa u sa ya ha Paulo Kenkrea zwo vha zwo khakhea? Ṱalutshedzani.

¹⁰ Paulo a humbula uri a si tsha ya Kenkrea, fhedzi a fare nḓila ye a ḓa ngayo ine ya fhira nga Makedonia. Zwenezwo o zwi itiswa ngauri o vha a tshi khou ṱoḓa u ḓitsireledza na u tsireledza miṋeelo ya vhahawe. Ndi ngoho uri u tshimbila nga milenzhe na zwone zwo vha zwi na khombo. Bada dza zwenezwo zwifhinga dzo vha dzo ḓala zwigevhenga. Na nnḓu dze vhaeni vha vha vha tshi awela khadzo dzo vha dzi songo tsireledzea. Fhedzi Paulo o humbula uri yeneyi nḓila yo vha i khwine u fhirisa u ya Kenkrea. Mashudu mavhuya ndi a uri o vha a sa khou tshimbila e eṱhe. O vha a tshi khou tshimbila na Aristrariko, Gayo, Sekundo, Sopatere, Timotheo, Tirofimo na Tixiko.​—Mish. 20:3, 4.

11. Vhakriste vha ita mini ṋamusi uri vha ḓitsireledze, nahone Yesu o ri vhetshela tsumbo ifhio?

¹¹ U fana na Paulo, Vhakriste ṋamusi na vhone vha a ḓitsireledza musi vhe tsimuni. Nṱhani ha u tshimbila vhe vhoṱhe, huṅwe fhethu vha tshimbila vhe zwigwada kana vhe vhavhili. Ri tea u ita mini uri ri ḓitsireledze musi ri tshi tovholwa? Ri a zwi ḓivha uri ri nga si iledze u tovholwa. (Yoh. 15:20; 2 Tim. 3:12) Fhedzi a ri ḓivhei khomboni nga khole musi ri tshi khou huwelela. Kha ri ambe nga ha tsumbo ya Yesu. Nga tshiṅwe tshifhinga musi vhapikisi vha Yesu ngei Yerusalema vha tshi doba matombo uri vha mu pose ngao, o “dzumbama, a bva thembeleni.” (Yoh. 8:59) Nga murahu, musi Vhayuda vha tshi vhamba maano a uri vha mu vhulaye, “Yesu a si tsha tshimbila Vhayuda vha tshi mu vhona, fhedzi a ṱuwa a ya dzinguni ḽi re tsini na soga.” (Yoh. 11:54) Yesu o ita zwine a nga kona uri a ḓitsireledze uri a kone u ita zwine Mudzimu a funa. Na Vhakriste vha ita zwi fanaho.​—Mat. 10:16.

12, 13. (a) Tshivhidzo tsho ḓipfa hani musi Paulo a tshi vusa Oitixo? (b) Riṋe ṋamusi ri nga khuthadzwa nga fhulufhelo ḽifhio musi ro lovhelwa?

¹² Paulo na khonani dzawe vho tshimbila vhoṱhe henefho  Makedonia nahone zwi vhonala uri vho ḓo fhambana lwa tshifhinganyana. Zwi vhonala vho dovha vha ṱangana Tiroasi. d Bivhili i ri: “Ra ṱangana navho hu sa athu u fhela maḓuvha maṱanu ngei Tiroasi.” e (Mish. 20:6) Ndi henefho he Paulo a vusa Oitixo vhafuni samusi zwo ambiwa mathomoni a ino ndima. Vhahashu vha fanela u vha vho takala vhukuma musi vha tshi vhona khonani yavho Oitixo o vuswa vhafuni. Samusi Bivhili i tshi zwi amba, vho “khuthadzwa zwihulu.”​—Mish. 20:12.

¹³ Ndi ngoho uri a hu tsha itea vhuṱolo ho raloho ṋamusi. Naho zwo ralo, vho lovhelwaho vha nga “khuthadzwa zwihulu” nga fhulufhelo ḽa mvuwo ḽi re Bivhilini. (Yoh. 5:28, 29) Oitixo o dovha a lovha ngauri o vha e na tshivhi. (Vharoma 6:23) Fhedzi vhane vha ḓo vuselwa shangoni ḽiswa ḽa Mudzimu vha na fhulufhelo ḽa u tshila tshoṱhe! Zwiṅwe hafhu, vhane vha vuselwa ṱaḓulu u vhusa na Yesu a vha tsha ḓo fa. (1 Vhakor. 15:51-53) Nga zwenezwo, vhaḓodzwa na vha “dziṅwe nngu” vha nga “khuthadzwa zwihulu” nga fhulufhelo ḽa mvuwo.​—Yoh. 10:16.

14. Paulo o ri mini kha vhahulwane vha Efesa musi a tshi ṱangana navho Mileto?

¹⁴ Paulo na khonani dzawe vho bva Tiroasi vha ya Aso, vha fhirela Mitilene, vha ya Xio, Samo, vha konou fhirela Mileto. Tshipikwa tsha Paulo ho vha hu u swika Yerusalema nga tshifhinga tsha vhuṱambo ha Pentekoste. Ndi ngazwo a songo fhira nga Efesa kha lwonolu lwendo. Samusi Paulo o vha a tshi khou ṱoḓa u amba na vhahulwane vha Efesa, o vha humbela uri vha ṱangane nae Mileto. (Mish. 20:13-17) Musi vha tshi swika, Paulo o amba navho a ri: “Ni a ḓivha nḓila ye nda ḓifara ngayo vhukati haṋu u bva tshee nda swika vunduni ḽa Asia, ndi tshi shumela Murena nga u ḓiṱukufhadza huhulu, ndi tshi lila na u tambula ngauri Vhayuda vho vha vha tshi ṱoḓa u mmbulaya, ndo ni vhudza zwithu zwi vhuyedzaho na u ni funza phanḓa ha vhathu na nnḓu nga nnḓu. Fhedzi ndo ṱanziela nga vhuḓalo kha Vhayuda na Vhagerika uri vha fanela u rembuluwa, vha gwadamele Mudzimu na u tenda Murena washu Yesu.”​—Mish. 20:18-21.

15. Ndi zwifhio zwiṅwe zwivhuya zwa u ṱanziela nnḓu nga nnḓu?

 ¹⁵ Hu na nḓila nnzhi dzine ṋamusi ra dzi shumisa u huwelela mafhungo maḓifha kha vhathu. U fana na Paulo, ri lwela u ya hune vhathu vha vha hone. Hu nga vha vhuimabisi, zwiṱaraṱani, kana mimakete. Fhedzi maitele ashu mahulwane a u huwelela ndi u ya nnḓu nga nnḓu. Ndi ngani? Tshiṅwe tshiitisi ndi tsha uri zwi ṋea muṅwe na muṅwe tshibuli tsha uri a dzule a tshi pfa mafhungo maḓifha a Muvhuso, zwenezwi zwi sumbedza uri Mudzimu ha ṱaluli. Zwi dovha zwa ita uri ri kone u thusa vhathu vha mbilu dzavhuḓi u ḓivha Mudzimu. Na riṋe zwi a ri vhuyedza ngauri u ya nnḓu nga nnḓu zwi ri khwaṱhisa lutendo na u ri gudisa u konḓelela. Zwi re zwone ndi uri vhathu ṋamusi vha ri ḓivha ngazwo uri ri Vhakriste vha ngoho ngauri ri huwelela nga u fhisea “phanḓa ha vhathu na nnḓu nga nnḓu.”

16, 17. Paulo o sumbedza hani uri ha ofhi, nahone Vhakriste vha nga mu edzisa hani ṋamusi?

¹⁶ Paulo o ṱalutshedza vhahulwane vha Efesa uri o vha a sa ḓivhi khombo dze a vha a tshi ḓo ṱangana nadzo musi a tshi vhuyelela  Yerusalema. O amba navho a ri: “Naho zwo ralo, a thi dzhii vhutshilo hanga vhu ha ndeme, tsha ndeme ndi uri ndi fhedze mbambe yanga na mushumo we nda ṋewa nga Murena Yesu, wa u ḓivhadza nga vhuḓalo mafhungo maḓifha a vhuthu vhuhulu ha Mudzimu.” (Mish. 20:24) Nga tshivhindi, Paulo ho ngo tendela tshithu na tshithihi tshi tshi mu thivhela u ita zwe Mudzimu a vha a tshi ṱoḓa uri a zwi ite, hu nga vha mutakalo u si wavhuḓi kana u tovholwa.

¹⁷ Na ṋamusi, Vhakriste vha sedzana na thaidzo nnzhi. Vhaṅwe vha sedzana na u thivhelwa ha mushumo washu nga muvhuso na u tovholwa. Vhaṅwe vha na mutakalo u si wavhuḓi kana malwadze a u tsikeledzea, fhedzi vha ḓi bvela phanḓa vha tshi huwelela nga tshivhindi. Vhaswa vhashu vha kombetshedzwa nga thanga dzavho tshikoloni uri vha ite zwithu zwivhi. Ṱhanzi Dza Yehova, u fana na Paulo, vha ima vho khwaṱha naho vha tshi nga ḓiwana vhe kha vhuimo vhufhio na vhufhio. Vho ḓiimisela u ‘huwelela nga vhuḓalo mafhungo maḓifha.’

18. Paulo o dzula hani a si na mulandu wa malofha a vhathu vhoṱhe, nahone vhahulwane vha Efesa vho vha vha tshi nga mu edzisa hani?

¹⁸ Paulo o vhudza vhahulwane vha Efesa a vha eletshedza uri ene o ṱhogomela hani zwivhidzo. O vha vhudza uri khamusi vha khou mu vhona lwa u fhedza nahone a ri: “A thi na mulandu wa malofha a vhathu vhoṱhe, ngauri ndo ni vhudza zwoṱhe zwine Mudzimu a zwi funa.” Vhahulwane vha Efesa vho vha vha tshi nga edzisa hani Paulo nahone vha dzula vha si na mulandu wa malofha a vhathu vhoṱhe? O amba navho a ri: “Ḓiṱhogomeleni, ni ṱhogomele na sambi ḽoṱhe, ḽe muya mukhethwa wa ni vhea uri ni ḽi ṱhogomele, ni lise tshivhidzo tsha Mudzimu, tshe a tshi renga nga malofha a Murwa wawe.” (Mish. 20:26-28) Paulo o vha vhudza uri tshivhidzo tsho vha tshi tshi ḓo dzhenelwa nga “maṱarelwa” nahone vho vha vha tshi “ḓo shanda ngoho u itela u kunga vhafunziwa uri vha vha tevhele.” Vhahulwane vho vha vho tea u ita mini? Paulo o vha vhudza a ri: “Dzulani no fhaṱuwa, ni humbule uri ndo fhedza miṅwaha miraru ndi tshi ṱuṱuwedza muṅwe na muṅwe waṋu nga zwililo vhusiku na masiari.”​—Mish. 20:29-31.

19. Ndi vhugunei vhufhio he ha vha hone vhufheloni ha ḓana ḽa u thoma ḽa miṅwaha, nahone ha itea mini nga murahu?

¹⁹ “Maṱarelwa” o thoma u vhonala vhufheloni ha ḓana ḽa u thoma ḽa miṅwaha. Nga vho 98 C.E., muapostola Yohane o ri: “Na zwino ho no ḓi vha na vhanzhi vhane vha lwa na Kristo. . . Vho vha vhe vhukati hashu, fhedzi vha ri ṱutshela ngauri vho vha vhe si na vhuthihi na riṋe; arali vho vha vhe na vhuthihi na riṋe, vho vha vha sa ḓo ri ṱutshela.” (1 Yoh. 2:18, 19) Nga ḓana ḽa vhurahu ḽa miṅwaha, vhahulwane vho guneaho vho ḓidzhia vhe tshigwada tsho khetheaho tshi fhiraho vhaṅwe vhathu tshivhidzoni. Nga ḓana ḽa vhuṋa ḽa miṅwaha, Constantine, Muvhusi wa Muroma o tikedza honovhu vhurereli ha mazwifhi nga lwa mulayo. Vhenevho vharangaphanḓa vha vhurereli vho guneaho vho “shanda ngoho.” Vho ṱanganyisa pfunzo dza Bivhili na mikhwa ya vhuhedeni uri i vhonale i tshi nga ndi ya Vhukriste. Dzenedzi pfunzo dzo khakheaho na mikhuvha yo khakheaho, zwi kha ḓi tevhelwa dzikerekeni na ṋamusi.

20, 21. Paulo o sumbedza hani uri u shumela vhahawe nga u ḓiṋekedza, nahone vhahulwane vha Vhakriste vha nga mu edzisa hani ṋamusi?

²⁰ Paulo o vha a sa fani na vhahulwane vhe nga murahu vha shumisa tshivhidzo u itela u ḓivhuyedza. O vha a tshi tou shuma uri a kone u wana zwine a zwi shaya uri a si lemedze tshivhidzo. Paulo o vha a tshi shumela vhahawe nahone a sa lavheleli uri vha mu badele. O ṱuṱuwedza vhahulwane vha Efesa uri vha shumele vhahavho nga u ḓiṋekedza. O vha vhudza uri vha thuse “vha si na nungo. [Vha] songo hangwa zwe Murena Yesu a zwi amba musi a tshi ri: ‘U ṋea zwi a takadza u fhira u ṋewa.’”​—Mish. 20:35.

²¹ Vhahulwane vha Vhakriste ṋamusi vha fana na Paulo nga u shumela vhahavho nga u ḓiṋekedza. A vha fani na vharangaphanḓa vha dzikereke vhane vha ḓipfumisa nga u dzhiela vhathu tshelede. Vha a zwi pfesesa uri Mudzimu o vha fha vhuḓifhinduleli ha u lisa tshivhidzo tshawe nahone vha zwi ita vha sa ṱoḓi u ḓivhuyedza. U ḓikukumusa na vhuhovheleli a zwi ṱoḓei tshivhidzoni tsha Vhukriste ngauri vhane vha “ḓiṱoḓela vhugala” a zwi nga vha nakeli nga u ya ha tshifhinga. (Mir. 25:27) U ḓihudza zwi tevhelwa nga u nyadziwa.​—Mir. 11:2.

22. Ndi ngani vhahulwane vha Efesa vho vha vha tshi funa Paulo?

²² Paulo o vha a tshi funa vhahawe. Ndi ngazwo vho vha vha tshi mu funa. Musi tshifhinga tsha uri a ṱuwe tshi tshi swika, “ha vuwa tshililo tshihulu kha vhoṱhe, vha kuvhatedza Paulo vha mu khisa.” (Mish. 20:37, 38) Vhakriste vha funa vhane vha shumela sambi nga u shumisa tshifhinga tshavho, nungo dzavho na thundu dzavho u fana na Paulo. Musi ro no vhona tsumbo ye Paulo a ri vhetshela yone, zwi tou pfala uri o vha a sa khou kaludza musi a tshi ri: “A thi na mulandu wa malofha a vhathu vhoṱhe.”​—Mish. 20:26.