Vhugudisi ha lwa ṱaḓulu ndi ha ndeme kha Ṱhanzi dza Yehova. Hu na zwikolo zwo khetheaho zwo dzudzanyelwaho vhane vha kumedzela tshoṱhe tshifhinga tshavho kha mushumo wa u huwelela nga ha Muvhuso u itela uri vha ‘khunyeledze vhuḓinḓa havho.’—2 Timotheo 4:5.

Tshikolo tsha Tshumelo ya Vhuvulanḓila: Musi muthu o no fhedza ṅwaha tshumeloni ya vhuvulanḓila ha tshifhinga tshoṱhe, a nga ṅwalisela u ya tshikoloni tsha maḓuvha a rathi tshine tsha farelwa Holoni ya Muvhuso ya tsini na hune a dzula hone. Ndivho yatsho ndi u thusa muvulanḓila uri a sendele tsini na Yehova, a bvelele vhukuma kha masia oṱhe a vhuḓinḓa nahone a bvele phanḓa a tshi shuma nga u fulufhedzea.

Tshikolo tsha Vhahuweleli vha Muvhuso. Hetshi tshikolo tsha miṅwedzi mivhili tsho itelwa u gudisa vhavulanḓila vha re na tshenzhelo vho ḓiimiselaho u bva mahayani avho vha ya u shuma hune vha ṱoḓea hone. Zwi re zwone ndi uri vha ri “Ndi nṋe, nthume,” vha tshi edzisa Muhuweleli muhulwane vhukuma we a shuma kha ḽifhasi, Yesu Kristo. (Yesaya 6:8; Yohane 7:29) U pfulutshela kule na hayani zwi nga ṱoḓa u ḓowelana na matshilele a leluwaho. Mvelele, mutsho na zwiḽiwa zwi nga vha zwo fhambana tshoṱhe na zwe ra zwi ḓowela. Zwi nga kha ḓi ṱoḓea uri muthu a gude luṅwe luambo. Hetshi tshikolo tshi thusa vhahashu vha siho mbinganoni vha tshinnani na vha tshisadzini na vhavhingani, vha re miṅwahani ya 23 na 65, uri vha ṱahulele pfaneleo dza muya dzine vha ḓo dzi ṱoḓa mushumoni wavho na vhukoni vhune ha ḓo ita uri vha kone u shumiswa nga vhuḓalo nga Yehova na ndangulo yawe.

Tshikolo tsha Bivhili tsha Watchtower tsha Gilead. Nga Luheberu ipfi “Gilead” ḽi amba “Vhuṱanzi vhunzhi.” U bva nga 1943 musi hu tshi tikwa tshenetshi tshikolo tsha Gilead, vharumiwa vho gudiswaho vha fhiraho 8 000 vhe vha rumelwa uri vha ṋee vhuṱanzi “u swika magumoni a ḽifhasi” vho bvelela vhukuma. (Mishumo 13:47) Musi vharumiwa vha tshi thoma u swika ngei Peru, ho vha hu si na zwivhidzo kha ḽeneḽo shango. Zwino hu na zwi fhiraho 1 000. Musi vharumiwa vhashu vha tshi thoma u shuma ngei Dzhapani, ho vha hu na Ṱhanzi dzi re fhasi ha fumi. Zwino hu na dzi fhiraho 200 000. Khoso ya miṅwedzi miṱanu Gilead i katela u guda Ipfi ḽa Mudzimu nga vhuḓalo. Vhavulanḓila vho khetheaho kana vharumiwa vha re tsimuni, vha re ofisini dza davhi, kana mushumoni wa ḽiisela vha a rambiwa uri vha ye kha tshenetshi tshikolo, u itela uri vha wane vhugudisi vhune ha ḓo thusa u vha khwaṱhisa kha u ita mushumo wa shango ḽoṱhe.

• Ndi ifhio ndivho ya Tshikolo tsha Tshumelo ya Vhuvulanḓila?

• Tshikolo tsha Vhahuweleli vha Muvhuso tsho itelwa vhafhio?