Yehova o dzula o amba na Hesekiele uri vhathu vhawe vha ḓo humela Shangoni ḽo Fulufhedziswaho nahone vha ḓo dovha vha vha na vhuthihi. Wonoyo mulaedza u dovha wa amba nga ha vhuthihi ha vhathu vha Mudzimu he ha thoma maḓuvhani a vhufhelo.

Yehova o vhudza muporofita Hesekiele uri a ṅwale kha zwitanda zwivhili. Kha tshitanda tshithihi o vha a tshi fanela u ṅwala uri: “Yuda na Vha-Isiraele vho ṱanganaho navho,” nahone kha tshiṅwe o vha tshi fanela u ṅwala uri: “Yosefa, lutanda lwa Efuraimi na lwoṱhe lushaka lwa Isiraele lwo ṱanganaho navho.” Zwenezwo zwitanda zwivhili zwo vha zwi tshi fanela u vha “lutanda luthihi” tshanḓani tsha Hesekiele.—Hesek. 37:15-17.

 “Efuraimi” zwi amba mini? Yerobeamu khosi ya u thoma ya muvhuso wa devhula wa tshaka dza fumi, o vha a tshi bva kha lushaka lwa Efuraimi lwe lwa vha lu lushaka luhulwane. (Doit. 33:13, 17; 1 Dzikh. 11:26) Lwonolu lushaka lwo vha lu tshi bva kha Efuraimi murwa wa Yosefa. (Num. 1:32, 33) Yosefa o vha o fhaṱutshedzwa nga khotsi awe Yakobo nga nḓila yo khetheaho. Nga zwenezwo, zwo vha zwo tea uri tshitanda tshine tsha imela muvhuso wa tshaka dza fumi tshi vhidzwe “lutanda lwa Efuraimi.” Musi Hesekiele a tshi ṅwala vhuporofita ha zwitanda zwivhili, muvhuso wa devhula wa Isiraele wo vha wo no iswa vhuthubwani nga Vhaasuri nga 740 B.C.E. (2 Dzikh. 17:6) Nga zwenezwo, Vhaisiraele vhanzhi vho vha vha tshi wanala Mivhusoni yoṱhe ya Babele, ngauri Muvhuso wa Babele wo vha wo no kunda wa Vhaasuri.

Nga 607 B.C.E., Vhababele vho thuba tshakha mbili dza tshipembe dza Yuda, khamusi na vhe vha sala vha bvaho muvhusoni wa devhula vho iswa vhuthubwani Babele. Khosi dzine dza bva kha lushaka lwa Yuda dzo vha dzo no vhusa dzenedzo tshaka mbili nahone vho-tshifhe vho vha vha tshi dzula Yuda ngauri vho vha vha tshi shuma thembeleni ya Yerusalema. (2 Koron. 11:13, 14; 34:30) Nga zwenezwo, zwo vha zwo tea uri tshaka mbili dza muvhuso dzi imelwe nga tshitanda tsha “Yuda.”

Zwenezwi zwitanda zwivhili zwa lwa pfanyisedzo zwo vha hani tshithu tshithihi? Zwo vha tshithu tshithihi musi Vhaisiraele vhane vha vha tshaka mbili dza tshipembe na dza fumi dza devhula vha tshi humela Yerusalema u yo fhaṱulula thembele nga 537 B.C.E. Ho vha hu si tsheena u fhandekana kha lushaka lwa Isiraele. (Hesek. 37:21, 22) Vhaisiraele vho dovha vha gwadamela Yehova nga vhuthihi. Honohu u pfumedzana ho vha ho dzula ho ambiwa nga muporofita Yesaya na Yeremia.—Yes. 11:12, 13; Yer. 31:1, 6, 31.

Honovhu vhuporofita ho ombedzela ngoho ifhio ya ndeme nga ha vhurabeli ho kunaho? Ndi ngoho: Yehova u ḓo ita uri vhoṱhe vhane vha mu gwadamela vha vhe “lutanda luthihi.” (Hesek. 37:18, 19) Naa honovhu vhuporofita vhu khou ḓadzea tshifhingani tshashu? Ee, vhu khou ḓadzea. Mathomoni, honovhu vhuporofita ho thoma u ḓadzea nga 1919, musi vhathu vha Mudzimu vha tshi dzudzanywa na u vha tshithu tshithihi nga zwiṱuku nga zwiṱuku. Sathane o lingedza u vha fhandekana lwa tshoṱhe, fhedzi zwe vhutoto.

Nga tshenetsho tshifhinga, vhunzhi ha vhathu vhe vha vha tshithu tshithihi vho vha vhe na fulufhelo ḽa u vha dzikhosi na vhotshifhe na Yesu ngei ṱaḓulu. (Nzumb. 20:6) Nga lwa pfanyisedzo, vho vha vha tshi fana na tshitanda tsha Yuda. Naho zwo ralo, nga u ya ha tshifhinga vhathu vhanzhi vhane vha vha na fulufhelo ḽa u tshila kha ḽifhasi vho thoma u tshimbila na Vhayuda vha lwa muya. (Sak. 8:23) Vho vha vha tshi nga tshitanda tsha Efuraimi nahone vho vha vhe si na fulufhelo ḽa u vhusa na Kristo.

Ṋamusi, zwenezwi zwigwada zwoṱhe zwi shumela Yehova nga vhuthihi nga fhasi ha Khosi nthihi ine ya vha Yesu Kristo, ane vhuporofita ha mu vhidza “Davida muḓinḓa wanga.” (Hesek. 37:24, 25) Yesu o rabelela uri vhatevheli vhawe ‘vha vhe vhathihi, samusi na ene e na vhuthihi na Khotsi awe.’ * (Yoh. 17:20, 21) Yesu o dzula o amba uri sambi ḽawe ḽiṱuku ḽa vhaḓodzwa ḽi ḓo vha “sambi ḽithihi” na vha “dziṅwe nngu.” Vhoṱhe vha ḓo vha nga fhasi ha “mulisa muthihi.” (Yoh. 10:16) Maipfi a Yesu a ṱalusa zwavhuḓi vhuthihi vhune vhathu vha Yehova vha vha naho hu sa londwi uri vha na fulufhelo ḽifhio ḽa tshifhingani tshi ḓaho.