Rosie o ri: “Naho ndi na thaidzo ṱhukhu, ndi dzhia yeneyo thaidzo i khulwane vhukuma u fhira nḓila ine ya vha ngayo.” Ndi dzifhio ndimana dza Bivhili dze dza mu thusa? Iṅwe yadzo ndi Mateo 6:34, ine ya ri: “Ni songo vhilaela zwa matshelo, ngauri ḽa matshelo ḽi ḓo vha na mbilaelo dzaḽo. Ḓuvha ḽiṅwe na ḽiṅwe ḽi na mbilaelo dzaḽo.” Rosie o amba uri eneo maipfi a Yesu o mu thusa uri a si tsha vhilaela nga ha zwine zwa nga itea matshelo. O dovha a ri: “Ndi vhilaela nga thaidzo dzine nda vha nadzo, nṱhani ha u vhilaedziswa nga zwithu zwi sa athu u iteaho na zwine zwa sa ḓo vhuya zwa vuwa zwo itea.”

Yasmine na ene o vha a tshi vhilaela nga ho kalulaho. O ri: “Vhukati ha vhege ndo vha ndi tshi lila lwa maḓuvha o vhalaho nahone vhuṅwe vhusiku ndi tshi kundelwa u dzi bonya. Ndo vha ndi tshi dzula ndi tshi khou ḽa mbilu.” Ndi luṅwalo lufhio lwe lwa mu thusa? O amba uri ndi luṅwalo lwa 1 Petro 5:7, lune lwa ri: “[Hwesani Mudzimu] mbilaelo dzaṋu dzoṱhe, ngauri u a ni ṱhogomela.” Yasmine o ri: “Nga u ya ha tshifhinga, ndo rabela Yehova nahone o fhindula thabelo dzanga. Ndo pfa u nga ndo rulwa muhwalo we wa vha u kha mahaḓa anga. Nga zwiṅwe zwifhinga ndi a ita ndi tshi vha na mahumbulele a si avhuḓi, fhedzi zwino ndi a ḓivha nḓila ine nda nga a kunda ngayo.”

Muṅwe musidzana ane a pfi Isabella o ri: “Ndi vhona u nga u sa ita zwithu zwa ndeme nga tshifhinga zwi tou vha malofhani ngauri na khotsi anga vha ita nga u ralo. Ndi litsha u ita zwithu zwa ndeme ndi tshi itela u sokou dzula kana u vhona thelevishini. Zwenezwo zwithu zwi na khombo ngauri zwi tou engedza thaidzo nahone zwi ita uri muthu a si ite mushumo wawe zwavhuḓi.” Luṅwalo lwe lwa mu thusa ndi 2 Timotheo 2:15 lune lwa ri: “Ita zwoṱhe zwi re maanḓani au uri u ḓiṋekedze sa a ṱanganedzeaho phanḓa ha Mudzimu, u mushumi ane a si shoniswe nga zwe a shuma.” Isabella o ri: “A thi ṱoḓi uri Yehova a shoniswe nga mushumo wanga nga nṱhani ha u sa ita zwithu zwa ndeme nga tshifhinga.” O ita tshanduko khulwane.

Nga hu fanaho, Kelsey o ri: “Ndo vha ndi tshi fhiwa mushumo hu kha ḓi vha na tshifhinga, fhedzi ndo vha ndi tshi u ita ho sala tshifhinga tshiṱuku. Ndo vha ndi tshi lila, ndi sa koni u eḓela nahone ndi tshi vhilaela. Zwenezwo zwithu zwo vha zwi si zwavhuḓi.” Kelsey o thuswa nga luṅwalo lwa Mirero 13:16 lune lwa ri: “Muthanyi zwoṱhe u zwi ita é na nḓivho; tsilu ḽi zwala zwa vhuḓabaḓaba.” O amba uri o guda zwi tevhelaho musi o no elekanya nga ha lwonolu luṅwalo: “Ndi vhuṱali u dzudzanya zwithu hu tshe na tshifhinga na u zwi ita. Ndo ḓiitela mbekanyamushumo ya mushumo une nda fanela u u ita nahone ndi dzula ndo i vhea ṱafulani, zwenezwi zwi nthusa u ḓivha zwine nda fanela u zwi ita, uri ndi si ite zwithu ho sala tshifhinga tshiṱuku.”

Kirsten o ri: “Munna wanga o nṱutshela a ntsia na vhana vhashu vhaṋa.” Ndi luṅwalo lufhio lwe lwa mu thusa? O thuswa nga luṅwalo lwa Mirero 17:17 lune lwa ri: “Khonani ndi ṱhama ya maḓuvha oṱhe; ndi mukomana we a mbebelwa ḓuvha ḽa khombo.” Kirsten o ṱoḓa thuso kha vhathu vhane vha shumela Yehova u fana nae. Vho mu thusa hani? O ri: “Khonani dzanga dzo ntikedza nga nḓila nnzhi! Vhaṅwe vho vha vha tshi vhea zwiḽiwa na maluvha muṋangoni wa nnḓu yanga. Luraru lwoṱhe, ho ḓa tshigwada tshiṱuku tsha vhathu u thusa nṋe na vhana vhanga musi ri tshi khou pfulutshela kha iṅwe nnḓu. Muṅwe muthu o nthusa u wana mushumo. Khonani dzanga dzo dzula dzi tshi ntikedza.”

Delphine we a bulwa mathomoni a ino thero na ene o vha e na vhuludu. O amba zwi tevhelaho nga murahu ha u xelelwa nga zwoṱhe zwe a vha e nazwo: “Ndo vha ndi tshi vhona vhaṅwe vhathu vho takala, fhedzi ndi tshi ḓipfa u nga ndo xela. Ndo vha ndi tshi ḓipfa ndi ndoṱhe.” Luṅwalo lwe lwa mu thusa ndi Psalme ya 68:6 lune lwa ri: ‘Mudzimu u wanisa musiiwa haya.’ O ri: “Ndo vha ndi tshi zwi ḓivha uri lwonolu luṅwalo lwo vha lu sa khou amba nga ha haya ha vhukuma. Nṱhani hazwo, ndo kona u pfesesa uri Mudzimu u ri ṋea haya ha pfanyisedzo, fhethu ho tsireledzeaho, hune ha vha na khonani dza vhukuma na vhathu vhane vha funa Yehova. Fhedzi ndo vha ndi tshi zwi ḓivha uri ndi nga si kone u sendela tsini na vhaṅwe ndi sa athu u sendela tsini na Yehova. Nga zwenezwo, luṅwalo lwa Psalme ya 37:4 lwo nthusa uri ndi kone u ita zwenezwo, lu ri: ‘Ḓifhelwa nga Yehova, u ḓo U ṋea zwiné mbilu yau ya humbela zwone.’”

O dovha a ri: “Ndo ṱhogomela uri ndi fanela u vha na vhushaka ho khwaṱhaho na Yehova. Ndi khonani yavhuḓisa. Nga zwenezwo, ndo ita mutevhe wa zwithu zwine nda nga ḓiphina ngazwo ndi na vhaṅwe, u itela uri ndi kone u vhumba vhukonani na vhathu vhane vha funa Yehova. Ndo guda u livhisa ṱhogomelo kha zwithu zwavhuḓi zwine zwa itwa nga vhaṅwe nṱhani ha u sa livhisa ṱhogomelo kha vhushayanungo havho.”

Ndi ngoho uri khonani dza Mudzimu na dzone dzi a khakha. Ṱhanzi dza Yehova na vhone vha a vha na thaidzo u fana na muṅwe na muṅwe. Fhedzi zwine Bivhili ya zwi funza zwi ṱuṱuwedza vhathu uri vha thuse vhaṅwe musi zwi tshi konadzea. Ndi vhuṱali u vha na khonani dzo raloho. Naho zwo ralo, naa zwine Bivhili ya zwi funza zwi nga ni thusa u tandulula thaidzo dzi sa tandululei musalauno, thaidzo dzi ngaho vhulwadze vhu sa fholi na u pfa vhuṱungu?