ALEXANDRA o vha o dzula bisini nahone o lindela u pfuka bodara ine ya vha vhukati ha mashango mavhili a Amerika Tshipembe, musi a tshi pfa nnḓa ha bisi hu tshi ambiwa uri: “Bisi ḽi nga ṱuwa, fhedzi hoyu muṱhannga wa Mutshaina ha yi fhethu!” O tsa u itela u vhona zwe zwa vha zwi tshi khou itea nahone a wana muṱhannga wa Mutshaina a tshi khou lingedza u ṱalutshedza pholisa ḽa bodarani zwe a ṱangana nazwo, fhedzi a tshi khou kundelwa u zwi amba nga Lupania. Samusi Alexandra o vha a tshi ṱanganela tshivhidzoni tsha Ṱhanzi dza Yehova tsha Lutshaina, o amba uri u ḓo thusa u ṱalutshedzela.

Onoyo muṱhannga o amba uri u na mabammbiri ane a mu tendela u dzula kha ḽeneḽo shango, fhedzi zwigevhenga zwo mu dzhiela eneo mabammbiri na tshelede. Mathomoni, ḽeneḽo pholisa a ḽo ngo tenda zwe a vha a tshi khou zwi amba nahone ḽo humbulela uri Alexandra u kha vhugevhenga ha u tswa vhathu a tshi vha isa kha maṅwe mashango. Mafheleloni, pholisa ḽo tenda, fhedzi onoyo muṱhannga o vha a tshi fanela u lifha tshelede ya u sa vha na mabammbiri o teaho. Samusi o vha e si na tshelede, Alexandra o mu ṋea $20. Onoyo muṱhannga o mu livhuha zwihulu nahone a amba uri u ḓo mu lifhela tshelede i fhiraho $20. Alexandra o amba uri ha khou ṱoḓa u lifhelwa; fhedzi o takalela u mu thusa ngauri o vhona zwo tea. O ṋea onoyo muṱhannga khandiso dza Bivhili nahone a mu ṱuṱuwedza uri a gude Bivhili na Ṱhanzi dza Yehova.

Zwi a takadza u pfa nga ha vhatsinda vha tshi thusana nahone a zwi timatimisi uri vhathu vha vhurereli ho fhamba-fhambanaho na vhathu vha siho kha vhurereli vha a kona u ita zwi fanaho. Naa na inwi no vha ni tshi ḓo ita zwi fanaho? Yeneyo mbudziso i a nyanyula ngauri Yesu o ri: “U ṋea zwi ḓisa dakalo ḽihulu u fhira u ṋewa.” (Mishumo 20:35) Zwiṅwe hafhu, vhaṱoḓisisi vho wana uri u ṋea zwi a vhuyedza. Kha ri vhone uri nga nḓila-ḓe.

Zwe vhathu vha zwi tshenzhela zwi sumbedza uri u ṋea na dakalo zwi a tshimbidzana. Muapostola Paulo o ṅwala uri “Mudzimu u funa ane a ṋea o takala.” O vha a tshi khou amba nga ha Vhakriste vhe vha ṋeela u itela u thusa vhatendi ngavho. (2 Vhakorinta 8:4; 9:7) Paulo o vha a si khou amba uri vho ṋea nga nṱhani ha uri vho vha vho takala. Zwenezwo zwo vha zwi ngoho ngauri vho takala nge vha kona u ṋea.

Vhukuma, iṅwe ngudo yo amba uri u ṋea “zwi ita uri vhuluvhi vhu shume zwavhuḓi zwi tshi itiswa nga u dzula wo takala, u ḓowelana na vhathu na u fulufhela vhaṅwe nahone zwenezwo zwi ita uri u dzule u na mavhonele avhuḓi.” Iṅwe ngudo yo wana uri “u ṋea muṅwe tshelede zwi ita uri muṋei a takale u fhira musi o i shumisa kha ene muṋe.”

Naa no no vhuya na vhona u nga a ni nga koni u ita zwo engedzeaho nga nṱhani ha vhuimo haṋu? Ngoho ndi ya uri muṅwe na muṅwe a nga kona u ḓiphina nga u “ṋea o takala.” Musi ni tshi ṋea ni na zwiṱuṱuwedzi zwo teaho, a si khombe-khombe uri tshifhiwa tshi vhe tshihulwane. Muṅwe wa Ṱhanzi dza Yehova o rumela mulaedza u tevhelaho kha vhagandisi vha wonoyu magazini u katela na muṋeelo, a ri: “Ndi na miṅwaha  minzhi ndi sa koni u ṋeela zwinzhi fhedzi ndi tshi ṋeela zwiṱukuṱuku Holoni ya Muvhuso.” O dovha a ri: “Yehova Mudzimu o nṋea zwinzhi u fhira zwe nda ṋeela. . . . Ndi livhuwa vhukuma nge na ita uri zwi konadzee uri ndi kone u ṋeela nga tshenetshi tshifhiwa—zwi a nkhuthadza.”

Muthu ha ṋei tshelede fhedzi. Hu na zwithu zwinzhi zwine a nga zwi ṋea.

Bivhili i ri: “Munna wa vhuthu ndi mu-ḓi-tondi; wa vhuhali u a ḓi-huvhadza.” (Mirero 11:17) Vhathu vha re na vhuthu vha na mafunda, vho ḓiimisela u ḓidzima zwiṅwe zwithu—tshifhinga tshavho, nungo, u ṱhogomela vhaṅwe na zwiṅwe-vho. Zwenezwi zwithu zwi a vha vhuyedza nga nḓila nnzhi nahone eneo mafunda ndi dzilafho khavho.

Vhaṱoḓisisi vho wana uri vhane vha thusa vhaṅwe nga u ḓifunela a vha na thaidzo nnzhi dza mutakalo nahone a vha dzuli vho tsikeledzea. Zwi re zwone ndi uri vha na mutakalo wavhuḓi. U vha na mafunda zwi dovha zwa thusa vhathu vhane vha vha na malwadze a sa lafhei a ngaho multiple sclerosis kana HIV uri vha vhe khwine. Vho dovha vha wana uri musi vhathu vhe vha vha vhe zwidakwa vha tshi thusa vhaṅwe uri vha si tsha tsikeledzea, zwi nga vha thusa uri vha si tsha dovha vha nwesa.

Vho dovha vha ṋea nyeletshedzo ine ya ri: “U pfela vhuṱungu, u vha na mafunda na u vha na vhuthu zwi ita uri muthu a si tsha vha na maḓipfele a si avhuḓi.” U ṋea zwi nga dovha zwa fhungudza mutsiko na mutsiko wa malofha. Nahone vho felwaho nga vhafarisi vha a ṱavhanya u ḓipfa vhe khwine musi vha tshi tikedza vhaṅwe.

Zwenezwi zwithu ndi ngoho. U ṋea ndi dzilafho kha inwi.

Yesu o ṱuṱuwedza vhatevheli vhawe a ri: “Ḓiḓowedzeni u ṋea, nahone vhathu vha ḓo ni ṋea. Vha ḓo ni shelela kha tshiambaro muelo wo ḓalaho, wo gadelwaho wo khusiwaho, wo itaho muṱumba. Ngauri muelo une na ela ngawo, na inwi vha ḓo ni elela ngawo.” (Luka 6:38) Musi ni tshi ṋea, kanzhi vhathu vhane na vha ṋea vha livhuha mafunda aṋu nahone na vhone vha vha na mafunda. U ṋea zwi ita uri hu vhe na vhuthihi na vhukonani.

Vhaṱoḓisisi vhane vha guda nga ha vhushaka ha vhathu vho ṱhogomela uri “vhathu vhane vha dzula vha tshi sumbedza mafunda vha ṱuṱuwedza na vhaṅwe uri vha ite nga u ralo.” Vho dovha vha ri: “U vhala nga ha nḓila ya u sumbedza vhuthu zwi ita uri vhathu vha vhe na mafunda nga ho engedzeaho.” Nga zwenezwo, vhaṅwe vhaṱoḓisisi vho amba uri, “muthu muthihi a nga ṱuṱuwedza vhathu vhanzhi, a nga ṱuṱuwedza na vhathu vhane a si vha ḓivhe na vhane a sa athu u ṱangana navho.” Nga maṅwe maipfi, muthu muthihi ane a vha na mafunda a nga ṱuṱuwedza vhathu vhanzhi hune a dzula hone. Naa ni nga takalela u dzula fhethu ho raloho? Arali vhathu vhanzhi vha ḓiḓowedza u ṋea, vha nga vhuyelwa vhukuma.

Zwenezwi zwo no vhuya zwa itea ngei Florida kha ḽa U.S.A. Tshigwada tsha Ṱhanzi dza Yehova  tsho ṱanganela nga u ḓifunela kha mushumo wa u thusa musi ho vha na ḓumbumazwikule. Musi vho lindela zwishumiswa zwa u lugisa nnḓu ye vha vha vha tshi khou shuma khayo, vho ṱhogomela uri ḓiraṱa ya muṅwe muhura yo vha yo tshinyala nahone vha i lugisa. Nga murahu onoyo muhura o ṅwalela ofisi khulwane ya davhi ya Ṱhanzi dza Yehova a ri: “Ndi a livhuwa vhukuma. Kha vhathu vhanzhi vho lugaho vhe nda vhuya nda ṱangana navho, havha vha bva phanḓa.” Mafunda o mu sudzulusela uri a rumele muṋeelo u itela uri u shumiswe kha zwine a zwi vhidza mushumo muhulwane vhukuma wa Dziṱhanzi.

Vhorasaintsi vho ita ṱhoḓisiso i swayeaho vhukuma ya uri, “hu na zwine zwa ṱuṱuwedza muthu uri a thuse vhaṅwe.” Vho dovha vha amba uri vhana, “vha sumbedza mafunda naho vha sa athu u kona u amba.” Ndi ngani? Bivhili i ri ṋea phindulo musi i tshi amba uri Mudzimu o sika vhathu nga u “ḓi-fanyisa,” zwine zwa amba uri vha na pfaneleo dzi fanaho na dza Mudzimu.—Genesi 1:27.

Kha pfaneleo dzoṱhe dzavhuḓi dza Musiki washu Yehova Mudzimu, ndi mafunda. O ri ṋea vhutshilo na zwithu zwoṱhe zwine ra zwi shaya u itela uri ri takale. (Mishumo 14:17; 17:26-28) Ri nga kona u ḓivha nga ha Khotsi ashu wa ṱaḓulu na ndivho yawe, nga u guda Ipfi ḽawe ḽine ḽa vha Bivhili. Bivhili i dovha ya sumbedza uri Mudzimu o ita ndugiselelo ya uri ri takale tshifhingani tshi ḓaho. * (1 Yohane 4:9, 10) Samusi Yehova Mudzimu e tshisima tsha mafunda nahone no itwa nga tshifanyiso tshawe, a zwo ngo fanela u ni mangadza uri u edzisa Mudzimu ndi zwithu zwavhuḓi nahone zwi ita uri a ni takalele.—Vhaheberu 13:16.

Naa ni kha ḓi humbula Alexandra we ha ambiwa nga hae mathomoni a ino thero? Ho itea mini nga murahu? Naho muthu we a vha o namela nae bisini o amba uri u khou tambisa tshelede, onoyo muṱhannga we a thuswa o rwela luṱingo khonani dzawe dzine dza dzula ḓoroboni ine bisi ya anzela u ima hone nahone musi vha tshi swika o mu lifhela $20 ye a hadzimiwa yone. Zwiṅwe hafhu, onoyo muṱhannga o dzhia nyeletshedzo ya Alexandra nahone a thoma u guda Bivhili. O vha o takala vhukuma musi a tshi ṱangana nae nga murahu ha miṅwedzi miraru buthanoni ḽa Lutshani ḽa Ṱhanzi dza Yehova ngei Peru. Muṱhannga we a thuswa nga Alexandra o mu ramba resiturente yawe u katela na vhe Alexandra a ḓa navho buthanoni u itela u mu sumbedza nḓila ine a mu livhuha ngayo kha zwe a mu itela zwone.

U ṋea na u thusa vhaṅwe zwi ita uri ri takale. Zwiṅwe hafhu, ni nga thusa vhathu uri vha vhe na vhushaka havhuḓi na Muṋei wa zwifhiwa zwoṱhe zwavhuḓi—Yehova Mudzimu! (Yakobo 1:17) Naa ni khou ḓiphina nga mbuyelo dza u ṋea?