Naa no no vhuya na lwala lwa tshifhinganyana? Khamusi no fhola nga u ṱavhanya nahone no no hangwa nga ha zwe zwa itea. Fhedzi vhuṱungu ha u felwa a vhu fani na zwenezwo. Dr. Alan Wolfelt o ṅwala kha bugu yawe Healing a Spouse’s Grieving Heart uri: “A hu na muthu ane a nga kona u ‘kunda vhuṱungu’ ha u felwa.” Naho zwo ralo, o dovha a ri: “Nga u ya ha tshifhinga na u wana thikhedzo kha vhaṅwe, vhuṱungu vhu a vha khwine.”

Sa tsumbo, ṱhogomelani nḓila ye musimulalushaka Abrahamu a aravha ngayo musi mufumakadzi wawe a tshi fa. Bivhili i ri “Abrahamu a ḓa a mu ṱungufhalela a mu lilela.” Maipfi ane a ri “a ḓa” a sumbedza uri zwo mu dzhiela tshifhinga uri a kone u sedzana na u felwa. * Iṅwe tsumbo ndi ya Yakobo, we a fhurwa uri a tende uri murwa wawe Yosefa o vhulahwa nga ḽivhanda. O “fhedza tshifhinga,” a tshi khou lila nahone muṱa wawe wo vha u sa koni u mu khuthadza. Nga murahu ha miṅwaha minzhi, o vha a tshi kha ḓi humbula lufu lwa Yosefa.—Genesi 23:2; 37:34, 35; 42:36; 45:28.

Zwo tou ralo na ṋamusi kha vhathu vhanzhi vhane vha lilela u felwa nga muthu wa tsini. Ṱhogomelani tsumbo mbili dzi tevhelaho.

• “Munna wanga Robert o fa nga ḽa 9 July, 2008. Vhuṱungu he nda vhu pfa musi a tshi fa kha khombo ya goloi ndi kha ḓi vhu pfa na ṋamusi. Tshifhinga tshoṱhe musi a tshi ya mushumoni, musi ro no ḽa zwiḽiwa zwa nga matsheloni o vha a tshi nkhisa, u nkuvhatedza nahone ri tshi vhudzana uri ‘Ndi a ni funa.’ Nga murahu ha miṅwaha ya rathi, ndo vha ndi kha ḓipfa vhuṱungu vhu fanaho. A thi vhoni ndi tshi ḓo vhuya nda hangwa vhuṱungu ha u felwa nga Rob.”—Gail, a re na miṅwaha ya 60.

• “Naho ho fhela miṅwaha i fhiraho 18 ndo felwa nga mufumakadzi wanga, ndi kha ḓi mu ṱuvha na u mu lilela. Tshifhinga tshoṱhe musi ndi tshi vhona zwithu zwavhuḓi kha mupo, ndi a mu humbula nahone ndi humbula nḓila ye a vha a tshi ḓo ḓiphina ngayo nga u vhona zwine nda khou zwi vhona.”—Etienne, a re na miṅwaha ya 84.

Vhukuma, ndi zwa nzulele u pfa vhuṱungu ho raloho na u ḓipfa nga yeneyo nḓila lwa tshifhinga tshilapfu. Muṅwe na muṅwe u lila nga nḓila yawe nahone zwi ḓo vha zwi si vhuṱali u haṱula muthu nga nḓila ine a aravha ngayo musi o sedzana na makhaulambilu. Nga zwenezwo, ri fanela u iledza u ḓivhona mulandu arali nḓila ine ra aravha ngayo i tshi vhonala u nga yo kalula. Ri nga sedzana hani na u felwa?