Humbulani nga ha vhushaka ha tsini-tsini vhune ha vha hone vhukati ha malwelavanḓa. Vha tou vha vhurukhu na bannda. Nancy Segal mulanguli wa Twin Studies Center, ane a vha na ḽilwelavanḓa o amba uri maṅwe malwelavanḓa a kona u davhidzana zwavhuḓi na u pfesesana nga hu leluwaho. Musi muṅwe mufumakadzi a tshi ṱalusa vhushaka vhune a vha naho na ḽilwelavanḓa ḽawe, o ri: “U ḓivha zwoṱhe nga ha nṋe, na nṋe ndi ḓivha zwoṱhe nga hae.”

Ndi mini zwine zwa ita uri vha vhe nga yeneyo nḓila? Vhaṅwe vhagudi vha humbulela uri ndi nga nṱhani ha uri vho alutshela fhethu huthihi nahone vho aluswa nga nḓila i fanaho. Fhedzi zwihuluhulu ndi nga nṱhani ha uri tsiki dzavho dzi a fana.

ṰHOGOMELANI HEZWI: Zwi tou vha khagala uri we a ri sika u ri ḓivha khwine u fhira vhathu vhoṱhe. Mupsalme Davida o amba uri: “Wo ndzudzanya ndi sathu u bebwa. Marambo anga wo a vhona zwiḽa ndi kha ḓi sikiwa ndó dzumbiwa. . . . Maṱo au o zwi vhona ndi kha ḓi vhumbea; buguni yau ho vha hó no ṅwalwa zwoṱhe.” (Psalme ya 139:13, 15, 16) Mudzimu ndi ene a eṱhe ane a ḓivha tsiki dzine ra vha nadzo na u dzi pfesesa na zwithu zwine ra sedzana nazwo vhutshiloni. Nḓila ine Mudzimu a ri ḓivha ngayo na nḓila ye tsiki dza mivhili yashu dza sikwa ngayo, zwi ri khwaṱhisedza uri u ḓivha zwidodombedzwa zwoṱhe.

Davida o rabela a ri: “Yehova, U a nṱalukanya, U a nḓivha. U dzula hanga na u vuwa hanga U a zwi ḓivha; zwa mbiluni yanga U zwi vhona Ú kule. Ngauri a huna fhungo kha lulimi lwanga, ḽiné Iwe Yehova U si ḽi ḓivhe ḽoṱhe.” (Psalme ya 139:1, 2, 4) Zwiṅwe hafhu, Yehova u a ḓivha nḓila ine ra ḓipfa ngayo nahone “u lavhelesa mbilu dzoṱhe.” (1 Koronika 28:9; 1 Samuele 16:6, 7) Dzino ndimana dzi dzumbulula mini nga ha Mudzimu?

Naho ri si nga si kone u amba zwithu zwoṱhe zwine ra zwi humbula na nḓila ine ra ḓipfa ngayo musi ri tshi rabela, Musiki washu ha ṱhogomeli zwine ra zwi ita fhedzi, fhedzi u dovha a pfesesa uri ndi ngani ri tshi khou zwi ita. U a pfesesa zwithu zwavhuḓi zwine ra nga takalela u zwi ita, naho ri si nga si kone u zwi ita. Nga nṱhani ha uri Mudzimu o ri sika ri na lufuno, o ḓiimisela u sedza na u pfesesa zwine ra zwi humbula na uri ndi ngani ri tshi ita zwine ra zwi ita.—1 Yohane 4:7-10.

 Bivhili i ri khwaṱhisedza uri

• “Maṱo a Yehova o lavhelesa vho lugaho, na nḓevhe dzawe dzi thetshelesa zwine vha humbela.”—1 PETRO 3:12.

• Mudzimu uri fulufhedzisa uri: “Ndi ḓo U funza nda U sumbedza nḓila iné wa pfi U i fare; ndi ḓo U dededza nga maṱo anga.”—PSALME ya 32:8.

Naa u ḓivha uri Mudzimu u a pfesesa vhuimo hashu na nḓila ine ra ḓipfa ngayo, zwi nga ri thusa u konḓelela vhuimo vhu konḓaho? Ṱhogomelani zwe zwa itea kha Anna wa ngei Nigeria. O ri: “Nga nṱhani ha uri ndo vha ndo hanganea, ndo ḓivhudzisa uri ndi khou tshilela mini. Sa izwi ndo vha ndi tshilikadzi ndo vha ndi tshi khou ṱhogomela ṅwananyana wanga we a vha e sibadela nga nṱhani ha u farwa nga vhulwadze ha hydrocephalus (u vha na luḓi lunzhi vhuluvhini), nṋe ndo vha ndo farwa nga khentsara ya ḓamu nahone ndo vha ndi tshi tea u itiwa muaro, chemotherapy na radiotherapy. Zwo nkonḓela vhukuma u vha sibadela nga tshifhinga tshithihi na ṅwananyana wanga.”

Anna o thuswa nga mini uri a kone u konḓelela? O ri: “Ndo elekanya nga luṅwalo lwa Vhafilipi 4:6, 7 lune lwa amba uri ‘mulalo wa Mudzimu une wa fhira u ṱalukanya hoṱhe u ḓo tsireledza mbilu dzaṋu na maanḓa aṋu a muhumbulo.’ Musi ndi tshi humbula nga ha lwonolwo luṅwalo ndi ḓipfa ndi tsini na Yehova ndi tshi ḓivha uri u nḓivha khwine u fhira nḓila ine nda ḓi ḓivha ngayo. Vhahashu vho nṱuṱuwedza vhukuma.

“Naho ndi tshi kha ḓivha na mutakalo u si wavhuḓi, fhedzi vhuimo hanga na ha ṅwananyana wanga vhu khwine. Nga nṱhani ha uri ri khou tikedzwa nga Yehova, ro guda uri ri humbule nga ha zwithu zwavhuḓi fhedzi musi ro sedzana na khaedu. Yakobo 5:11 i ri khwaṱhisedza uri: ‘Vha a takala vhe vha konḓelela. No pfa nga ha u konḓelela ha Yobo na u vhona mvelelo ye Yehova a ita uri i vhe hone, uri Yehova u na lufuno luhulu na khathutshelo.’” Yehova o pfesesa vhuimo he Yobo a vha e khaho nahone ri nga vha na vhungoho ha uri u a pfesesa vhuimo vhuṅwe na vhuṅwe vhu konḓaho vhune ra nga sedzana naho.