Mudzimu o ita uri vhathu vha kone u amba nae nga thabelo na uri vha mu vhudze nḓila ine vha ḓipfa ngayo. Muporofita Davida o rabela a ri: “Iwe Mupfi wa thabelo, vhathu vha mifuda yoṱhe vha ḓo ḓa kha iwe.” (Phisalema 65:2) Ri tea u rabela hani uri Mudzimu a ri pfe na u ri fhaṱutshedza?

Musi ni tshi rabela, ni nga vhudza Mudzimu nḓila ine na khou ḓipfa ngayo, na u mu shululela zwi re mbiluni yaṋu. (Phisalema 62:8) Mudzimu Ramaanḓaoṱhe u a zwi funa musi ri tshi rabela nga mbilu yashu yoṱhe.

Naho Mudzimu e na madzina zwao manzhi, u na dzina ḽithihi. Mudzimu o ri: “Ndi nṋe Yehova. Ndi ḽone dzina ḽanga.” (Yesaya 42:8) Dzina ḽa Yehova ḽi bvelela lu ṱoḓaho u vha 7 000 kha Maṅwalo Makhethwa. Vhaporofita vhanzhi vho vhidza Mudzimu nga dzina ḽawe. Abrahamu o ri: “Yehova ndi khou humbela uri u . . . nnditshe ndi ambe.” (Genesi 18:30) Na riṋe ri tea u shumisa dzina ḽa Mudzimu, Yehova, musi ri tshi rabela.

Mudzimu u ḓo pfesesa zwine ra khou humbula na nḓila ine ra khou ḓipfa ngayo hu sa londwi luambo lune ra khou amba nae ngalwo. Ipfi ḽawe ḽi ri vhudza u ri: “Mudzimu ha ṱaluli, kha tshaka dzoṱhe ane a mu ofha, a ita zwo lugaho u a mu ṱanganedza.”—Mishumo 10:34, 35.

Fhedzi u itela uri ri fhaṱutshedzwe nga Mudzimu, ri tea u ita zwo engedzeaho u fhira u rabela. Kha zwipiḓa zwi tevhelaho, ri ḓo amba nga ha zwine ra tea u zwi ita.