Pfelani Vhuṱungu “Vhathu Vha Mifuda Yoṱhe”
MUSI Yesu a tshi funza vhafunziwa vhawe nḓila ine vha fanela u huwelela ngayo mafhungo maḓifha, o vha vhudza uri a si vhathu vhoṱhe vhane vha ḓo ṱanganedza mulaedza wa Muvhuso. (Luka 10:3, 5, 6) Musi ri tshi khou huwelela, vhathu vhane ra huwelela khavho vha nga ri halifhela kana vha ri fara nga nḓila i si yavhuḓi. Zwenezwo zwithu zwi nga ita uri zwi ri konḓele u dzula ri tshi pfela vhuṱungu vhenevho vhathu vhane ra huwelela khavho.
Muthu ane a pfela vhuṱungu u a vhona zwine vhaṅwe vha zwi shaya na thaidzo dzine vha vha nadzo. U a vha pfela vhuṱungu nahone u a ṱoḓa u vha thusa. Fhedzi arali ra si tsha pfela vhuṱungu vhane ra huwelela khavho, zwi nga ita uri ri si tsha fhisetshela vhuḓinḓa hashu na u huwelela nga nḓila i bvelelaho. Kha ḽiṅwe sia, musi ri tshi pfela vhaṅwe vhuṱungu zwi vha zwi tshi tou nga ri khou khuṱhedza mulilo. Zwenezwo zwi ita uri ri dzule ri tshi fhisetshela vhuḓinḓa!—1 Vhathes. 5:19.
Ri nga pfela hani vhuṱungu naho zwi tshi konḓa u ita nga u ralo? Kha ri haseledze nga ha tsumbo tharu dzine ra nga dzi edzisa—Yehova, Yesu na muapostola Paulo.
EDZISANI NḒILA INE YEHOVA A PFELA NGAYO VHUṰUNGU
Lwa miṅwaha minzhi, Yehova o konḓelela musi dzina ḽawe ḽi tshi ḓodzwa matope. Fhedzi u dzula a tshi sumbedza “vhulenda kha vha sa livhuhi na vhavhi.” (Luka 6:35) Vhulenda hawe vhu vhonala nga u sa fhela hawe mbilu. Yehova u ṱoḓa uri “vhathu vha mifuda yoṱhe” vha tshidzwe. (1 Tim. 2:3, 4) Naho Mudzimu a tshi vhenga vhuvhi, u dzhia vhathu vhe vha ndeme nahone ha ṱoḓi na muthu na muthihi a tshi fheliswa.—2 Pet. 3:9.
Yehova u a pfesesa nḓila ye Sathane a swingisa ngayo vha sa tendiho. (2 Vhakor. 4:3, 4) Vhathu vhanzhi vho funzwa mazwifhi u bva vhuṱukuni nahone zwenezwo zwi ita uri zwi vha konḓele u ṱanganedza ngoho. Yehova o ḓiimisela u thusa vhenevho vhathu. Ri zwi ḓivha hani?
Ṱhogomelani nḓila ye Yehova a vha a tshi dzhia ngayo vhathu vha Ninive vha tshifhingani tsha kale. Hu sa londwi zwithu zwivhi zwe vha vha vha tshi ita, Yehova o vhudza Yona a ri: “Nṋe zwino ndi nga litsha hani u pfela Ninive vhuṱungu, muḓi muhulu, une khawo’ ha dzula vhathu vha na maḓana a fumi na mavhili a tshi vhalwa ka-ḓana, a vhuya a paḓa, a vhathu vhane vha sathu u ḓivha tsha u ḽa na tsha monde, na zwifuwo zwinzhi!” (Yona 4:11) Yehova o vha a tshi zwi ḓivha uri vhathu vha Ninive a vha ḓivhi ngoho nga hae. Nga zwenezwo, o ruma Yona uri a ye u vha tsivhudza nga ha zwine zwa ḓo itea.
U fana na Yehova, ri dzhia vhathu vhe vha ndeme. Ri nga mu edzisa nga u lingedza u thusa vhathu vhoṱhe vhane vha nga thetshelesa naho vha tshi vhonala u nga vha nga si thetshelese.
EDZISANI NḒILA YE YESU A PFELA NGAYO VHUṰUNGU
U fana na Khotsi awe, Yesu o pfela vhuṱungu vhathu vhe vha vha vha tshi ṱoḓa u ḓivha ngoho nga ha Mudzimu. Bivhili i ri: “Musi a tshi vhona gogo a ḽi pfela vhuṱungu, ngauri ḽo vha ḽo vhaisala na u kulea nungo sa nngu dzi si na mulisa.” (Mat. 9:36) Yesu o vha a songo livhisa ṱhogomelo kha mbonalo ya vhathu; o ṱhogomela uri vhe vha vha vho ḓa u mu thetshelesa vho vha vho funzwa mazwifhi nahone vho vha vha sa farwi zwavhuḓi nga vharangaphanḓa vha vhurereli. Naho Yesu o vha a tshi zwi ḓivha uri vhathu vhanzhi vha ḓo thithiswa nga zwithu zwinzhi uri vha si ṱanganedze mulaedza, o bvela phanḓa a tshi vha “funza zwithu zwinzhi.”—Marko 4:1-9.
Ni songo sinyuwa arali vhathu vha sa ṱanganedzi mulaedza nga lwa u tou thoma
Vhuimo vhu a shanduka samusi na muthu a tshi nga shandula mavhonele awe nga ha mulaedza washu
Musi vhathu vha sa takaleli mulaedza washu, a ro ngo fanela u livhisa ṱhogomelo kha nḓila ine vha khou fhindula ngayo. Ri fanela u ḓivhudzisa nga ha zwine zwa ita uri vha fhindule nga yeneyo nḓila. Vhaṅwe vha nga vha vhe na mavhonele a si avhuḓi nga ha Vhakriste kana nga ha Bivhili. Vha nga vha vha tshi itiswa zwenezwo nga nṱhani ha tsumbo dzi si dzavhuḓi dza vhathu vhane vha amba uri vha Vhakriste. Khamusi vhaṅwe vho vhudzwa mazwifhi nga ha zwine ra zwi tenda. Fhedzi vhaṅwe vha ofha uri arali vha ṱanganedza mulaedza washu vha ḓo kolelwa nga vhathu vhane vha dzula henefho kana nga miraḓo ya muṱa wavho.
Vhaṅwe vhane ra ṱangana navho vhuḓinḓani vha nga vha vha sa ṱanganedzi mulaedza washu nga nṱhani ha uri vho sedzana na makhaulambilu e a ita uri vha tsikeledzee. Muṅwe murumiwa ane a pfi Kim o ri: “Huṅwe ha fhethu hune ra huwelela hone, ho vha na nndwa lwe zwa sia vhathu vhanzhi vho xelelwa nga thundu dzavho dzoṱhe. A vha na fulufhelo ḽa vhumatshelo. Vho sinyuwa nahone vho fhulufhuwa. Tshifhinga tshoṱhe, musi ri tshi huwelela henefho ri ṱangana na vhathu vha sa takaleli mulaedza washu. Kha tshiṅwe tshiitea musi ndi tshi khou huwelela, ndo ṱangana na zwi konḓaho.”
Kim u dzula hani a tshi pfela vhathu vhuṱungu hu sa londwi u sa farwa zwavhuḓi? O ri: “Musi ndi tshi farwa nga nḓila i si yavhuḓi, ndi dzula ndi tshi humbula nga ha luṅwalo lwa Mirero 19:11, lune lwa ri: ‘Wa vhuṱali ha ṱavhanyi u sinyuwa.’ U humbula nga ha zwithu zwe vhathu vhane ra huwelela khavho vha ṱangana nazwo tshifhingani tsho fhiraho, zwi nthusa uri ndi vha pfele vhuṱungu. Kha vhathu vhane ra ṱangana navho, a si vhathu vhoṱhe vha sa ṱanganedzi mulaedza. Henefho fhethu hune ra huwelela hone, hu na vhathu vhane ra guda navho.”
Ri nga ḓivhudzisa uri, ‘Naa ndo vha ndi tshi ḓo ṱanganedza mulaedza wa Muvhuso arali ndo vha ndi kha vhuimo vhu fanaho na ha vhathu vhane ra huwelela khavho?’ Sa tsumbo, hu pfi mini arali ro vhudzwa mazwifhi lunzhi-lunzhi nga ha Ṱhanzi dza Yehova? Arali na riṋe ro vha ri kha honovhu vhuimo, khamusi ro vha ri sa ḓo ṱanganedza mulaedza nahone ro vha ri tshi ḓo ṱoḓa u pfelwa vhuṱungu. Musi ri tshi humbula nga ha ndaela ya Yesu ya uri ri fare vhaṅwe nga nḓila ine ra ṱoḓa vha tshi ri fara ngayo, zwi ḓo ita uri ri pfele vhaṅwe vhuṱungu naho zwi tshi konḓa u ita nga u ralo.—Mat. 7:12.
EDZISANI NḒILA YE PAULO A PFELA NGAYO VHUṰUNGU
Muapostola Paulo o pfela vhuṱungu na vhathu vhe vha vha vha tshi mu hanedza. Ndi ngani? Ho ngo hangwa zwe a vha a tshi zwi ita tshifhingani tsho fhiraho. O ri: “Ndo vha ndi tshi semana ndi mutovholi nahone ndi na vhuhali. Naho zwo ralo, ndo khathutshelwa, ngauri ndo zwi ita nga u sa ḓivha na u sa vha na lutendo.” (1 Tim. 1:13) O ṱhogomela uri Yehova na Yesu vho mu khathutshela. Zwi vhonala uri o vha a tshi vhona vhaṅwe vhathu vhe a vha a tshi huwelela khavho vha tshi ḓifara nga nḓila ye a vha a tshi ḓifara ngayo tshifhingani tsho fhiraho.
Nga zwiṅwe zwifhinga, Paulo o vha a tshi huwelela kha vhathu vhe vha vha vho mbwandamela tshoṱhe kha vhurereli ha mazwifhi. O ita mini? Mishumo 17:16 i amba uri musi a ngei Athene, o “dinalea musi a tshi vhona uri muḓi wonoyo wo ḓala nga midzimu ya zwifanyiso.” Naho zwo ralo, u dinalea hawe zwo ita uri a ṱanziele nga nḓila yavhuḓi. (Mish. 17:22, 23) Musi a tshi huwelela, o huwelela nga nḓila dzo fhamba-fhambanaho zwi tshi ya nga vhuimo ha vhathu. Zwenezwo zwo ita uri a “tshidze vhaṅwe nga hune zwa nga konadzea ngaho.”—1 Vhakor. 9:20-23.
Ri nga edzisa Paulo nga u pfesesa mavhonele a si avhuḓi ane vhathu vha vha nao kana mazwifhi ane vha a tenda nahone nga murahu ra shumisa vhuṱali u itela u “ḓisa-fhungo-ḽa-vhuḓi.” (Yes. 52:7) Muṅwe wahashu wa tshifumakadzini ane a pfi Dorothy, o ri: “Hune ra huwelela hone, vhathu vhanzhi vho funzwa uri Mudzimu u na tshiṱuhu nahone u haṱula nga nḓila i si yavhuḓi. Ndi a khoḓa vhenevho vhathu nga u vha havho na lutendo lwo khwaṱhaho kha Mudzimu nahone nga murahu nda vha sumbedza zwine Bivhili ya zwi amba nga ha nḓila ine Mudzimu a ri funa ngayo na zwe a fulufhedzisa uri u ḓo zwi ita tshifhingani tshi ḓaho.”
“DZULANI NI TSHI KUNDA VHUVHI NGA ZWIVHUYA”
Samusi ri tshi khou tshila “maḓuvhani a vhufhelo,” ri nga lavhelela uri vhaṅwe vhathu vhane ra huwelela khavho “vha ḓo tou ṋaṋa u ita vhuvhi.” (2 Tim. 3:1, 13) Fhedzi a ro ngo fanela u tendela zwenezwo zwithu zwivhi zwi tshi ita uri ri si tsha pfela vhathu vhuṱungu kana u ita uri ri si tsha takala. Yehova a nga ri thusa uri ri ‘dzule ri tshi kunda vhuvhi nga zwivhuya.’ (Vharoma 12:21) Muṅwe muvulanḓila ane a pfi Jessica, o ri: “Kanzhi ndi ṱangana na vhathu vha sa ḓiṱukufhadzi, vhane vha ri dzhiela fhasi na u nyadza mulaedza washu. Zwenezwo zwi nga ita uri ri dinalee. Musi ndi tshi thoma nyambedzano, ndi rabelela mbiluni nahone nda humbela Yehova uri a nthuse u vhona onoyo muthu nga nḓila ine a mu vhona ngayo. Zwenezwi zwi ita uri ndi si tsha livhisa ṱhogomelo kha nḓila ine nda ḓipfa ngayo nahone zwi ita uri ndi humbule nga ha nḓila ine nda nga thusa ngayo onoyo muthu.”
Ri dzula ri tshi ṱoḓa vha faneleaho u wana vhutshilo vhu sa fheli
Vhaṅwe vha a dzhiela nṱha vhuḓidini vhune ra vhu ita u itela u vha thusa u ḓivha ngoho
Ri fanela u dovha ra humbula nga ha nḓila ine ra nga ṱuṱuwedza ngayo vhane ra shuma navho. Jessica o ri: “Arali muṅwe washu o ṱangana na zwithu zwi si zwavhuḓi, ndi lingedza u ita uri ndi si ambese nga hazwo. Nṱhani hazwo, ndi thoma u amba nga ha zwithu zwavhuḓi. Ndi amba nga ha mbuyelo dzavhuḓi dzine ra dzi wana vhuḓinḓani hashu, hu sa londwi nḓila i si yavhuḓi ine vhaṅwe vhathu vha aravha ngayo.”
Yehova u a ḓivha thaidzo dzine ra sedzana nadzo vhuḓinḓani. U a takala vhukuma musi ri tshi edzisa nḓila ine a khathutshela ngayo! (Luka 6:36) Ndi ngoho uri Yehova ha nga ḓo pfela vhathu vhuṱungu u ya nga hu sa fheli. Ri nga vha na vhungoho ha uri u a ḓivha tshifhinga tsho teaho tshine a ḓo fhelisa ngatsho ano maitele mavhi a zwithu. Kha ri bvele phanḓa ri tshi huwelela nga u fhisea u swika zwezwo. (2 Tim. 4:2) Kha ri bvele phanḓa ri tshi ita mushumo washu nga u fhisea na u pfela vhuṱungu “vhathu vha mifuda yoṱhe.”
