Vhuleme Ha U Gudisa Ṅwana Ṋamusi

MUSI ho no vha vhusiku vhukuma, muṋe wa khefi u khou lugiselela u vala nahone a ye hayani. Vhafumakadzi vhavhili na ṅwana vha a dzhena nahone vha ṱoḓa u renga zwiḽiwa. Samusi o vha o neta, muṋe wa khefi o ṱoḓou vha vhudza uri o no vala, fhedzi a phetha u vha thusa. Musi vhenevho vhafumakadzi vhavhili vha tshi khou haseledza na u ḽa, ṅwana o vha a tshi khou gidima u mona na khefi, a tshi khou ḽaṱekanya zwikontsi fhasi na u zwi kandekanya nga milenzhe. Nṱhani ha u mu kaidza, mme a ṅwana u a sea. Musi vhenevho vharengi vha tshi ṱuwa, muṋe wa khefi o netaho a kunakisa eneo mashika.

Samusi ni tshi nga vha ni tshi zwi ḓivha, zwiimo zwa vhutshilo zwi sumbedza uri miṱani minzhi, vhana a vha gudiswi zwavhuḓi. Zwiitisi zwa hone zwi a fhambana. Vhaṅwe vhabebi vha tendela vhana vhavho vha tshi ita zwine vha funa, vha tshi humbula uri ṅwana u fanela u aluwa o vhofholowa. Kana nga ṅwambo wa uri vhutshilo havho ho farakanea vhukuma, vhabebi vha nga kha ḓi sa fhedza tshifhinga vha tshi khou ṱhogomela vhana vhavho nga vhuronwane na u vha ṋea ngundo yo teaho. Vhaṅwe vhabebi vha humbula uri u isa ṅwana tshikoloni ndi tshone tshithu tsha ndeme vhukuma, ngauralo vha ṋea ṅwana wavho mbofholowo ya tshoṱhe arali a tshi phasa zwavhuḓi tshikoloni nahone a ṱanganedzwa gudedzini ḽa nṱha.

Fhedzi vhaṅwe vha amba uri zwilinganyo zwa vhabebi na zwa tshitshavha zwi fanela u dzudzanywa. Vha amba uri vhana vha khou dzhenelela kha vhuvemu ha mifuda yoṱhe nahone khakhathi dza tshikoloni dzi khou engedzea nga u ṱavhanya. Ṱhoho ya tshikolo tsha vhukati tsha Seoul ngei Riphabuliki ya Korea yo ombedzela uri u gudisa vhana nga ha u khwinisa vhumuthu havho zwi fanela u vha zwithu zwa ndeme vhukuma. O ri: “Musi no no ita uri a vhe na vhumuthu havhuḓi ni fanela u dzhenisa nḓivho.”

Vhabebi vhanzhi vhane vha ṱoḓa vhana vhavho vha tshi ya gudedzini na u bvelela vhutshiloni a vha thetshelesi maipfi a tsevho. Arali ni mubebi, ni ṱoḓa ṅwana waṋu a tshi vha muthu wa mufuda-ḓe? Naa ni ṱoḓa a tshi vha mualuwa a re na vhuḓifari na vhuḓifhinduleli? A tshi vha muthu ane a ṱhogomela vhaṅwe, ane a tendelana na zwiimo, na a re na mavhonele avhuḓi? Arali zwo ralo, nga khumbelo ṱhogomelani thero i tevhelaho.