Ni Songo Vhuya Na “Ṅalela Yehova”
Muthu u tshinyadza nḓila yawe nga vhutsilu hawe; mbilu yawe ya vhó ṅalela Yehova.’—MIR. 19:3.
1, 2. Ndi ngani ri songo fanela u vhona Yehova mulandu nga thaidzo dza vhathu? Ṋeani tsumbo.
KHA ri ri ni munna o takalaho mbinganoni lwa miṅwaha minzhi. Fhedzi ḽiṅwe ḓuvha ni tshi vhuya hayani, ni wana uri zwithu zwoṱhe nḓuni zwo tshinyiwa. Thundu dza nḓuni dzo pwashiwa nahone khaphethe yo kherukana. Nnḓu yaṋu ine na i funa yo tshinyadzwa. Naa ni nga halifha na ri, “Ndi ngani mufumakadzi wanga o ita zwenezwi?” Kana khamusi ni nga vhudzisa uri, “Ndi nnyi o itaho zwenezwi?” A zwi timatimisi uri mbudziso ya vhuvhili ndi yone ine ya ḓo ḓa nga u ṱavhanya muhumbuloni waṋu. Ndi ngani? Nga nṱhani ha uri ni a ḓivha uri mufarisi waṋu ane na mu funa a nga si vhuye a ita zwithu zwi fanaho na zwenezwo.
2 Ṋamusi shango ḽo tshikafhadzwa, hu na vhuvemu na u ḓifara luvhi. Sa vhagudi vha Bivhili, ri a zwi ḓivha uri Yehova a si ene ane a bveledza dzenedzi thaidzo dzoṱhe. O sika ḽeneḽi ḽifhasi uri ḽi vhe paradiso i takadzaho. (Gen. 2:8, 15) Yehova ndi Mudzimu wa lufuno. (1 Yoh. 4:8) U guda hashu Maṅwalo ho ri thusa u ṱalula tshiitisi tsha vhukuma tsha vhuleme vhunzhi vhu re shangoni. A hu na muṅwe nga nnḓa ha Sathane Diabolo, “muvhusi wa shango.”—Yoh. 14:30; 2 Vhakor. 4:4.
3. Ri nga vha na mahumbulele afhio a si avhuḓi?
3 Naho zwo ralo, ri nga si vhee Sathane mulandu kha maṱungu ashu oṱhe. Ndi ngani? Nga nṱhani ha uri dziṅwe thaidzo dzashu dzi vhangwa nga vhukhakhi hashu. (Vhalani Doiteronomio 32:4-6.) Naho ri tshi nga tenda zwenezwo, u sa fhelela hashu hu nga kanganyisa mahumbulele ashu nahone ha ita uri mafheleloni ri tshimbile nḓilani ine ya ḓo ri dzhenisa khomboni. (Mir. 14:12) Nga nḓila-ḓe? Nṱhani ha u ḓivhona mulandu kana u vhona Sathane mulandu, ri nga thoma u vhona Yehova mulandu. Ri nga “ṅalela Yehova.”—Mir. 19:3.
4, 5. Mukriste a nga “ṅalela Yehova” nga nḓila-ḓe?
4 Naa zwi a konadzea zwa vhukuma u “ṅalela Yehova”? Vhukuma, u ita zwenezwo a zwi nga ḓo ri vhuyedza nga tshithu. (Yes. 41:11) Muṅwe murendi o vhuya a ri: “Zwanḓa zwaṋu ndi zwipfufhi vhukuma u lwa na Mudzimu.” Ri nga si vhuye ra amba uri ro sinyutshela Yehova. Fhedzi Mirero 19:3 i ri vhutsilu ha muthu vhu ‘tshinyadza nḓila yawe, mbilu yawe ya vho ṅalela Yehova.’ Ee, muthu a nga ṅalela Mudzimu mbiluni yawe. Enea mavhonele a nga ḓivhonadza nga nḓila yo dzumbamaho. Muthu a nga sinyutshela Yehova. Nga zwenezwo, muthu onoyo a nga kha ḓi sa ya miṱanganoni tshifhinga tshoṱhe kana a si tsha tikedza nga vhuḓalo nzudzanyo dza vhurabeli ha Yehova.
5 Ndi mini zwine zwa nga ri ita uri ri ‘ṅalele Yehova’? Ri nga iledza hani tshenetsho tshikwekwe? Ndi zwa ndeme u ḓivha phindulo dza dzenedzi mbudziso. Zwenezwi zwi kwama vhushaka hashu na Yehova Mudzimu!
NDI MINI ZWINE ZWA NGA RI ITA URI RI ‘ṄALELE YEHOVA’?
6, 7. Ndi ngani Vhaisiraele vha tshifhingani tsha Mushe vho thoma u gungulela Yehova?
6 Ndi mini zwine zwa nga ita uri mbilu ya mushumeli a fulufhedzeaho wa Yehova i thome u vhilaela nga ha Mudzimu wawe? Kha ri ṱolisise zwithu zwiṱanu na tsumbo dzi re Bivhilini dzine dza bvisela khagala nḓila ye vhaṅwe vha tshifhingani tsho fhiraho vha dzhena ngayo kha tshenetshi tshikwekwe.—1 Vhakor. 10:11, 12.
U thetshelesa zwithu zwi si zwavhuḓi zwine zwa ambiwa nga vhaṅwe zwi nga vha na mvelelo dzi si dzavhuḓi kha inwi (Sedzani phara 7)
7 Zwithu zwi si zwavhuḓi zwine zwa ambiwa nga vhaṅwe zwi nga ri ṱuṱuwedza nga nḓila i si yavhuḓi. (Vhalani Doiteronomio 1:26-28.) Vhaisiraele vha khou tou bva u phuluswa vhupulini ngei Egipita. Yehova o ḓisa ṱhamu dza fumi nga lwa vhuṱolo kha lwonolwo lushaka luvhi nahone nga murahu a fhelisa Farao na mmbi yawe Lwanzheni Lutswuku. (Ek. 12:29-32, 51; 14:29-31; Ps. 136:15) Vhathu vha Mudzimu vho vha vho lavhelela u dzhena Shangoni ḽo Fulufhedziswaho. Naho zwo ralo, Vhaisiraele vho mbo ḓi thoma u gungulela Yehova tshifhingani tshenetsho tsha ndeme vhukuma. Ndi mini zwo itaho uri vha si vhe na lutendo? Vho kulea nungo nga nṱhani ha muvhigo u si wavhuḓi une wa bva kha vhaṅwe vhe vha rumiwa uri vha vhe dziṱholi. (Num. 14:1-4) Ho vha na mvelelo dzifhio? Lushaka lwoṱhe a lwo ngo tendelwa u dzhena ‘shangoni ḽavhuḓi.’ (Doit. 1:34, 35) Naa nga zwiṅwe zwifhinga ri nga tendela zwithu zwi si zwavhuḓi zwine zwa ambiwa nga vhaṅwe zwi tshi ita uri lutendo lwashu lu si khwaṱhe nahone zwa ri ita uri ri gungulele nḓila ine Yehova a shumisana ngayo na riṋe?
8. Ndi mini zwe zwa ita uri vhathu vha Mudzimu vha tshifhingani tsha Yesaya vha vhone Yehova mulandu kha vhuimo havho?
8 Thaidzo dzi nga ita uri ri kulee nungo. (Vhalani Yesaya 8:21, 22.) Tshifhingani tsha Yesaya, lushaka lwa Yuda lwo ḓiwana lu kha vhuimo vhu konḓaho vhukuma. Lwo vha lwo tangwa nga maswina. Lwo vha lu si na zwiḽiwa. Vhanzhi vho vha vhe na nḓala. Fhedzi zwa ndeme ho vha hu uri vho vha vhe na nḓala ya muya. (Amosi 8:11) Nṱhani ha u ṱoḓa thuso ya Yehova kha u sedzana na honovhu vhuleme, vha thoma u “sema” khosi yavho na Mudzimu wavho. Vhukuma, vho vhona Yehova mulandu wa thaidzo dzavho. Arali ra kwamiwa nga makhaulambilu kana nga thaidzo dza muthu nga eṱhe, naa ri nga amba zwi tevhelaho mbiluni dzashu, ‘Yehova o vha e ngafhi musi ndi tshi mu ṱoḓa?’
9. Ndi ngani Vhaisiraele vha tshifhingani tsha Hesekiele vho vha na mavhonele o khakheaho?
9 A ri na vhuṱanzi hoṱhe. Nga nṱhani ha u sa vha na vhuṱanzi hoṱhe ho fhelelaho, Vhaisiraele vha tshifhingani tsha Hesekiele vho vhona u nga nḓila dza Yehova a dzo ngo ‘luga.’ (Hesek. 18:29) Zwo vha zwi tshi tou nga vha na ndugelo ya u haṱula Mudzimu, vha tshi vhea zwilinganyo zwavho zwa khaṱulokwayo nṱha ha zwa Yehova nahone vha tshi mu sasaladza vha songo thoma vha pfesesa zwiitea nga vhuḓalo. Arali nga zwiṅwe zwifhinga ri sa pfesesi mafhungo a Bivhili nga vhuḓalo kana hu tshi itea zwiṅwe zwithu vhutshiloni hashu, naa ri nga amba mbiluni dzashu uri Yehova ha humbuleli nahone ho ngo ‘luga’?—Yobo 35:2.
10. Muthu a nga tevhela hani tsumbo ya Adamu i si yavhuḓi?
10 A ri dzhii vhuḓifhinduleli ha zwivhi na vhukhakhi hashu. Mathomoni a ḓivhazwakale ya vhathu, Adamu o vhona Mudzimu mulandu wa tshivhi tshawe. (Gen. 3:12) Naho Adamu o ita nga khole nahone e na nḓivho yo fhelelaho ya mvelelo dza u pfuka mulayo wa Mudzimu, o vhona Yehova mulandu. Nga maṅwe maipfi, o ri Yehova o mu ṋea musadzi a si wavhuḓi. U bva nga tshenetsho tshifhinga, vhaṅwe vho tevhela tsumbo ya Adamu ya u vhona Mudzimu mulandu wa vhukhakhi havho. Ri ita zwavhuḓi musi ri tshi ḓivhudzisa uri, ‘Naa u nyabwa na u dinalea nga nṱhani ha vhukhakhi he nda vhu ita, zwi ita uri ndi si fushee nga zwilinganyo zwa Yehova?’
11. Ri guda mini kha Yona?
11 Ri ḓihumbulela riṋe vhaṋe. Muporofita Yona o vha e na thaidzo na phetho ye Yehova a i dzhia musi a tshi khathutshela Vhaninive. (Yona 4:1-3) Ndi ngani? Zwi vhonala u nga o mbo ḓi kwamea nga ha u shoniswa musi zwe a ḓivhadza nga ha u fheliswa zwi songo tsha itea. Yona o vhilaedziswa vhukuma nga uri vhathu vha ḓo ri mini, nṱhani ha u vhilaedziswa nga vhathu vha Ninive vho rembuluwaho. Zwi fanaho na zwenezwo, naa ri nga ḓihumbulela na riṋe vhane nahone ra “ṅalela Yehova” nga u sa ḓisa vhufhelo nga u ṱavhanya? Arali ro no huwelela lunzhi uri ḓuvha ḽa Yehova ḽi tsini, naa ri nga thoma u fhelela mbilu Yehova musi vhaṅwe vha tshi ri sasaladza nga nṱhani ha uri ri ḓivhadza zwine Bivhili ya zwi amba?—2 Pet. 3:3, 4, 9.
NḒILA INE RA NGA ILEDZA NGAYO U “ṄALELA YEHOVA”
12, 13. Arali mbiluni dzashu ra thoma u vhudzisa nga ha miṅwe mishumo ya Yehova, ndi mini zwine ra fanela u sa zwi litshelela?
12 Ri nga ita mini arali mbilu dzashu dzine dza vha na tshivhi dza thoma u ḓivhudzisa nga ha miṅwe mishumo ya Yehova? Humbulani uri hu ḓo vha hu si vhuṱali u ita nga u ralo. Mirero 19:3 i ri: “Muthu u tshinyedzwa nḓila yawe nga vhutsilu hawe; mbilu yawe ya vhó ṅalela Yehova.” Musi ri na zwenezwo muhumbuloni, kha ri ṱolisise zwithu zwiṱanu zwine zwa ḓo ri thusa uri ri si tendele mbilaelo dza vhutshilo dzi tshi ri ita uri ri vhone Yehova mulandu.
13 Ni songo litshelela vhushaka haṋu na Yehova. Arali ra dzula ri na vhushaka ha tsini na Mudzimu, ri nga iledza uri u sa fhelela hashu hu ri ite uri ri mu ṅalele. (Vhalani Mirero 3:5, 6.) Ri fanela u fulufhela Yehova. Ri fanela u iledza u ḓivhona ri vha vhuṱali kana u ḓihumbulela riṋe vhane. (Mir. 3:7; Muh. 7:16) Zwenezwo zwi ḓo ri ita uri ri si vhone Yehova mulandu musi hu tshi itea zwithu zwi si zwavhuḓi.
14, 15. Ndi mini zwine zwa nga ri thusa uri ri si kwamiwe nga zwithu zwi si zwavhuḓi zwine zwa ambiwa nga vhaṅwe?
14 Ni songo tendela zwithu zwi si zwavhuḓi zwine zwa ambiwa nga vhaṅwe zwi tshi ni kwama. Vhaisiraele vha tshifhingani tsha Mushe vho vha vhe na vhuṱanzi ho khwaṱhaho ha u fulufhela uri Yehova u ḓo vha livhisa Shangoni ḽo Fulufhedziswaho. (Ps. 78:43-53) Fhedzi musi vha tshi sedzana na muvhigo u si wavhuḓi u bvaho kha ṱholi dzi sa fulufhedzei dza fumi, a vho ngo “elelwa tshanḓa tshawe.” (Ps. 78:42) Arali ra elekanya nga mishumo ya Yehova, ra humbula nga ha zwithu zwavhuḓi zwe a ri itela zwone, ri ḓo khwaṱhisa vhushaka hashu nae. Nga zwenezwo, a ri nga ḓo tendela zwithu zwi si zwavhuḓi zwine zwa ambiwa nga vhaṅwe zwi tshi ri fhambanya na Yehova.—Ps. 77:11, 12.
15 Hu pfi mini arali ri na mavhonele a si avhuḓi nga ha vhagwadameli nga riṋe? Kha vhuimo honoho, vhushaka hashu na Yehova vhu nga thithisea. (1 Yoh. 4:20) Musi Vhaisiraele vha tshi vhudzisa nga ha vhuḓifhinduleli na vhuimo ha Aroni, Yehova o vha dzhia sa vhane vha khou mu gungulela. (Num. 17:10) Zwi fanaho na zwenezwo, arali ra thoma u gungula nga ha vhane Yehova a khou vha shumisa u livhisa tshipiḓa tshi re kha ḽifhasi tsha ndangulo yawe, ri nga vha ri tshi khou vhilaela nga ha Yehova.—Vhaheb. 13:7, 17.
16, 17. Ndi mini zwine ra fanela u zwi humbula musi ri na thaidzo?
16 Humbulani uri Yehova ha ri ḓiseli thaidzo. Naho Vhaisiraele vha tshifhingani tsha Yesaya vho ṱanutshela Yehova, o vha a tshi ṱoḓa u vha thusa. (Yes. 1:16-19) Hu sa londwi vhuleme vhune ra ṱangana naho, ri nga khuthadzwa nga u ḓivha uri Yehova u a ri ṱhogomela nahone u ṱoḓa u ri thusa. (1 Pet. 5:7) Zwi re zwone ndi uri u ri fulufhedzisa u ri ṋea maanḓa ane ra a ṱoḓa u itela uri ri dzule ri tshi konḓelela.—1 Vhakor. 10:13.
17 Arali ri tshi khou pfa vhuṱungu nga nṱhani ha u shayea ha khaṱulokwayo—samusi Yobo munna a fulufhedzeaho o ṱangana nazwo—ri fanela u humbula uri Yehova ha bveledzi zwi songo lugaho. Yehova u vhenga u sa vha na khaṱulokwayo; u funa u luga. (Ps. 33:5) U nga ri ri nga fana na khonani ya Yobo, Elihu, we a amba uri: “Mudzimu u kule na zwivhi; Mu-kona-zwoṱhe ha khakhi.” (Yobo 34:10) Nṱhani ha u ri ḓisela thaidzo, Yehova u ri ṋea “tshifhiwa tshiṅwe na tshiṅwe tshavhuḓi na tsho fhelelaho.”—Yak. 1:13, 17.
18, 19. Ndi ngani ri songo fanela u timatima Yehova na luthihi? Ṋeani tsumbo.
18 Ni songo vhuya na timatima Yehova. Mudzimu o fhelela, nahone ngelekanyo yawe i fhira yashu. (Yes. 55:8, 9) U ḓiṱukufhadza na u ḓifhima hu fanela u ri thusa u tenda uri u pfesesa hashu ho linganyiselwa. (Vharoma 9:20) A ri na vhuṱanzi ho fhelelaho nga ha zwiṅwe zwithu. A zwi timatimisi uri no no tshenzhela ngoho ya murero une wa ri: “Muhweleli mu-ranga-u-swika u ḓi pfi ndi muvhuya; hu ḓo swika uḽa muṅwe a mu dzumbulula.”—Mir. 18:17.
19 Arali khonani ine ra i fulufhela ya ita zwiṅwe zwithu zwine ra si zwi pfesese kana ra vhona zwi songo ḓowelea, naa ri nga ṱavhanya u mu vhona mulandu nga ha vhukhakhi hawe? Kana ri ḓo humbula uri u na zwiṱuṱuwedzi zwavhuḓi, zwihuluhulu arali onoyo muthu ri tshi mu ḓivha lwa miṅwaha minzhi? Arali ri tshi shumisana na khonani dzashu dzi songo fhelelaho nga nḓila ya lufuno, zwenezwi zwi ḓo ri ita uri ri fulufhele lungafhani Khotsi ashu wa ṱaḓulu, ane nḓila na ngelekanyo yawe ya fhira yashu!
20, 21. Ndi ngani zwi zwa ndeme u pomoka o tewaho nga u pomokwa?
20 Pomokani o tewaho nga u pomokwa. Ndi ngani ri tshi fanela u ita nga u ralo? Ri nga vha ri na vhuḓifhinduleli ha thaidzo dzashu. Arali zwo ralo, ri fanela u zwi ṱanganedza. (Vhagal. 6:7) Ni songo lingedza u vhona Yehova mulandu wa thaidzo dzaṋu. Ndi ngani zwo khakhea u ita nga u ralo? Ṱhogomelani heyi tsumbo: Goloi i nga vha i tshi kona u gidima nga luvhilo luhulwane. Edzani u humbula arali mureili a fhirisa luvhilo lwo tendelwaho musi a tshi khou khona nahone a thula. Naa muiti wa goloi a nga vhewa mulandu wa khombo yeneyo? Hai, a zwo ngo ralo! Zwi fanaho, Yehova o ri sika ri na mbofholowo ya u ḓikhethela. Fhedzi o ri gudisa nḓila ya u dzhia phetho dzavhuḓi. Nga zwenezwo, a ro ngo fanela u vhona Musiki washu mulandu nga vhukhakhi hashu.
21 Vhukuma, a si thaidzo dzashu dzoṱhe dzine dza bveledzwa nga vhukhakhi hashu riṋe vhaṋe na zwiito zwo khakheaho. Zwiṅwe zwithu zwi itea nga nṱhani ha u “sokou ṱangana nazwo’ nga tshifhinga tshazwo.” (Muh. 9:11) Nga zwenezwo, ri songo hangwa uri Sathane Diabolo ndi ene ane a bveledza vhuvhi. (1 Yoh. 5:19; Nzumb. 12:9) Ndi ene swina—hu si Yehova!—1 Pet. 5:8.
DZHIELANI NṰHA VHUSHAKA HAṊU HAVHUḒI NA YEHOVA
Yoshua na Kalebe vho fhaṱutshedzwa nga nṱhani ha u fulufhela Yehova (Sedzani phara 22)
22 Musi no sedzana na thaidzo, humbulani nga ha tsumbo ya Yoshua na Kalebe. U fhambana na dziṅwe ṱholi dza fumi, vhenevha vhanna vhavhili vha fulufhedzeaho vho ḓa na muvhigo wavhuḓi. (Num. 14:6-9) Vho sumbedza lutendo kha Yehova. Naho zwo ralo, vho vha vha tshi fanela u dzula sogani miṅwaha ya 40 na vhaṅwe Vhaisiraele vhoṱhe. Naa Yoshua na Kalebe vho vhilaela kana vha sinyuwa, vha tshi pfa u nga zwenezwi a zwo ngo luga? Hai. Vho fulufhela Yehova. Naa vho fhaṱutshedzwa? Zwo tou ralo! Naho murafho woṱhe wo fela sogani, vhenevha vhanna vhavhili vho fhedzisela vho dzhena Shangoni ḽo Fulufhedziswaho. (Num. 14:30) Nga hu fanaho, ri ḓo wana phaṱhutshedzo dza Yehova arali “ri sa neti” u ita zwine a zwi funa.—Vhagal. 6:9; Vhaheb. 6:10.
22, 23. Ri fanela u humbula mini musi ri tshi kulea nungo nga nṱhani ha thaidzo dzashu?
23 Arali no kulea nungo nga nṱhani ha thaidzo dzaṋu, u sa fhelela ha vhaṅwe, kana u sa fhelela haṋu, ndi mini zwine na fanela u zwi ita? Livhisani ṱhogomelo kha pfaneleo dzavhuḓi dza Yehova. Humbulani nga ha fulufhelo ḽe na ṋewa nga Yehova. Ḓivhudziseni uri, ‘Ndo vha ndi tshi ḓo vha ndi ngafhi arali hu si nga Yehova?’ Dzulani ni tsini nae, nahone ni songo tendela mbilu yaṋu i tshi mu ṅalela!
