Musi ane ra mu funa a tshi fa, nga lwa nzulele ri a lila ngauri ri ḓo mu ṱuvha. Naho Yesu o vha a tshi funa Lazaro, ho ngo lila nga nṱhani ha uri Lazaro o fa. O lidzwa ngauri o vha a tshi khou pfela vhuṱungu muṱa na khonani dza Lazaro, samusi zwo sumbedzwa kha mafhungo a Yohane.—Yoh. 11:36.

Musi Yesu a tshi thoma u pfa uri Lazaro u khou lwala, ho ngo ṱavhanya o ya ha Lazaro u itela u mu fhodza. Eneo mafhungo a ri: “Musi [Yesu] a tshi pfa uri Lazaro u khou lwala, a dovha a dzula maṅwe maḓuvha mavhili fhethu he a vha e hone.” (Yoh. 11:6) Ndi ngani Yesu o lenga? O vha e na tshiitisi. O ri: “Vhulwadze uvhu a vhu nga ḓo mu vhulaha, fhedzi ndi ha uri hu rendwe Mudzimu na uri Murwa wa Mudzimu a rendwe ngazwo.” (Yoh. 11:4) Vhulwadze ho vha vhu si ha u “vhulaha” Lazaro. Yesu o vha a tshi ṱoḓa uri lufu lwa Lazaro lu ite “uri hu rendwe Mudzimu.” Nga nḓila-ḓe? Yesu o vha a tshi ṱoḓa u ita vhuṅwe vhuṱolo nga u vusa khonani yawe vhiḓani.

Kha khaseledzo yawe na vhafunziwa vhawe, Yesu o vhambedza lufu na u eḓela. Ndi ngazwo o vha vhudza uri o vha a tshi ‘khou ya henengei uri a mu vuse.’ (Yoh. 11:11) Kha Yesu, u vusa Lazaro vhafuni zwi fana na musi mubebi a tshi vusa ṅwana wawe o eḓelaho. Ngauralo, ho vha hu si na tshiitisi tsha uri a pfe vhuṱungu nga lufu lwa Lazaro.

Ndi mini zwe zwa ita uri Yesu a lile? Zwiṅwe hafhu, vhubvo ha mafhungo vhu ṋea phindulo. Musi Yesu a tshi ṱangana na Maria khaladzi a Lazaro nahone a mu vhona e na vhaṅwe vha tshi khou lila, zwo mu “vhaisa a ṱungufhala zwihulu.” Musi Yesu a tshi vhona vhuṱungu havho, zwo mu sudzulusela uri a pfe o vhaisala lwe a “ṱungufhala zwihulu.” Ndi ngazwo ‘Yesu o lila.’ Zwo ṱungufhadza Yesu vhukuma musi a tshi vhona khonani dzawe dzine a dzi funa dzi vhuṱunguni vhuhulu.—Yoh. 11:33, 35.

Enea mafhungo a sumbedza uri Yesu u na maanḓa na vhukoni ha u vusa vhane ra vha funa vho faho uri vha dovhe vha tshile na u vha na mutakalo wavhuḓi shangoni ḽiswa. Zwi dovha zwa ri thusa u vhona uri Yesu u pfela vhuṱungu vho felwaho nga vhane vha vha funa nga nṱhani ha lufu lwo vhangwaho nga Adamu. Iṅwe ngudo ine ra nga i guda kha enea mafhungo ndi ya uri ri fanela u pfela vhuṱungu vhane vha khou pfa vhuṱungu ha u felwa nga vhane vha vha funa.

Yesu o vha a tshi zwi ḓivha uri u ḓo vusa Lazaro. Zwiṅwe hafhu, o lila, a sudzuluselwa nga lufuno luhulu na u pfela vhuṱungu khonani dzawe. Zwi fanaho na zwenezwo, u pfela hashu vhuṱungu zwi nga ri sudzulusela uri ri “lile na vhane vha lila.” (Vharoma 12:15) U sumbedza u pfa vhuṱungu a zwi ambi uri muthu ha na lutendo kha fulufhelo ḽa mvuwo. Nga zwenezwo, Yesu o ri vhetshela tsumbo ine ya sumbedza u pfela vhuṱungu vho felwaho nga u lila naho o vha a tshi ḓo vusa Lazaro.