ZWINE ZWA ITA URI VHAṄWE VHA TIMATIME: Naho vha tshi ṱoḓa khuthadzo nga maṱo matswuku, vhaṅwe vhathu vha vhona u nga ndi u vha na tseḓa u humbela Mudzimu uri a dzhenelele na u vha thusa u sedzana na thaidzo dzavho. Muṅwe mufumakadzi ane a pfi Raquel o ri: “Musi ndi tshi vhona tshivhalo tsha vhathu shangoni—na thaidzi khulwane dzine vha sedzana nadzo, mbilaelo dzanga dzi vhonala dzi ṱhukhu lune nda nga humbela Mudzimu uri a nthuse.”

ZWINE IPFI ḼA MUDZIMU ḼA FUNZA ZWONE: Mudzimu o no vhuya a dzhenelela nga nḓila i swayeaho vhukuma u itela u thusa na u khuthadza vhathu. Vhathu vhoṱhe kha ḽifhasi vho mamela tshivhi—a vha koni u dzula vhe kha zwilinganyo zwa Mudzimu nga ho fhelelaho. Naho zwo ralo, Mudzimu o “ri funa, a rumela Murwa wawe [Yesu Kristo] uri a vhe tshiṱhavhelo tshi pfumelelaho zwivhi zwashu.” (1 Yohane 4:10) Nga lufu lwa Yesu lwa tshiṱhavhelo, Mudzimu o ita uri zwi konadzee uri ri hangwelwe zwivhi, u vha na luvalo lwo kunaho na u vha na fulufhelo ḽa u tshila tshoṱhe shangoni ḽiswa ḽi re na mulalo. * Fhedzi naa tshenetsho tshiṱhavhelo tsho itelwa vhathu vhoṱhe, kana tshi sumbedza uri Mudzimu u na dzangalelo kha inwi?

Ṱhogomelani muapostola Paulo. O vha o kwamea vhukuma nga tshirengululi tsha Yesu lwe a ṅwala uri: “[Ndi] tshila nga lutendo kha Murwa wa Mudzimu, we a mpfuna na u ḓiṋekedza a tshi itela nṋe.” (Vhagalata 2:20) Ndi ngoho uri Yesu o fa, Paulo a sa athu vha Mukriste. Naho zwo ralo, Paulo o dzhia tshenetsho tshiṱhavhelo sa tshifhiwa tsha muthu nga eṱhe tshi bvaho ha Mudzimu.

Na inwi tshiṱhavhelo tsha lufu lwa Yesu ndi tshifhiwa tshaṋu tsha muthu nga eṱhe tshi bvaho ha Mudzimu. Tshenetsho tshifhiwa tshi sumbedza uri ni wa ndeme kha Mudzimu. Tshi nga ni ṋea ‘khuthadzo nga hu sa fheli na fulufhelo ḽavhuḓi’ nahone tsha ni “khwaṱhisa uri tshifhinga tshoṱhe ni ite na u amba zwithu zwavhuḓi.”—2 Vhathesalonika 2:16, 17.

Naho zwo ralo, Yesu o ṋekedza vhutshilo hawe sa tshiṱhavhelo miṅwahani ya 2000 yo fhiraho. Ndi vhufhio vhuṱanzi vhu sumbedzaho uri Mudzimu u ṱoḓa u vha na vhushaka na inwi ṋamusi?