Ṅwaha muṅwe na muṅwe ri gandisa na u phaḓaladza Bivhili na khandiso dzo thewaho Bivhilini nnzhi-nnzhi. Ri fhaṱa nahone ri na ofisi dza davhi na mitshini ya u gandisa u mona na shango. Zwivhidzo zwinzhi zwi kuvhangana fhethu ha vhurabeli ho kunaho na hu kungaho hune ha vhidzwa Holo dza Muvhuso. Ndi vhafhio vhane vha badela zwenezwi zwithu zwoṱhe?

Mushumo washu u tikedzwa woṱhe nga miṋeelo ya u ḓifunela. (2 Vhakorinta 9:7) Nga 1879, magazini wa vhuvhili wo amba uri: “‘Zion’s Watch Tower’ [samusi yo vha i tshi vhidzwa nga u ralo], i tikedzwa nga YEHOVA, nahone samusi zwo ralo i nga si vhuye ya humbela kana u luvheledza u tikedzwa nga vhathu.” Ri kha ḓi tenda kha zwenezwo.

Miṋeelo i rumelwa ofisini dza davhi nga ho livhaho kana ya dzheniswa bogisini ḽa muṋeelo ḽine ḽa wanala Holoni ya Muvhuso. Fhedzi a ri bvisi tshafumi, a hu na koḽeke kana u badelisa vhathu mushumo une ra u ita kana khandiso dzashu. A ri holelwi musi ri tshi huwelela, u gudisa tshivhidzoni kana u thusa u fhaṱa fhethu ha vhurabeli. Ndi ngazwo Yesu o ri: “No ṋewa nga mahala, ṋeani nga mahala.” (Mateo 10:8) Vhathu vhane vha thusa ofisini dzashu dza davhi na ofisini dzashu khulwane dza shango ḽoṱhe, u katela na Tshigwada tshi Langaho tsha Ṱhanzi dza Yehova, a vha holelwi.

Miṋeelo i dovha ya shumiswa u thusa musi hu na khombo. Vhakriste vha u thoma vho takalela u shela mulenzhe kha u thusa vho welwaho nga khombo. (Vharoma 15:26) Nga hu fanaho, ri thusa vho welwaho nga khombo nga u vha vusulusela nnḓu dzavho na fhethu ha vhurabeli na nga u vha ṋea zwiḽiwa, zwiambaro na ngalafho.