Ni humbula mini? Naa Mudzimu u a takalela nndwa? Arali zwo ralo, ndi ḽifhio sia ḽine a ḽi dzhia kha khakhathi dza ṋamusi? U wana phindulo dza dzenedzi mbudziso, zwi nga ni thusa u ṱolisisa nḓila ine na ḓipfa ngayo na mavhonele aṋu nga ha nndwa. Sa tsumbo, arali no vha ni tshi ḓivha uri Mudzimu ha sokou takalela nndwa fhedzi, fhedzi u dovha a tikedza ḽihoro ḽine na ḽi takalela nndwani, zwi tou vha khagala uri ni ḓo ḓipfa ni na mafulufulu nga ha ḽihoro ḽaṋu nahone ni a zwi ḓivha uri ḽihoro ḽaṋu ḽi ḓo kunda. Kha ḽiṅwe sia, no vha ni tshi ḓo ḓipfa hani arali na ḓivha uri Mudzimu u tikedza ḽihoro ḽine ni si ḽi takalele? Zwi tou vha khagala uri ni ḓo ṱoḓa u ya kha ḽiṅwe ḽihoro.

Hu na zwiṅwe zwithu zwa ndeme zwine zwa vha khomboni. U ḓivha mavhonele a Mudzimu nga ha nndwa zwi nga kwama mavhonele aṋu nga ha Mudzimu. Arali ni muṅwe wa vhathu vhanzhi vhe vha pfiswa vhuṱungu nga nndwa, a zwi timatimisi uri ni ṱoḓa u ḓivha phindulo ya mbudziso i tevhelaho, Naa Mudzimu ndi mudzia-nndwa ane a tendela kana u ṱuṱuwedza tshengelo i bveledzwaho nga nndwa samusi vhaṅwe vha tshi tenda nga u ralo? Kana naa u a i tendela nahone ha na ndavha na u tsikeledzwa ha vhathu nga nṱhani ha nndwa?

Zwi ḓo ni mangadza u ḓivha uri Bivhili i na phindulo yo fhambanaho vhukuma na maṅwe a eneo mavhonele. Zwiṅwe hafhu, u bva kale u swika zwino, mavhonele a Mudzimu nga ha nndwa ha athu u shanduka. Kha ri ṱolisise zwine Bivhili ya zwi amba nga ha mavhonele a Mudzimu nga ha nndwa tshifhingani tsho fhiraho na tshifhingani tsha ḓanani ḽa u thoma ḽa miṅwaha, musi Yesu e kha ḽifhasi. Zwenezwo zwi ḓo ri thusa u vhona mavhonele a Mudzimu nga ha nndwa ṋamusi na u ḓivha arali vhathu vha tshi ḓo bvela phanḓa vha tshi lwa na tshifhingani tshi ḓaho.