Nga Ḽavhuṱaṋu nga dzi 24 dza February 2023, hu ḓo vha ho fhela ṅwaha u bva tshe nndwa ya ngei Ukraine ya thoma. Mivhigo i sumbedza uri ho huvhala kana u vhulawa maswole a Russia na a Ukraine a ṱoḓaho u vha 300 000 na uri ho vhulawa vhadzulapo vha ṱoḓaho u vha 30 000. Fhedzi tshivhalo tsha vhathu vho huvhalaho na vho lovhaho tshi nga vha tshi tshi fhira henefho.

 Zwi ṱungufhadzaho ndi uri a zwi vhonali yeneyi nndwa i tshi nga fhela hu si kale.

•   “Ho no fhela ṅwaha u bva tshe maswole a Russia a ya u lwa na Ukraine nahone a hu na tshi sumbedzaho uri nndwa i ḓo fhela hu si kale. A zwi vhonali hu tshi nga kha eneo mashango mavhili hu na ḽine ḽa ḓo kunda kha yeneyi nndwa nahone a zwi vhonali hu tshi nga eneo mashango mavhili a ḓo wana thandululo ine ya nga shuma.”—NPR (National Public Radio), 19 February 2023.

 Vhathu vhanzhi vho ṱungufhadzwa nga u vhona vhathu vha si na mulandu vha tshi khou pfiswa vhuṱungu na u tambula nga nṱhani ha yeneyi nndwa na dziṅwe shangoni ḽoṱhe. Bivhili i ṋea fhulufhelo ḽifhio? Naa nndwa dzi ḓo vhuya dza fhela?

 Bivhili i amba nga ha nndwa ine ya ḓo tshidza vhathu, hu si u vha fhelisa. Yeneyo nndwa i vhidzwa Haramagedo nahone i ṱaluswa nga uri ndi ‘nndwa ya ḓuvha ḽihulu ḽa Mudzimu Ramaanḓaoṱhe.’ (Nzumbululo 16:14, 16) Mudzimu u ḓo shumisa yeneyo nndwa u itela u fhelisa mivhuso ya vhathu ye ya ita uri hu vhe na nndwa nnzhi dzi tshinyadzaho. U itela u guda uri nndwa ya Haramagedo i ḓo ita hani uri hu vhe na mulalo wa tshoṱhe, vhalani thero dzi tevhelaho:

•   “Nndwa Ya Haramagedo Ndi Mini?”

•   “Ro Lavhelela Haramagedo Nga Maṱo Matswuku!”