Bivhili i amba nga ha thathuu luthihi fhedzi kha Levitiko 19:28, ine ya ri: “Ni songo . . . ḓiola thathuu.” Mudzimu o ṋea yeneyi ndaela lushaka lwa Isiraele. O vha a tshi khou ṱoḓa uri vha fhambane na vhaṅwe vhathu vho vha tangaho vhe vha vha vha tshi ḓiṅwala madzina na u ḓiola zwifanyiso zwa midzimu yavho. (Dotoronomio 14:2) Naho Vhakriste vhe siho nga fhasi ha mulayo we wa ṋewa Vhaisiraele, ndi zwa ndeme u humbulisisa nga ha uri ndi ngani wonoyo mulayo wo ṋewa Vhaisiraele.

Naa Mukriste u tea u itwa thathuu kana u olwa kha muvhili wawe?

 Maṅwalo a tevhelaho a nga ni thusa uri ni humbulisise nga ha enea mafhungo:

•   “Vhafumakadzi ndi tama . . . vha tshi vha na tshirunzi.” (1 Timotheo 2:9) Honovhu vhulivhisi vhu shuma kha vhanna na vhafumakadzi. Ri tea u ṱhonifha nḓila ine vhaṅwe vha ḓipfa ngayo nga ha zwiṅwe zwithu na u sa ḓiita vhommboneni.

•   Vhaṅwe vha ita thathuu kha mivhili yavho u itela u sumbedza uri vha na ndugelo ya u ita zwine vha funa nga mivhili yavho. Naho zwo ralo, Bivhili i ṱuṱuwedza Vhakriste uri: “ni ṋekedze mivhili yaṋu sa tshiṱhavhelo tshikhethwa, tshi tshilaho na tshi ṱanganedzeaho kha Mudzimu, nga u ita zwenezwo ni ḓo vha ni tshi khou shumela Mudzimu nga ṱhalukanyo yaṋu yoṱhe.” (Vharoma 12:1) Shumisani “ṱhalukanyo.” Thomani ni ḓivhudzise uri ndi ngani ni tshi khou ṱoḓa thathuu. Arali ni tshi khou zwi itela u tevhela fesheni, kana u itela u vha tshipiḓa tsha tshiṅwe tshigwada tsha vhathu, ni humbule uri nḓila ine na nga vha ni tshi khou ḓipfa ngayo i nga shanduka fhedzi thathuu i ḓo dzula i hone. U ṱolisisa zwiṱuṱuwedzi zwaṋu zwi ḓo ni thusa u ita phetho dza vhuṱali.—Mirero 4:7.

•   “Maano a mushumi wa biko a ita uri a bvelele ngangoho, fhedzi vhoṱhe vhane vha ṱavhanyela zwithu, vha ya vhushaini.” (Mirero 21:5) Kanzhi vhathu vha ita phetho ya u ita thathuu nga u ṱavhanya vha songo thoma vha humbula, fhedzi ni tea u humbula uri yeneyo phetho i nga kwama vhutshilo haṋu nga nḓila khulwane. Zwi nga vhavha u thutha thathuu nahone zwi nga ni ḓurela vhukuma. Vhaṱoḓisisi na vhane vha thutha dzithathuu vha sumbedza uri vhunzhi ha vhathu vha tama vha songo vhuya vha ita thathuu.