Ṱhanzi dza Yehova vha vha na miṱangano luvhili nga vhege, hune vha farela hone miṱangano, hu vhidzwa Holoni ya Ṱhanzi dza Yehova. Hu itea mini henefho, nahone ni nga vhuyelwa hani nga u vha hone?

•  Hu itea mini Holoni ya Ṱhanzi dza Yehova?

•  Ndi ngani ni tshi fanela u vha hone?

•  Zwine vhaṅwe vhaswa vha amba

Holoni ya Ṱhanzi dza Yehova ndi fhethu hune ra gudiswa Bivhili. Miṱangano ine ya farelwa henefho i nga ni thusa:

• u guda ngoho nga ha Mudzimu.

• u pfesesa zwithu zwine zwa khou itea zwino.

• u vha muthu wa khwine.

•   u wana khonani dza khwinesa.

Mafhungo ane a haseledzwa henefho a ḓo ni thusa. Vhulivhisi vhu re Bivhilini vhune ha haseledzwa miṱanganoni ya Ṱhanzi dza Yehova vhu ḓo ni thusa ‘u wana vhuṱali.’ (Mirero 4:5) Zwenezwi zwi amba uri Bivhili i nga ni thusa u dzhia phetho dza vhuṱali vhutshiloni. I nga ni thusa u fhindula dziṅwe dza mbudziso dza ndeme vhutshiloni, dzi ngaho:

• Ndi ngani Mudzimu o ri sika?

• Naa ndi Mudzimu ane a ita uri ri shengele?

• Hu itea mini musi ri tshi fa?

Zwiṅwe zwa zwiṱoho zwa nyambo zwine zwa haseledzwa mafheloni a vhege ndi zwi tevhelaho:

• Ndi Ngani Ri Tshi Tea U Livhiswa Nga Bivhili?

• Ni nga Wana Ngafhi Thuso Musi No Tsikeledzea?

• Muvhuso Wa Mudzimu u Khou Ri Itela Mini Zwino?

“Muṅwe ane nda dzhena nae kiḽasini o ḓa miṱanganoni. O dzula na muṱa wahashu nahone ra shumisa bugu dzashu nae. Nga murahu, o mmbudza uri o takadzwa nga phindulo dze vhahashu vha dzi ṋekedza kha khaseledzo. O dovha a ri kerekeni ya hawe a hu na zwishumiswa zwi ngaho zwine riṋe ra vha nazwo.”​—Brenda.

Naa no vha ni tshi zwi ḓivha? Hu dzheniwa mahala nahone a hu na tshelede ine ya koḽekiwa.

Ni ḓo ṱuṱuwedzwa nga vhukonani. Bivhili i amba uri tshiṅwe tshiitisi tsha u kuvhangana ndi uri “ri ṱuṱuwedzane.” (Vhahevheru 10:24, 25) Vhukonani havhuḓi ha vhathu vhane vha vha na ndavha na Mudzimu na vhaṅwe vhathu u fhira vhone vhaṋe vhu a homolosa kha shango ḽo ḓalaho tseḓa.

“Nga murahu ha ḓuvha ḽilapfu, ndi ḓi pfa ndo neta nahone ndi si na nungo, fhedzi vhathu vha Holoni vha ita uri ndi ḓipfe ndi khwine. Nga murahu ha miṱangano, ndi ḓipfa ndo takala nahone ndo lugela u sedzana na ḓuvha ḽi tevhelaho.”​—Elisa.

Naa no vha ni tshi zwi ḓivha? Hu na zwivhidzo zwa Ṱhanzi dza Yehova zwi fhiraho 120 000 u mona na ḽifhasi ḽoṱhe nahone vha kuvhangana fhethu hu fhiraho 60 000. Nga u tou angaredza hu fhaṱiwa Holo dza Ṱhanzi dza Yehova dzi ṱoḓaho u vha 1 500 nga ṅwaha u itela nyengedzeo ine ya vha hone. *