PROA pensar che te sì nte un museo. Tante robe che ghen’è lì le se ga rovinà col tempo. In tante robe ghe manca un toco. Ma no l’è gnanca de creder che una roba la ze intiera. No ghe manca gnanca un toco. E ti te pensi che ela la ze pi nova de quelaltre. Ma, el omo che mena le persone par cognosser el museo el dise che nò. In verità, quela roba la ze pi antiga de che tante altre e no ga mai ocoresto rangiarla. Alora ti te domandi se la ze stata metesta via in qualche posto. El omo el dise che nò. Ela la ga ciapà tanta piova e vento. E tanti i ga proà destruserla. Gnanca bon de creder, te te domandi: ‘Cossa gala de difarente?’

La Bìblia la ze come questa roba. La ze un libro ben vècio, pi vècio che tanti altri. L’è vera che ghen’è anca altri libri vèci. Ma, come tante robe che le se ga guastà col tempo, la pi granda parte de quel che l’è stà scrito in questi libri se ga perso. Sientisti i ga descobrio, par esémpio, prove de che quel che lori i disea sora la siensa no l’è mia giusto. Quel che lori i dise sora tratamento de salute no’l giuta quasi gnente. E tanto de quel che l’è stà scrito no l’è completo, parché tante dele so pàgine le se ga perso o le se ga rovinade col tempo.

Ma la Bìblia la ze tanto difarente. I ga scominsià a scriverla de pi de 3.500 ani indrio, ma no ghe manca gnanca un toco. E no l’è stà poche volte che i ga volesto destruserla: la ze stata brusada, proibia e no i ghe dea valor. Ma quel che la dise l’è restà fin ancoi. Invesse de esser vècia, la Bìblia la ga registrà robe vanti dela siensa.

Ma magari te te domandi: ‘Sarà che i consili dela Bìblia i ze boni nel mondo de ancoi?’ Par gaver la risposta, pensa in questo: ‘Quai che i ze i pedo problemi dele persone? Quai che i ne preocupa de pi?’ Fursi te pensi nela guera, nela rovina del pianeta, crime o corussion. Adesso varda arquante robe che la Bìblia la insegna. Alora domandate: ‘El mondo saria meio se le persone le fesse quel che la Bìblia la dise?’

AMAR LA PACE

“Felici i passificadori, parché lori i sarà ciamadi fioi de Dio.” (Mateo 5:9) “Tanto quanto l’è possìbile par valtri, sté in pace con tuti.” — Romani 12:18.

GAVER MISERICÒRDIA E PERDONAR

“Felice quei che i mostra compassion, parché i sarà tratadi con compassion.” (Mateo 5:7) “Seité soportarve un al altro e a perdonarve del tuto un al altro, anca se qualchedun el ga rason par brontolar contra nantra persona. Cossita come Geovà * el ve ga perdonà del tuto, valtri gavé de far compagno.” — Colossensi 3:13.

NO GAVER PRECONCETO

“De un omo sol [Dio] el ga fato tute le rasse par viver in tuta la tera.” (Ati 17:26) “Dio el trata compagno tute le persone. Alora no importa de ndove che lore le ze, parché lu el aceta tute le persone che lo rispeta e le fà quel che l’è giusto.” — Ati 10:34, 35.

RISPETAR LA NATURESA

“Alora Geovà el ga metesto el omo nel Giardin del Èden, par ténderlo e par coltivarlo.” (Génesi 2:15) Dio ndarà “finir fora quei che i rovina la tera”. — Apocalisse 11:18.

GAVER ÒDIO DELA GANÀNSIA E DELA IMORALITÀ

“Mantegné i oci verti e sté atenti a tuti i tipi de ganànsia, parché, anca quando qualchedun el ga abondansa, la so vita no la vien dele cose che el ga.” (Luca 12:15) “No sté gnanca parlar sora imoralità sessual, sora qualche tipo de impuressa e sora voler sempre de pi, parché l’è questo che se speta de quei che i serve a Dio.” — Efesi 5:3.

ESSER ONESTO E LAORADOR

“Volemo esser onesti in tute le cose.” (Ebrei 13:18) “Quel che el roba, che no’l robe pi. Pitosto el ga de far sforso e laorar de maniera onesta cole so man.” — Efesi 4:28.

GIUTAR I ALTRI

Gavé “de consolar quei che i ze desanimadi, de dar apoio ai fiachi, de gaver passiensa con tuti”. (1 Tessalonissensi 5:14) Gavé de “tender dei òrfani e dele védove nele so dificoltà”. — Tiago 1:27.

La Bìblia la fà de pi che dir de come gaver una vita meio. Ela la ne insegna a dar valor a questi consili e a meterli in pràtica. Se de pi persone le fesse quel che la Bìblia la dise, no te cati che gavarìssino manco problemi? In verità, i consili dela Bìblia i ne giuta ancoi ancora de pi! Ma nela pràtica, cossa che la Bìblia la pol far adesso par ti?

El omo pi sapiente el ga dito: “La sapiensa la se prova giusta par meso dei so resultadi.” (Mateo 11:19, nota) Par saver se un consìlio l’è bon toca méterlo in pràtica. Alora te pol pensar: ‘Se la Bìblia la ze pròpio bona, alora la ga de giutarme nela me vita. Ma come che la pol giutarme nei problemi che go adesso?’ Vedemo un esémpio.

Claudia, * la gavea una vita bona e felice. Ma de colpo, ga cambià tuto. La so fiola adolessente la ze morta, el so matrimònio el se ga finio e quel che ga vansà l’è stà dèbiti e de pi dèbiti. Ela la dise: “Son restada sensa saver cossa far. Go perso la me fiola, el me omo e anca la me casa. Son restada sensa forsa; mi no savea pi chi che mi era e gnanca no gavea pi motivi par viver.”

Claudia la ga sentio nela so vita come le parole del Salmo 90:10 le ze vere: “La durassion dela nostra vita la ze de setanta ani, o otanta par quei che i ze pi forti. Ma questi ani i ze pieni de dificoltà e tristessa. I passa svelti e suito ndemo sparir.”

Claudia la ze ndata in serca de aiuto nela Bìblia. E quel che la Bìblia la ga fato par ela l’è stà una roba de gnanca creder. Altre persone anca le se ga benefissià coi consili dela Bìblia. Lore le ga visto che la Bìblia la ze come quela roba vècia che ghemo parlà nel scomìnsio del artìcolo. Ela la ze tanto difarente de quei altri libri che col passar del tempo no i val pi gnente. Sarà che questo sucede parché la Bìblia la ga qualcossa che i altri libri no i ga? Sarà che ela la ze veramente la Parola de Dio? — 1 Tessalonissensi 2:13.

Fursi anca ti te ghè visto che la vita la ze curta e piena de problemi. Quando te ghè problemi che no te sè come dàrghene fora, ndove che te vè in serca de consolo, aiuto e consili?