La risposta dela Bìblia

 Par una persona esser batesada la ga de ndar soto la àqua con tuto el so corpo. a La Bìblia la parla de tante persone che le ze state batesade. (Ati 2:41) Una de lore l’è Gesù, che l’è stà batesà nel rio Giordon. (Mateo 3:13, 16) Ani dopo, un omo dela Etiòpia l’è stà batesà nte un posto ndove ‘ghen’era àqua’ darente dela strada che lu l’era drio viaiar. — Ati 8:36-40.

 Gesù el ga insegnà che tuti i so seghidori i ga de esser batesadi. (Mateo 28:19, 20) Anca el apòstolo Piero lo ga assà ciaro. — 1 Piero 3:21.

In questo artìcolo

•  Cossa che el batésimo el vol dir?

•  Cossa che la Bìblia la dise sora el batésimo dei bambini?

•  Cossa che vol dir esser batesà nel nome del Pare, del Fiol e del spìrito santo?

•  Batesarse nantra volta l’è un pecato?

•  Altri batésimi che la Bìblia la parla

•  Idee sbaliade sora el batésimo

 Cossa che el batésimo el vol dir?

 Quando una persona la se batesa ela la mostra ai altri che la se ga ciamà grama dei so pecati. La mostra anca che la ga prometesto a Dio che la ndarà far la so volontà, no importa quel che suceda, o sia, la ndarà obedir a Dio e a Gesù in tute le situassion. Quei che i vol viver par sempre i ghe ocore esser batesadi.

 Quando la persona la mete tuto el so corpo soto la àqua, la mostra che la ga cambià la so vita. La Bìblia la fà una comparassion intrà esser batesà e esser sepoltà. (Romani 6:4; Colossensi 2:12) Come cossita? Quando la persona la va soto la àqua con tuto el so corpo l’è come se la fusse morta parché no la fà pi le robe sbaliade che la fea vanti. Quando la vien fora dela àqua, la persona la mostra che la ze drio scominsiar una nova vita par far quel che Dio el vol.

 Cossa che la Bìblia la dise sora el batésimo dei bambini?

 La Bìblia no la insegna che i bambini i ga de esser batesadi.

 Ma la dise che ghen’è robe che la persona la ga de far se la vol esser batesada. Par esémpio, la ga de capir arquanti insegnamenti dela Bìblia e viver de acordo con quel che la ga imparà, la ga de ciamarse grama dei so pecati e far una orassion ndove la promete che la farà sempre quel che Dio el vol. (Ati 2:38, 41; 8:12) I bambini no i ze boni de far queste robe.

 Cossa che vol dir esser batesà nel nome del Pare, del Fiol e del spìrito santo?

 Gesù el ga dito in Mateo 28:19, 20 che i so seghidori i gavea de ‘far dissìpoli. . . , batesarli nel nome del Pare, del Fiol, e del spìrito santo. I gavea de insegnarghe a obedir tuto quel che lu el ghe gavea ordinà.’ (Mateo 28:19, 20) Le parole “nel nome del” le vol dir che la persona che la ze drio esser batesada la capisse e la aceta la autorità e la posission del Pare e del Fiol e la maniera come Dio el dopera el so spìrito santo. Un esémpio che ne giuta a capir meio l’è quando el apòstolo Piero el ga dito a un omo che l’era nassesto soto: ‘Nel nome de Gesù Cristo, el Nazareno, camina!’ (Ati 3:6) Piero el ga volesto dir che el capia e el acetea la autorità de Gesù e che sol l’è stà bon de far quel miràcolo par via de Gesù.

•   “El Pare” l’è Geovà b Dio. Lu l’è la autorità pi granda parché l’è el Creador, quel che el ga dato la vita e el Dio Tuto Poderoso. — Génesi 17:1; Apocalisse 4:11.

•   “El Fiol” l’è Gesù Cristo, che el ga dato la so vita par noantri. (Romani 6:23) Noantri sol podemo esser salvi se capimo e acetemo el laoro importante de Gesù in quel che Dio el vol far par le persone. — Gioani 14:6; 20:31; Ati 4:8-12.

•   “El spìrito santo” l’è la forsa che Dio el dopera, o sia, el so poder. c Dio el ga doperà el so spìrito santo par crear la vita e tuto quel che ghen’è, par parlar coi profeti e altre persone e par darghe el poder che i ghe ocorea par far la so volontà. (Génesi 1:2; Giò 33:4; Romani 15:18, 19) Dio anca el ga doperà el so spìrito santo par giutar quei che i ga scrito la Bìblia a scriver quel che lu el volea. — 2 Piero 1:21.

 Batesarse nantra volta l’è un pecato?

 Tante persone le desside cambiar de religion. Ma se la persona la ze belche batesada in nantra ciesa, sarà che se la se batesa nantra volta saria un pecato? Arquanti i dise de si parché fursi i pensa in Efesi 4:5, che dise: “Ghen’è un sol Signor, una sol fede, un sol batésimo.” Ma questo versìcolo no’l vol dir che una persona no la pol esser batesada nantra volta. Come cossita?

 Par capir meio. Quando Paolo el ga scrito Efesi 4:5, lu l’era drio parlar che l’era importante che i servi de Dio i fusse unidi in quel che i credea e nela fede. (Efesi 4:1-3, 16) Questa union sol la saria possìbile se lori i adoresse el medèsimo Dio, i gavesse la medèsima fede, o sia, i fusse boni de capir la medèsima roba de quel che la Bìblia la insegna e i fesse le medèsime robe che la Bìblia la dise par batesarse.

 El apòstolo Paolo el ga dito a arquanti che i era belche batesadi par batesarse nantra volta parché lori i se gavea batesà sensa capir ben i insegnamenti de Cristo. — Ati 19:1-5.

 L’è importante saver le verità dela Bìblia. Dio sol aceta el batésimo se la persona la cognosse le verità giuste dela Bìblia. (1 Timòteo 2:3, 4) Ma se una persona la se batesa dopo che la ga imparà insegnamenti che va contra quel che la Bìblia la dise, Dio no’l aceta el so batésimo. (Gioani 4:23, 24) Pol esser che una persona la catesse che la era drio far la roba giusta, ma ela no la gavea la “cognossensa giusta” par poder batesarse. (Romani 10:2) Par gaver la aprovassion de Dio la persona la ga de imparar le verità dela Bìblia, meter in pràtica quel che la ga imparà, dedicar la so vita a Dio e batesarse nantra volta. In queste situassion no l’è mia un pecato batesarse nantra volta. In verità, l’è la roba giusta de far.

 Altri batésimi che la Bìblia la parla

 La Bìblia la parla de altri batésimi che i ze stati difarenti del batésimo in àqua dei seghidori de Gesù. Vedi arquanti esempi:

 El batésimo che Gioani Batista el fea. d Gioani el batesea i giudei e altre persone che gavea acetà la religion del giudaìsmo. El so batésimo el mostrea che i se gavea ciamadi grami dei so pecati e de quel che i gavea fato contra la Lege che Dio el gavea dato ai israeliti par meso de Moisè. I batésimi che Gioani el fea ga giutà le persone a saver chi che l’era el Messia, o sia, Gesù, e acetarlo. — Luca 1:13-17; 3:2, 3; Ati 19:4.

 El batésimo de Gesù. Gioani Batista el ga batesà Gesù. Quel batésimo l’è stà difarente de qualche altro. Gesù l’era un omo perfeto e no’l gavea mai pecà. (1 Piero 2:21, 22) Cossita el so batésimo no’l volea dir che lu l’era drio ciamarse gramo o che el ghe ocorea de una bona cossiensa. (1 Piero 3:21) Invesse, lu l’era drio mostrar a Dio che el ndaria far la so volontà come Messia prometesto, o Cristo. Questo vol dir anca che lu ndaria dar la so vita par tuti noantri. — Ebrei 10:7-10.

 Batésimo con spìrito santo. Gioani Batista e Gesù i ga parlà sora el batésimo con spìrito santo. (Mateo 3:11; Luca 3:16; Ati 1:1-5) Ma l’è difarente del batésimo nel nome del spìrito santo. (Mateo 28:19) Parché i ze difarenti?

 Sol arquanti seghidori de Gesù i ze batesadi con spìrito santo. Lori i ze stati scoliesti par laorar con Gesù nel cielo come rè e sasserdoti, par quela i ze untadi con spìrito santo. e (1 Piero 1:3, 4; Apocalisse 5:9, 10) Lori i ndarà governar milioni de seghidori de Gesù che ndarà viver par sempre qua nela Tera. — Mateo 5:5; Luca 23:43.

 Batésimo in Gesù Cristo e nela so morte. Quei che i ze batesadi con spìrito santo anca i ze “batesadi in Gesù Cristo”. (Romani 6:3) Alora, questo batésimo l’è par i seghidori untadi de Gesù che ndarà governar con lu nel cielo. Quando lori i ze batesadi in Gesù, i scomìnsia a far parte dela congregassion de servi untadi. Gesù l’è el Testa de questa congregassion, e lori i ze el corpo. — 1 Corinti 12:12, 13, 27; Colossensi 1:18.

 I untadi anca i ze ‘batesadi nela morte de Gesù’. (Romani 6:3, 4) Lori i fà compagno a Gesù. La roba pi importante dela so vita l’è obedir a Dio invesse de contentar a si stessi. E cossita come Gesù, i sa che no i ndarà viver par sempre nela Tera. El batésimo nela morte de Gesù el finisse quando lori i more e i ressussita par viver nel cielo. — Romani 6:5; 1 Corinti 15:42-44.

 Batésimo con fogo. Gioani Batista el ga dito sora Gesù: “Lu li batesarà con spìrito santo e con fogo. El ga in man la so badila par spartir el formento dela paia, e el netarà del tuto el posto ndove lu el desgrana. El imuciarà el so formento nel paiol, ma el brusarà la paia nte un fogo che no’l pol esser smorsà.” (Mateo 3:11, 12) Gheto visto che ghen’è una difarensa intrà el batésimo con fogo e el batésimo con spìrito santo? Cossa che Gioani el ga volesto dir con questa ilustrassion?

 El formento l’è le persone che le scolta e le obedisse a Gesù. Alora le pol esser batesade con spìrito santo. La paia la ze le persone che no scolta Gesù, par quela le sarà batesade con fogo, o sia, le sarà finide fora par sempre. — Mateo 3:7-12; Luca 3:16, 17.