Pecato l’è qualche roba che femo, pensemo o sentimo che no l’è mia de acordo con quel che Dio el dise che l’è giusto. Quel che el fà un pecato no’l mostra rispeto par le lege de Dio, parché l’è drio far una roba che, par Dio, la ze sbaliada. (1 Gioani 3:4; 5:17) La Bìblia anca la dise che assar de far quel che l’è giusto anca l’è un pecato.

 Nele léngue in che la Bìblia la ze stata scrita, le parole par pecato le vol dir “no rivar al ogetivo”. Par esémpio, un grupo de soldadi del Israel antigo l’era bon de trar sassi cola fionda “sensa sbaliar”. Questa spression anca la pol esser tradusida come “sensa pecar”. (Giuisi 20:16) Alora, pecar vol dir no rivar al ogetivo de far quel che Dio el dise che l’è giusto.

 Come Dio el ne ga creà, Lu el ga el dirito de dessider quel che l’è giusto o sbalià par le persone. (Apocalisse 4:11) Noantri ghemo de risponder a Dio par quel che femo. — Romani 14:12.

Sarà che semo boni de no far gnanca un pecato?

 Nò. La Bìblia la dise che “tuti i ga pecà e no i pol far compagno ale bele qualità de Dio”. (Romani 3:23; 1 Rè 8:46; Eclesiasti 7:20; 1 Gioani 1:8) Parché che l’è cossita?

 I primi umani, Adon e Eva, no i era pecadori. Lori i ze stati creadi perfeti, ala imàgine de Dio. (Génesi 1:27) Quando lori i ga desobedio a Dio, lori i ga assà de esser perfeti. (Génesi 3:5, 6, 17-19) Quando i ga bio fioi, lori i ga passà el pecato e la imperfession par i so fioi, come una malatia che la vien de fameia. (Romani 5:12) Cossita come el rè Davi el ga dito: “Mi son belche nassesto colpà.” — Salmo 51:5.

Sarà che ghen’è un pecato pedo del altro?

 Si. Par esémpio, la Bìblia la dise che i òmini dela cità de Sodoma i era “rugni, grandi pecadori”, e che el so pecato l’era “tanto bruto”. (Génesi 13:13; 18:20) Varda tre robe che mostra che un pecato el pol esser pedo del altro.

1.   Tipo del pecato. La Bìblia la dise che gavemo de evitar far bruti pecati, come far imoralità sessual, idolatria, ocultismo o strionaria, ciavar soldi dei altri, bever massa o assassinar. (1 Corinti 6:9-11; Apocalisse 21:8) La Bìblia la mostra che questi bruti sbali i ze difarenti de far un pecato sensa voler o sensa esser aposta, come par esémpio parlar o far qualcossa che disgusta i altri. (Proverbi 12:18; Efesi 4:31, 32) Ma la Bìblia anca la ne mostra che no podemo veder gnanca un pecato come se fusse una roba sensa importansa, parché se femo cossita, pi tardi, poderemo far pecati ancora pi bruti. — Mateo 5:27, 28.

2.   Motivassion. Arquante persone le fà pecati parché no le cognosse le lege de Dio. (Ati 17:30; 1 Timòteo 1:13) Questo l’è difarente de desobedir aposta le lege de Dio, ma de acordo cola Bìblia, l’è ancora un pecato (Nùmeri 15:30, 31) Far un pecato aposta mostra che la persona la ga un “cuor rugno”. — Geremia 16:12.

3.   Quante volte che lo fà. La Bìblia anca la mostra che ghen’è difarensa intrà pecar sol una volta e seitar a far un pecato par tanto tempo. (1 Gioani 3:4-8) Dio el condana la persona che la impara quel che l’è giusto e ancora cossita la seita a pecar aposta. — Ebrei 10:26, 27.

 Quel che el fà un bruto pecato fursi el sinta un peso nela so cossiensa par via dela colpa. Par esémpio, el rè Davi el ga scrito: “Parché i me sbali i ze par sora dela me testa. Come un peso, i ze massa fadiga par mi portarli.” (Salmo 38:4) Ma la Bìblia la ne dà questa speransa: “La persona rugna la ga de assar la so strada, e quel che el fà robe rugne, i so pensamenti. Lori i ga de tornar a Geovà e el gavarà misericòrdia. I ga de tornar al nostro Dio, parché li perdonarà del tuto.” — Isaia 55:7.