Nò. La Bìblia la dise che gavemo de pregar sol a Dio, ntel nome de Gesù. Gesù el ga dito ai so dissìpoli: “Alora, gavé de orar cossita: ‘Pare nostro che te sì ntei cieli, santificà sia el to nome.” (Mateo 6:9) Lu mai el ga dito che i so dissìpoli i gavaria de pregar ai santi, ai àngeli o a qualche altra persona che no sia Dio.

 Gesù anca el ga dito ai so dissìpoli: “Mi son la strada, e la verità, e la vita. Nissun riva al Pare senò par meso de mi.” (Gioani 14:6) Dio el ghe ga dato sol a Gesù la autorità par portar le nostre orassion a Dio. — Ebrei 7:25.

E se mi prego a Dio e anca ai santi?

 Come parte dei Diese Comandamenti, Dio el ga dito: “Mi, Geovà, el to Dio, son un Dio che vui la adorassion sol par mi.” (Ésodo 20:5) Cossa vol dir che Dio ’vol la adorassion sol par lu’? Isaia 48:11 dise cossita: “Mi no dao la me glòria a nissun altro.” Dio el vol che la nostra adorassion e anca le orassion sìpia fate sol a lu.

 Se preghemo a qualchedun altro, sia santi o àngeli, semo drio ofender a Dio. Quando el apòstolo Gioani el ga proà adorar un àngelo, el àngelo no lo ga assà e el ghe ga dito: “No stà far cossita! Mi son sol un schiavo come ti e i to fradei, che gavé de dar testimònio sora Gesù. Adora a Dio!” — Apocalisse 19:10.