Silempwale ni Luka 21:1-38
21 Yesu awehakaru nipuro yaahiiwalaayavo ekaaxa yaaheliwa soovaha, aawoona atthu amuhakhu ehelakamo soovaha saya mukoofirini* mmwe.
2 Aamoona-tho muthiyana mmoha naamukhweli oohaawa ahelakamo mukoofirini* mmwe makhoopiri meeli,* oohikhalano mwiitti,
3 ni aaheera: “Kinnooleelani ekhaikhai: Weera muthiyana ola naamukhweli, oovonyeramo mukoofirini mu musurukhu waapwaha atthu ootheene evonyenremo.
4 Woona weera ootheene yaale evonyenremo soovaha* yaahanlaayano, mene muthiyana ola naamukhweli moohaawani mwawe, ovonyenremo itthu sootheene aaraaweno weera akhale mukumi.”
5 Muhoolo mwaya, vaavo atthu akina yuulumaaya woohima sa etemplu moota yaapakinwaaya ni maluku ooreera ni soovaha aavahiwaawe Muluku,
6 owo aaweerela: “Woohima sa itthu iya munoonaanyu, enoophiya mahiku nihinrowaaya ohala nluku vasulu va nluku nikhwaaya nihimoroxelinwe vathi.”
7 Vano yaamukoha: “Muhusiha, itthu iya sinrowa weereya liini? Ni teevi eneera ekhale ethoonyero enkela wooniheraka weera itthu iya sihanle weereya?”
8 Yesu, aaweerela: “Mwiikosoope weera ahikhale anoowokeeni, woona weera antxipale enoowa mwa nsina naka, yeeraka: ‘Ti miyo’, ni yeeraka: ‘Etempu yaalaiherinwe yookhuveela.’ Muhaatthare awo.
9 Opwaha mwa yeeyo, mwiiwa vale suulummwaka woohima sa ekhotto, ohiiwanana, muhituthuwe. Okhala weera itthu iyo sintthuneya weera ikhumelele toko, mene elapo khenkela omala etempu ene yeeyo.”
10 Vano owo aaweerela: “Muloko onoowana ni muloko mukina, elapo ni elapo ekina.
11 Onookhumelela otetereya otokweene wa elapo* mapuro oovirikana, enoothowa yootxa, ni inookhumelela ikwerere,* ni atthu enimoona itthu soowoopiha ni ithoonyero wiirimu.
12 “Mene, sihinaaye weereya itthu sootheene iya, nyuwosa munootthukiwa ni munoottharatthariwa, munooroihiwa musinakooka, ni mukateya ni munooroihiwa ohoolo wa mamwene ni makovernatore mwaha wa nsina naka.
13 Eyo enookumihera eparakha weera muhelele onamoona.
14 Nto mukhaleno yoolakela ya vamurimani ya ohireherera woopatxerani ele munkelaanyu wuuluma weera mwiisaakihe,
15 mwaha wooweera miyo, kinimoovahani masu ni miruku seiyo amwiittani anyu ootheene ereene vamoha ehinkelaaya ovirikanya naari ovaanya.
16 Opwaha mwa yeeyo, nyuwosa muneereke oveleeliwa mpaka ni asipapinyu, asinninyu, amusi anyu ni asinthamwene anyu, ni awo enimooveleelani akina a nyuwo mookhwaani,
17 ni nyuwosa muneereke wiittiwa ni atthu ootheene mwaha wa nsina naka.
18 Mene naari niihi nimoha mano na mmuruni mwanyu, khaniriheya.
19 Nto mwaha wa ovilela wanyu, munoovuluxa ekumi anyu.
20 “Menento, mwamoona vale Yerusalemu arukureerinweene ni anakhotto, musuweleke weera onyaanyiwa wawe wohaattamela.
21 Vano, ale eneera ekhale oYudeya, etthawele omwaako, ale eneera ekhale oYerusalemu ekhume, ni ale eneera ekhale omatta ehitthikele ovolowa esidade ya oYerusalemu,
22 mwaha wooweera mahiku ene yaawo, Muluku onimwaathoriha* atthu weera sikwanele itthu sootheene silempwale.
23 Ootakhaliwa athiyana oorupala ni ale eneera ewaamwiheke anamwane aya mahiku ene yaawo! Mwaha wooweera onookhala ohaawa otokweene elapo ela, ni isara sa Muluku sinimwaakhumelela atthu ala.
24 Ni awo enimwiiviwa ni ekatana, ni akina enoomwaramwareliwa maloko ootheene; ni Yerusalemu onoonyikaliwa ni amalapo mpaka okwanela etempu ya amalapo awo.
25 “Opwaha mwa yeeyo, inookhumelela ithoonyero vansuwani, vamweerini ni muthenyeerini; ni va elapo ya vathi, atthu a elapo enoovalavela ehisuwelaka etthu yoopaka mwaha wa oruma ni ottikinyeya wa ephareya.
26 Atthu anookomoka mwaha woowoova itthu sineera seereye elapo ya vathi, mwaha wooweera itthu siri wiirimu sinoottikinyiwa.
27 Ni enoomoona Mwaana a Mutthu awaaka mmahutteni wiirimu ni owera ni ovuwa otokweene.
28 Mene itthu iya sapatxera weereya, mweemele ni mweemexe muru anyu, mwaha wooweera ovuluxiwa wanyu onrowa okhala vakhiviru.”
29 Nto mwaha wa yeeyo, aahaaleela niphwanaphwaniho nimoha eeraka: “Muupuwele* mwiri wa efiiku ni miri mikina sootheene.
30 Sapatxera vale ophuwa, nyuwo munnoona, ni munnasuwela weera elimwe eri vakhiviru.
31 Vamoha-moharu, moona vale itthu sootheene iya seereyaka, musuwele weera Omwene wa Muluku ori vakhiviru.
32 Kinnooleelani ekhaikhai weera atthu a mahiku ala khanrowa omala itthu iya sihinaaye weereya.
33 Erimu ni elapo enoolakaseya,* nto masu aka enoovirelela okhala wa mahiku ootheene.
34 “Mwiikosoope ni otxa vantxipale ni owura, ni soovalaveliha sa mweekumini mwanyu weera sihinanarihe muupuwelo anyu. Ni weera muhitutuxeriwe nihiku nno noophwanyakani mootutuxera,
35 ntoko mwaamunama ommorela vamuraakhoni. Woona weera nihiku nno ninrowa waaphwanya atthu ootheene a elapo ya vathi mootutuxera.
36 Tivanto, mukhale oowehaweha ni mpakeke mavekelo voohihiyerereya, weera nwere oviriha itthu sootheene sinrowa weereya, ni nwere okhala ooweemeleene ohoolo wa Mwaana a Mutthu.”
37 Nto, Yesu annaviriha nihiku nootheene axuttihaka mutemplu, nto wiila vale, owo annarowa okona mwaako wa Oliveira.
38 Nto atthu ootheene yannarowa mutemplu oxeexelo weera yamwiiwelele Yesu.
Footnotes
^ Naari: “mukaaxani.”
^ Naari: “mukaaxani.”
^ Ni eKereku: “ilepitoni 2.”
^ Naari: “itoroku saya.”
^ Naari: “ethaya.”
^ Naari: “iretta.”
^ Naari: “onoowinlela ikukuttula.”
^ Naari: “nwehe.”
^ Naari: “enoomala.”
