KHUUVO OHIMPHAVELA OPHENTIWA. Wira ekasamento, emusi, wala opatthani olipe, ohaana okhala ophenta. Nave-tho wira nikhalane ekumi yooloka ni yoohakalaliha, nihaana okhalana ophenta. Masi exeeni ekhanle “ophenta”?

Mwaha ola khonitthokiherya osivelana wa mulopwana ni muthiyana, nnaamwi osivelana iwo ori ene wootthuneya. Masi, onitthokiherya ophenta onimwiiriha mutthu ophavela waakhaliherya akina, ohiya ophavelasa mureerelo awe paahi. Ophenta moota owo oneettihiwa ni miruku sa Muluku, ni onihela muhina waathokorerya akina.

Biibiliya onnitthokiherya ele ekhanle ophenta oriki: “Ole omphenta t’òvilela, t’òwarumela akhw’awe, khanakhalela nrima; khanìvuwiha, khanìkuxererya. Ole omphenta onnalemeliha akhw’awe, khamphavela murerelo awe, khaniviruwa, khanùpuwela sotakhala sìreliwawe. Ole omphenta khansiveliwa n’itthu sohiloka, nto onnitteliwa murima n’ikekhai. Ole omphenta onnakhurunuwela atthu othene, . . . onniroromela vohihiyererya, onnivilela sothene. Ophenta khummala-tho”.​—1 aKorinto 13:4-8.

Ophenta “khummala-tho” mwaha woowi ophenta iwo onookhala okathi wotheene. Nto ohaana wunnuuheriwa khula okathi. Nave okhala wira ole omphenta toovilela, toowaarumeela akhwaawe, ni toolevelela, nto ophenta iwo ori ntoko ‘nlutte nimmaleliha’ wiiraana. (aKolosi 3:14, Biblya Exirima) Otheene ahu naatthu oohimalela. Masi vaavo nnooniherya ahu ophenta moota owo, ninnihakalala ni okhala saana. Mwa ntakiheryo, nithokorerye wiiraana wa anamathelana.

Yesu Kristu aahivaha miruku sinaakhaliherya anamathelana. Owo aahimmye so: “‘Tivó, mulopwana onimwahiya atithi awe n’ame awe, wira aphitane ni mwar’awe: òwanli aya enakhala mutthu mmosá pahi’ . . . Tivó, yeyo Muluku ephitanyalyawe mutthu ahimwalanyihé-tho”. (Matheyo 19:5, 6) Niwehe iponto piili suulupale sinniixuttiha aya yoolepa ela.

“ÒWANLI AYA ENAKHALA MUTTHU MMOSÁ PAHI”. Ekasamento enitaphulela wiiraana wa atthu anli paahi. Nto ophenta onnikhaliherya wira anamathelana awo ahiraruwelane. Ole oniraruwa onniikhaliha “erutthu emosaru” ni mutthu ohithelanne awe. (1 aKorinto 6:16; aHéberi 13:4) Oraruwa onnikumiherya ohiroromelana ni onnihonona ekasamento. Akhala wira anamathelana awo aayara, nto anamwane pooti ohaawa. Eyo pooti owiiriha onanariwa, wuupuwela wira khaniphentiwa, ni ohimoona mutthu oomuroromela.

“YEYO MULUKU EPHITANYALYAWE”. Ekasamento ekumiheriwe ni Muluku. Nto anamathelana anittittimiha othelana waya, annimananiha olipiha ekasamento aya. Nto okathi wa mixankiho, awo khaniphavelasa enamuna yoomwalana. Ophentana waya ti woolipa ni wooloka. Ale aniphentana ‘annivilela sothene’. Eyo ennaakhaliherya ophuka mixankiho sa vatthokoni, nto khiyakhala mowiiwanana ni murettele.

Anamwane annihakalala vanceene vaavo anaaweha aya anamuyari aya aphentanaka ni apakaka itthu mmureerelo wa emusi. Mwali mmosa oniitthaniwa Jessica, ohimyale so: “Apaapa ni amaama anniphentana ni ottittimihana mwekeekhai. Nto vaavo kinaawehaka amaama yaattittimihaka apaapa, eyo ennikiiriha ophavela waatakiha amaama”.

Ophenta ti mukhalelo muulupale wa Muluku. Tthiri, Biibiliya onihimya wira “Muluku ophentá”. (1 Yohani 4:8) Ti maana aya Yehova oniitthaniwa awe “Muluku oohakalala”. (1 Timótheyo 1:11, Tradução do Novo Mundo) Nto natakiha mikhalelo sawe, vanceenexa ophenta, ni hiyo ninrowa ohakalalaka. Eliivuru ya aÉfeso 5:1, 2 eniira so: “Mutthareke mwettelo wa Muluku, okhala wira mw’àn’awe òphentiwa. Mwetteke mophentani”.