ATTHU TOOVIRIKANA NI INAMA MWA INAMUNA SINCEENE: HIYO NNOOWERYA OLEPA, OPINTARI, OPAKA ITTHU, NI OPHAVELASA WAAKHULIWA WA MAKOHO OOTEPA OTTHUNEYA A OKUMI: Mwa ntakiheryo, olumwenku okhumelenle sai? Hiyo ninkhuma woowi? Tiivi ekhanle yoolakela ya okumi? Exeeni enrowa wiiraneya muhoolo?

Atthu akina annisyaka makoho awo, maana anuupuwela wira hiyo khininwerya osuwela waakhuliwa waya. Akina anihimya wira makoho awo kharina efaita maana hiyo nroothatuwa. Mwa ntakiheryo, prusoore a Universidade William Provine yoowo onimusomiha história ni biologia ohimyale wira “khakhanle amuluku, nnakhala yoolakela ya okumi. Khakhanle malamulo oosuwanyeya anikhaliherya osuwela ele eri yooloka ni ele eri yootakhala; okumi khorina yoolakela”.

Masi, akina anihimya wira muupuwelo owo ti woohiloka. Awo annoona wira erimu ni elapo ti sootthokiheya, ni sinnivara muteko mwa enamuna yooreera. Annitikinihiwa ni itthu siri molumwenkuni, seiyo apinaatamu aneererya aya otakiha okathi anipaka aya itthu saya. Nto awo anuupuwela wira itthu sootikiniha siri wiirimu ni valaponi, sinooniherya wira ookhala Mpattuxa yoowo opanke itthu sotheene.

Eyo yoowiiriha atthu akina yaakupali wira itthu siroothatuwa, oturuka muupuwelo aya. Moone matakiheryo ala manli:

NEUROCIRURGIÃO DOUTORE ALEXEI MARNOV. “Ixikola sisomme aka, saaxuttiha wira Muluku khokhanle ni wira itthu siroothatuwa. Ale yaakupali wira Muluku ookhala, yaahimmwa okhala alolo”. Masi eyaakha ya 1990, owo aahipacerya oturuka muupuwelo awe.

Alexei onihimya so: “Miyo kaamakela wuupuwela moota itthu sinivara aya muteko, ohela muhina oramattha wala ottoopare. Oramattha onnihimmwa okhala etthu yootepexa otikiniha molumwenkuni. Masi niireke owo opakiwe wira omukhaliheryeke mutthu osuwela itthu nuumala-vo khiyakhwa? Eyo khiyaakhalela! Nto kaaniikoha: ‘Hiyo nikhumelenle sai? Tiivi ekhanle yoolakela ya okumi?’ Nuumala wuupuwelela vanceene, kaahikupali wira ookhala Mpattuxa”.

Ophavelasa yoolakela ya okumi, waahimwiiriha Alexei omutokosa Biibiliya. Muhoolo mwaya, mwaarawe, yoowo nave okhanle meedika masi aahaakupali wira Muluku ookhala, aahipacerya omusoma Biibiliya. Woopaceryani, aaphavela omooniherya iyawe paahi wira Biibiliya kholonke! Masi vano, oowanli annikupali wira Muluku ohaavo. Nave ahiixutta yoolakela Muluku orina awe wa apinaatamu, ntoko Biibiliya oniixuttiha awe.

SIENTISTA DOUTORE HUABI YIN. Huabi Yin, yoowo omusomme física, ooviriha iyaakha sinceene otokosaka nsuwa. Huabi onihimya so: “Ikwaha sotheene hiyo masientista ninsoma ahu makhalelo a olumwenku, ninnoona wira itthu sotheene siri wiirimu ni valaponi ti sootthokiheya saana ni sookhalana malamulo anikhapelela itthu iyo. Nto miyo kaaniikoha so: ‘Malamulo awo akhumenle sai? Akhala wira mooro onirumeela ahu wira naapeye yoolya, nihaana okhapelela saana, ti pani opanke malamulo aneettiha nsuwa?’ Muhoolo mwaya, kaahoona wira waakhuliwa wooloka wa makoho awo ori mBiibiliyani: ‘Wopajeryani, Muluku opattunxe erimu n’ilapo ya vathí.’”​—Maphattuwelo 1:1.

Moohaaniherya, siensia oonikhaliherya osuwela moota itthu sikina sinivara aya muteko. Mwa ntakiheryo, iseelula sa ottoopare sinivara sai muteko? Moota xeeni nsuwa nnikumiherya aya oviha ni waarya? Masi amurumeelaka Biibiliya Alexei ni Huabi ahiixutta nthowa naya itthu sikhumelenle aya: Mwa ntakiheryo, aaphwanya waakhuliwa wa makoho ala: Olumwenku okhumelenle sai? Xeeni akhanle aya malamulo anikhapelela erimu ni elapo? Apinaatamu akhumelenle sai?

Biibiliya onnilavula sa elapo oriki: ‘Muluku khopattunxe elapo ehirina etthu, masi ùpale wira ekhaleke-mo atthu’. (Yesaya 45:18) Tthiri, Muluku ookhalana yoolakela ni elapo ela. Nto mwaha onittharelana ninrowa oweha moota yoolakela eyo enivarihana aya ni nlipelelo nahu na muhoolo.