1, 2. (a) ‘Yovaha yotikiniha’ ya Muluku enihela muhina exeeni? (b) Makoho xeeni anirowa ahu othokorerya mwaha ola?

YEHOVA ohooniherya oniphenta wawe wuulupale, vaavo vanivahale awe Mwanawe mmoseene. (Yoh. 3:16; 1 Yoh. 4:9, 10) Murummwa Paulo onniitthana yoovaha eyo okhala ‘yovaha yotikiniha’ wala yuulupale ya Muluku. (2 aKor. 9:15) Xeeni Paulo aarumenle awe moolumo awo?

² Paulo aanisuwela wira soolakela sotheene sa Muluku saarowa wiiraneya mwaha wa mukuttho wa okumi woomalela wa Yesu. (Mmusome 2 aKorinto 1:20.) Ela enooniherya wira “sovaha sotikiniha” sa Yehova khahiyo paahi mukuttho wa Yesu, masi sinihela muhina oreera murima ni ophenta Yehova onrowa awe onooniherya muhoolo. Mwekeekhai, yoovaha eyo ti yootikiniha vanceene, vahiniweryaneya awe pinaatamu otthokiherya oratteene. Nooneleke sai yoovaha eyo yuulupalexa? Nto yoovaha ela enrowa onikhaliherya  sai okathi oniilokiherya ahu Wuupuwelela Okhwa wa Yesu, enamararu, 23 a Março, 2016?

3, 4. (a) Munoona sai okathi munivahiwa anyu etthu? (b) Moota xeeni yoovaha ya vameekhaaya ekhanle aya oorukunuxa okumi anyu?

³ Ninnihakalala vanceene navahiwa etthu. Soovaha sikina ti sootthuneya vanceene ni pooti orukunuxa okumi ahu. Mwa ntakiheryo, muupuwele akhala wira munihimyaniwa opaka ekrime, nto mwaha wa yeeyo, muhaana wiiviwa. Mootutuxerya, onnikhumelela mutthu muhinimusuwela anyu, onaivahererya wira okhwe nipuro nanyu. Aayo, mutthu owo onneemererya wookhwelani! Mwaarowa woonela sai yoovaha eyo?

⁴ Tthiri yoovaha eyo yuulupale, yanwiirihani wuupuwelela saana okumi anyu, wira nwehe akhala wira ehaavo etthu enireerela olokiherya. Pooti wira yanwiirihani okhala mutthu oovaha ni waaphenta akina nave waalevelela ale anootthekelani. Nto okumi anyu wotheene mwaarowa ophavelaka wooniherya wira munnixukhurela ole wiivaherenrye wira ookhweleni.

5. Moota xeeni yoovaha ya Yehova eryaaya yootepa otthuneya ovikana soovaha sikina?

⁵ Tthiri yoovaha ya Yehova ti yootepa otthuneya ovikana yoovaha eromoliwe ntakiheryo niromoliwe vasulu-va. (1 Ped. 3:18) Xeeni nnihimya ahu siiso? Mwaha woowi otheene ahu noottheka, nto noolamuliwa okhwa. (aRom. 5:12) Mwaha wooniphenta, Yehova ooniruuhela Mwanawe valaponi wira “àkhwele atthu othene”. (aHéb. 2:9) Yehova oopaka mareheryo wira omala-malihe okhwa, ohiya paahi onikhaliherya ovikaniha okhala akumi, ntoko siirale awe mulopwana oromoliwe ntakiheryo vasulu-va. (Yes. 25:7, 8; 1 aKor. 15:22, 26) Otheene yaale anooniherya omwaamini waya Yesu animwaakhela okumi woohimala valaponi, akhalaka ni murettele ni ohakalala, nto ale oowoottihiwa ni munepa wootteela, anrowa olamulelaka vamosa ni Kristu Moomweneni wa Muluku. (aRom. 6:23; Wis. 5:9, 10) Mareeliho xeeni makina aniirela mpantta yoovaha ela ya Yehova?

6. (a) Mareeliho xeeni a Yehova anikumiheriwa ni yoovaha awe, anilipelela anyu vanceene? (b) Itthu xeeni tthaaru ninrowa ahu othokorerya mwaha ola?

⁶ Yoovaha ya Yehova enihela muhina openuxiwa aretta, okhalihiwa eparayiisu valaponi, ni ohihimuxiwa alipa-ookhwa. (Yes. 33:24; 35:5, 6; Yoh. 5:28, 29) Tthiri ninnimuxukhuru Yehova ni Mwanawe mwaha wa “yovaha yotikiniha”. Nto nikoho ninkhumelela tinla: Ophenta wa Muluku oniiriheke opaka exeeni? Nrowe nithokorerye moota ophenta wa Muluku onniiriha aya (1) omutthara Yesu vakhiviru vene, (2) waaphenta annihu, ni (3) waalevelela akina ni murima wotheene.

7, 8. Nooneleke sai ophenta wa Kristu, nto eyo eniiriheke opaka exeeni?

⁷ Wanipacerya, nohaana orumeela okumi ahu nimuttharaka Yesu Kristu. Murummwa Paulo ohimmye so: “Ophenta wa Kristu t’onkikhanyereriha”. (Mmusome 2 aKorinto 5:14, 15.) Paulo aanisuwela wira khivaniweryaneya mutthu waakhulela ophenta wa Kristu, masi mutthu owo ahitthunaka omutthara. Osuwela oratteene ele Yehova oniirenle awe, onniniiriha omphenta ni ophavelaka okhala mwa enamuna Yesu oneemererya awe. Ninrowa opaka sai?

⁸ Ale animphenta Yehova anniphavela otthara ntakiheryo na Kristu, amuttharaka vakhiviru vene. (1 Ped. 2:21; 1 Yoh. 2:6) Hiyo  ninnooniherya omwiiwelela Muluku ni Yesu, naawiiwelelaka. Yesu ohimmye so: “Ole onakhela ikano saka anettela, yowo t’onkiphenta. Vano ole onkiphenta onophentiwa n’Atithi: nave miyo kinomphenta, kinimwìsuweliha wa yowo”.—Yoh. 14:21; 1 Yoh. 5:3.

9. Mixankiho xeeni sinniphwanya?

⁹ Okathi onaattamela aya Niira na Wuupuwelela, nohaana wuupuwelela oratteene moota oneettiha ahu okumi ahu. Niikoheke so: ‘Mipantta xeeni sa okumi aka kinimutakiha aka oratteene Kristu? Itthu xeeni sinitthuneya olokiherya?’ Vannireerela wiikoha moota owo, okhala wira khula nihiku ninnikhanyereriwa otthara iphiro sa olumwenku ola. (aRom. 12:2) Naahikhalane ephoole, pooti opacerya waatthara mafilosofu wala atthu oovuwa a mulaponi. (aKol. 2:8; 1 Yoh. 2:15-17) Ninrowa owerya sai okhootta itthu iyo?

10. Makoho xeeni anireerela wiikohaka okathi ola onaattamela aya Niira na Wuupuwelela, nto oniiriheke opaka exeeni? (Nwehe elatarato yoopacerya.)

¹⁰ Hiyo pooti orumeela okathi onaattamela Niira na Wuupuwelela, wira nivarerye ikuwo sahu, ifilme siniweha ahu, muusika oniwiriyana ahu, itthu siri mukomputadoreni mwahu, muselulareni wala tablet ahu. Okathi onivarerya anyu ikuwo sanyu, mwiikoheke so: ‘Vaakhanle wira Yesu aari vaava khuweha ikuwo kiwanre aka, kiireke kaamuuliwa muru?’ (Mmusome 1 Timótheyo 2:9, 10.) ‘Kiireke ikuwo saka sinnooniherya wira kinnimutthara Kristu?’ Wala pooti wiikohaka so: ‘Kiireke Yesu aamusiveliwa oweha efilme kiniweha aka wala owiriyana masipo kiniwiriyana aka? Vaakhanle wira Yesu oomoola telefoni wala tablet aka, kiireke kaamuuliwa muru ni itthu saarowa awe ophwanya?’ Voohimya sa axooku a mukomputadoreni, mwiikoheke so: ‘Kiireke kanwerya omutthokiherya Yesu nthowa naya vanikisivela awe xooku ola?’ Omphenta wahu Yehova ohaana oniirihaka oriha wala ottipiha itthu soohikhalela hata etthu eyo eryeene ya musurukhu munceene. (Mit. 19:19, 20) Nihiku naabatiziwa ahu, naahihimya wira khinaarowa-tho okhalaka moovarihana ni sootthuna sahu, masi naarowa opakaka yootthuna ya Kristu. Nto, nihivarexexeke etthu yaarowa oniiriha ohimutthara Kristu vakhiviru vene.​—Math. 5:29, 30; aFil. 4:8.

11. (a) Omphenta wahu Yehova ni Yesu onniiriha opaka exeeni mmuteko woolaleerya? (b) Ophenta onrowa oniiriha sai waakhaliherya annihu mmulokoni?

¹¹ Omphenta wahu Yesu onniniiriha okhalela nthiti olaleerya ni waapaka awiixutti. (Math. 28:19, 20; Luka 4:43) Okathi wa Niira na Wuupuwelela nnookhalana eparakha yoorumeela ntoko mapioneero ookhaliherya, nivahaka iwoora 30 wala 50. Niireke munoopaka mareheryo wira mukhale pioneero? Munna mmosa naamukhweli a iyaakha 84, uupuwela wira khaawerya okhala pioneero mwaha wa wuuluvala wala owereyasiwa. Nto mapioneero a muloko awe yaaniphavela omukhaliherya. Yaahiivahererya ompakhira ni ekaaro aya, ni othanla muttetthe wookhuveela wira munna ole oweryeke olaleerya. Nto wanikisa wa mweeri, aahiwerya ovahererya iwoora 30. Niireke munoowerya omukhaliherya munna wala murokora a muloko anyu wira okhale pioneero ookhaliherya myeeri sa Março ni Abril? Ekeekhai wira khahiyo otheene anniwerya okhala mapioneero. Masi pooti orumeela okathi ni ikuru sahu wira nincererye muteko ahu woolaleerya myeeri iyo. Opaka eyo nimmutakiha Paulo yoowo aasiveliwa omphenta Kristu. Omphenta wahu Muluku onrowa oniiriha opaka exeeni?

12. Ophenta wa Muluku onniiriha opaka exeeni?

¹² Ya nenli, ophenta wa Muluku ohaana oniiriha waaphenta annihu. Murummwa Yohani aanisuwela eyo. Nto owo olempe so: “Axinn’aka òphentiwa: okhala wira Muluku òniphenta vanjene sisa, weso ni hiyo-tho nihana ophentana mukina ni mukhw’awe”. (1 Yoh. 4:7-11) Khivaniweryaneya weemererya ophenta wa Muluku, masi khiyakhootta waaphenta annihu. (1 Yoh. 3:16) Ninrowa wooniherya sai wira ninnaaphenta annihu?

13. Ntakiheryo xeeni Yesu ovahale awe voohimya sa waaphenta akina?

¹³ Muthokorerye ntakiheryo na Yesu. Okathi aalaleerya awe elapo ya vathi, owo aanaathokorerya vanceene alipa-oohaawa. Aaniphavela waakhaliherya atthu yaarina iretta, ntoko alipa-oorakala, oohoona, oohiiwa ni ahinilavula. (Math. 11:4, 5) Yesu aanisiveliwa owiixuttiha atthu yaavoliwe etala yomunepani, yaawo yooniwa okhala ‘òthanyeya’ ni ahooleli a etiini. (Yoh. 7:49) Aanaaphenta atthu awo oohaawa ni aaniimananiha vanceene wira aarumeeleke.—Math. 20:28.

14. Exeeni ekhanle anyu oopaka wira mooniherye waaphenta anninyu?

¹⁴ Okathi onaattamela Niira na Wuupuwelela ti wooreerela omutakiha Yesu wira naathokoreryeke anna ni arokora a muloko ahu. Munooweha wira aakhala akina yaarowa ottottela mureerelo nikhaliheryo nanyu, vanceenexa anna ni arokora oowuuluvala. Niireke mwanwerya waaxukurya vatthokoni vaya? Niireke mwanwerya owaapeela yoolya, waakhaliherya miteko sa vate, waahoola omuthukumanoni wala orowa olaleerya hoothe? (Mmusome Luka 14:12-14.) Ophenta wa Muluku oniiriheke ophavela waakhaliherya annihu wala waaphentaka ni murima wotheene.

15. Exeeni enireerela ahu weemereryaka?

¹⁵ Ya neeraru, ophenta wa Yehova ohaana oniirihaka ophavela waalevelela anna ni arokora. Okhala wira otheene ahu ninkhuma wa Adamu ni nooravihiwa etampi ni okhwa, nto khuuvo oniwerya ohimya wira “Miyo nkiniphavela mukuttho”. Hata murumeyi a Yehova ootepexa ororomeleya, owo onlipa ni oreera murima wa Yehova, orweela mwa mukuttho  wowoopola wa Yesu Kristu. Khula mutthu ohaana osuwela wira ooleveleliwa vanceene. Xeeni vanitthuneya aya osuwela eyo? Nrowe noone waakhuliwa waya, ni nlikanyiho nimosa Yesu aapanke awe.

16, 17. (a) Nniixutta exeeni nlikanyiho Yesu aapanke awe voohimya sa mwene ni anamuteko? (b) Exeeni elakenle anyu opaka nuumala wiiwa nlikanyiho nla na Yesu?

¹⁶ Yesu aahipaka nlikanyiho nimosa na mwene aamulevelenle namuteko awe musurukhu munceene, waaphiyerya italento 10.000, eyo piiyo, idenaario 60.000.000. Masi okathi mukina, namuteko ole aaleveleliwe musurukhu ole munceene, khaatthunne omulevelela mukhwaawe aamukophenle musurukhu vakhaani, idenaario 100 paahi. Nuumala mwene wiiwa ele yiiraneyale, aahiviruwa vanceene, mwaha woowi namuteko ole aaleveleliwe musurukhu munceene khaawenrye omulevelela mukhwaawe. Nto mwene aahimmye so: “Nyuwo murumeyi òtakhala! Miyo kiholevelelani musurukh’ule wothene wakikophenlyanyu, wona mwahikivarela metto. Khimwakhanle ommorela ikharari mukhw’inyu, ntoko miyo komorenlyakani nyuwo?” (Math. 18:23-35) Ntoko mwene ole, Yehova oonilevelela etthu yuulupale. Vano, ophenta ni olevelela wa Yehova oniiriheke opaka exeeni?

¹⁷ Okathi wa Niira na Wuupuwelela onninivaha eparakha oweha akhala wira noonanariwa ni munnihu wala murokora. Akhala wira ti siiso, nihaana omutakiha Yehova yoowo ori oowaakuva ‘olevelela’. (Neh. 9:17; Esal. 86:5) Akhala wira ninnimuxukhurela Yehova mwaha woonilevelela, nave hiyo nnimwaalevelela akina ni murima wotheene. Khivaniweryaneya ophentiwa ni oleveleliwa ni Yehova, akhala wira hiyo khinnaaphenta ni waalevelela akina. (Math. 6:14, 15) Olevelela khonitaphulela wira etthu eyo yiireliwa ahu eroohininyoonya masi akhala wira ninnilevelela ninnihakalala muhoolo mwaya.

18. Ophenta wa Muluku waamukhalihenrye sai murokora mmosa onvilela murokora mukina?

¹⁸ Anceene a hiyo, ikwaha sikina vanninivila ‘wavilela’ annihu ni arokora. (Mmusome aKolosi 3:13, 14; aÉfeso 4:32.) Mwa ntakiheryo, murokora mmosa oohitheliwa oniitthaniwa Lily, aanimukhaliherya murokora mukina aakhweliwe iyawe, aitthaniwa Carol. ^[1] Murokora Lily aanimpakhira Carol arowaka omuthukumanoni, aanimukhaliherya othuma itthu, ni aanipaka itthu sikina. Nnaamwi Lily aapaka itthu iye sotheene, masi Carol khaaxukhuru ni aari mutthu oowaakuva onanariwa. Hata vari siiso, Lily aaniweha mikhalelo sooloka sa Carol. Aahivikaniha omukhaliherya iyaakha sinceene mpakha Carol owereiwa ni okhwa. Lily onihimya so: “Kinnilipelela onweha Carol okathi onrowa awe ohihimuxiwa. Kiniphavela omusuwela oratteene oryeene mutthu oomalela”. Ophenta wa Muluku onniniiriha waavilela annihu ni arokorihu, nilipelelaka okathi atthu otheene anrowa aya okhala oohittheka.

19. ‘Yovaha yotikiniha’ ya Muluku, enrowa owiirihani opaka exeeni?

¹⁹ Tthiri nihaakhela ‘yovaha yotikiniha’ enikhuma wa Yehova. Nto nixukhureleke okathi wotheene. Okathi wa Niira na Wuupuwelela, nohaana wuupuwelela oratteene itthu sotheene Yehova ni Yesu anipakenle aya. Aayo, ophenta waya oniiriheke ophavela omutthara Yesu vakhiviru vene, waaphenta annihu, ni waalevelela akina ni murima wotheene.