OVAANELA VOOHIMYA SA BIIBILIYA

Niireke Muluku Onnoonela Othunku Ohaawa Wahu?

Moolumo anittharelana, ori ovaanela okhanle owiiraneya eriyari ya Namoona a Yehova ni mwaneene etthoko. Nilikanyihe wira Namoona mmosa oniitthaniwa Monika oophiya owannyawe muthiyana oniihaniwa Sofia.

XEENI MULUKU ONIHIYA AWE ITTHU IYA SIIRANEYAKA?

Monika: Olelo, kinaaxukurya atthu a muttetthe ola kaavahaka etratato ela. Muru aya oniira so: Munniphavela Osuwela Ekeekhai? Ela kihoovahani.

Sofia: Enilavula sa etiini?

Monika: Aayo. Nwehe wira vakaapani-vo ahaavo makoho 6. Wa makoho ala, nto tinivi—

Sofia: Kihiiwa. Masi kinoona wira nyuwo munihonona okathi anyu mahala mulavulaka ni miyo.

Monika: Xeeni munihimya anyu siiso?

Sofia: Mwaha woowi nkinikupali saana wira Muluku ookhala.

Monika: Kinniiwa enihimya anyu. Masi kiniphavela wookohani etthu emosa: Kiireke okhuma khalai munuupuwela siiso?

Sofia: Nnaari, miyo kinnunwe keettaka okerexa. Masi kihiyale khalai orowa okerexa.

Monika: Voo! Masi, kaamuhiliyala etthu emosa, miyo kiniitthaniwa Monika.

Sofia: Miyo kiniitthaniwa Sofia.

Monika: Kooxukhuru vanceene.

Sofia: Aayo.

Monika: Kirwaaka va, khahiyo kiniphavela wookhanyereryani otthara sookupali saka. Masi, ehaavo eniphavela aka osuwela: Kiireke yookhala etthu etonko wookhumelelani ewiirinheni opacerya ohikupali wira Muluku ookhala?

Sofia: Aayo. Iyaakha 17 sivinre, amaama yaahaaphwanya ehasara ya omaniwa ni ekaaro.

Monika: Ooh, eyo etthu yootakhala. Masi khorakanle?

Sofia: Oorakala. Okhuma vaavo owo khonwerya-tho weetta.

Monika: Eyo etthu yooriipiha murima. Tthiri eyo etthu yoowereya.

Sofia: Eyo ekeekhai. Tivonto miyo kinikohaka so: Akhala wira Muluku ohaavo, xeeni onihiya awe itthu iya siiraneyaka? Xeeni onnihiya awe nihaawaka?

TI VOOTTHEKEYA OKOHA NTHOWA NAYA MULUKU VANAAHIYA AWE ATTHU EHAAWAKA?

Monika: Muupuwelo anyu ni makoho anyu tookhalela. Okathi onihaawa ahu, hiyo pooti okoha wira: xeeni? Tthiri, hata arumeyi akina oororomeleya a Muluku alopwana ni athiyana, okathi wa khalai yaanikoha siiso.

Sofia: Muriye yaanikoha siiso?

Monika: Aayo. Kiireke munniphavela woona ntakiheryo nimosa niri mBiibiliyani?

Sofia: Aayo, nkahaya mukooniherye.

Monika: Nwehe ele profeta oororomeleya Habakuki aamukonhe awe Muluku, ntoko silempwale aya eliivuru ya Habakuki ekapitulu 1, iveersu 2 ni 3. Eniira so: “Nyuwo Apwiya! Kinokhuwela mpakha lini, muhikìwaka? Hiyo ninnihaxiwa, ninnikhuwelela wa nyuwo. Muhinrwela-ni onàkiha? Munkòniherya-ni sotakhala?” Kiireke makoho ala anilikana naale munimakela anyu opaka?

Sofia: Aayo, annilikana tthiri.

Monika: Muluku khampwapwenle Habakuki mwaha woopaka makoho ala, wala omuhimeerya Habakuki wira owo aatthuneya wuncererya waamini wawe.

Sofia: Eyo ti yoohakalaliha.

YEHOVA ONNINYOKHA OHAAWA

Monika: Biibiliya oniixuttiha wira Muluku onnoona ohaawa wahu, ni wira owo onninthokorerya.

Sofia: Moota xeeni?

Monika: Nkahaya nwehe ntakiheryo nimosa niri  eliivuru ya Okhuma 3:7. Kiireke munniphavela osoma eveersu eyo?

Sofia: Khiva mwaha. Enihimya so: “Apwiya khwiraka: ‘Miyo kihona ohawa w’atthu aka wEjitu. Kihìwa ikuttho saya sininlaya, ehaxiwaka ni makapatasi. Kosuwela tthiri ohawa waya’”.

Monika: Kooxukhuru. Nto moovarihana ni yoolepa ela, niireke Muluku khonoona vaavo atthu awe anihaawa aya?

Sofia: Kinoona wira onnoona.

Monika: Nave-tho, Muluku onnoona khula yootakhala eniiraneya. Nkawehani-tho mpantta wookiserya wa eveersu eyo. Muluku ohimmye so: “Kosuwela tthiri ohawa waya”. Niireke moolumo awo animuhimya Muluku ohinoona othunku wala ohimpatthaneya?

Sofia: Kinoona wira nnaari.

Monika: Tthiri, Muluku khahiyo onooweha paahi mixankiho sinniphwanya, masi-tho onnoona othunku vanceene okathi onihaawa ahu.

Sofia: Aahe.

Monika: Nlelo nuupuwelelaka eyo, nrowe niwehe ntakiheryo nikina vaavo atthu a Muluku a khalai yaahaawa aya. Eliivuru ya Yesaya 63:9. Mpantta woopacerya wa eveersu eyo enihimya so: ‘Movelavelani mwaya mothene, [“Muluku aanixankiheya”, Tradução do Novo Mundo]. Munoonela sai, niireke Muluku aanoonela othunku ohaawa wa atthu awe?

Sofia: Aayo, masu ala anooniherya yeeyo.

Monika: Ekeekhai tiila: Muluku onninthokorerya vanceene, ni khonisiveliwa onoona nihaawaka. Okathi nnoona ahu owereya, nuuwo onnoona owereya.

XEENI MULUKU OHINIMALIHA AWE OHAAWA?

Monika: Kihinatthi okhuma, yookhala etthu ekina kiniphavela aka wooleelani.

Sofia: Aayo, mukileeleke.

Monika: Muthokorerye ele Biibiliya oniixuttiha awe voohimya sa owerya wa Muluku. Eveersu kuupuwenle aka eri muliivuruni ya Yeremiya 10:12. Xontte musome yoolepa eyo.

Sofia: Aayo. Enihimya so: “Apwiya àpattuxa elapo ya vathí n’uwerya waya, àpattuxa olumwenku n’usuwela waya, ahatala erimu ni miruku saya”.

Monika: Kooxukhuru. Nrowe nuupuwelele eveersu ela vakhaani. Niireke Muluku ohaana owerya wuulupalexa wira opattuxe olumwenku wotheene ni itthu sotheene siri molumwenkuni?

Sofia: Aayo, ohaana.

Monika: Vano, akhala wira Muluku ohaana owerya woopattuxa itthu sotheene siri molumwenkuni, nto eyo khenooniherya wira owo ookhalana owerya woolamulela soopattuxa sawe?

Sofia: Aayo, ookhalana.

Monika: Nkahaya muupuwelele-tho voohimya sa maama anyu. Xeeni vahinoosivelaayani owoona ehaawaka?

Sofia: Mwaha woowi miyo kinnaaphenta. Awo taamaama.

Monika: Nto vaakhanle wira nyuwo muhaana owerya woomaliha ohaawa waya olelo-va, khimwaarowa opaka eyo?

Sofia: Kammaliha tthiri.

Monika: Nkahaya muupuwelele saana mwaha owo. Biibiliya oniixuttiha wira Muluku onniweha ohaawa wahu, onnoona othunku, ni wira ookhalana owerya wuulupalexa. Nto khamunoona wira Muluku aahaana wiihiiha vanceene wira ohaakuvele opaka etthu wira omalihe ohaawa wahu?

Sofia: Nkaasuwela mwaha owo.

Monika: Nto khahiyo vookhalela wuupuwela wira owo ookhalana mathowa ooloka animwiiriha wira nlelo ohimalihe mixankiho sahu? *

Sofia: Ohh, kinoona wira ookhalana.

Monika: Masi kinnimwiiwa telefoni anyu orumaka. Nto miyo kinootthika nihiku nikina wira nithokorerye mwaha ola.

Sofia: Kooxukhuru. Tthiri kinniphavela osuwela. *

Niireke nyuwo muhaana mwaha mukina a Biibiliya onootikinihani? Wala muniphavela osuwela sookupali nimiteko sa etiini ya Anamoona a Yehova? Akhala wira ti siiso, muhoovelele omukoha Namoona a Yehova. Owo onrowa osiveliwa othokorerya myaha iwo ni nyuwo.

[Inoota]

[Elatarato epaaxina 14]