1 Timootheyo 1:1-20
1 Miyo Paulo, murummwa a Kristu Yesu, kirummwale ni Muluku, Moopoli ihu, vamosa ni Kristu Yesu, nlipelelo nahu,
2 kinnimulepela Timootheyo,* mwanaka oororomeleya mmutekoni mwa Apwiya:
Oreera murima wuulupale ni omoriwa ikharari ni murettele wa Muluku Tiithi ihu, ni wa Pwiya ahu Kristu Yesu, okhale ni nyuwo.
3 Ntoko koovekenlyaakani wira muhale wEefeso okathi kaaphavela aka orowa oMasedonia, vano kinnoovekelani wira mwaalopole oratteene atthu akina, wira ahiixuttiheke itthu soowoothiwa,
4 nnakhala ahiwiriyaneke myaha soowoothiwa ni okontari masina a amuhavinre. Itthu siiso khasirina efaita, ohiya-vo, sinniwiiriha atthu ohimya itthu ahinisuwela aya. Nave, khasiniirela mpantta itthu Muluku onnivaha awe, seiyo sinlipiha waamini.
5 Etthu enikiiriha ovaha malakiheryo ala,* tiila: wira mphentaneke ni murima wooreera, mukhalaneke murima* wooloka ni waamini woohoothererya.
6 Atthu akina aakhootta itthu iya, vano annivaanyihana ithiru.
7 Awo aniphavela okhala alipa-oowiixuttiha Nlamulo, masi khanisuwela itthu anihimya aya, nnakhala khanisuwela itthu anithipelela aya wiixuttiha.
8 Hiyo noosuwela wira Nlamulo ti nooreera, vakhala wira mutthu onneettela oratteene.
9 Nave noosuwela wira Nlamulo khanipakeliwe anaxariya, masi nipakeliwe atthu ootakhala, oohiiwelela, ahinimuttittimiha Muluku, anatampi, oohiroromeleya, ale annanariha itthu soowaarya, ale aniwiiva apapaya ni amamaya, anawiive,
10 atthu anrupihana voohiloka,* alopwana anrupihana yaawo-ru,* ale aniwiiya atthu, anawoothe, ale anlapha yoothaka, ni khula etthu enivirikanya mwiixuttiho wooreera.*
11 Mwiixuttiho ola onikhuma wa Muluku oohakalala, ottharaka ihapari sooreera soovuwa, seiyo kiroromeliwe aka.
12 Kinnimuxukhuru Kristu Yesu, Pwiya ahu, yoowo onikivaha ikuru, maana ookoona okhala oororomeleya, okivahaka muteko wa Muluku,
13 nnaamwi khalai kanveeha Muluku, ni kaalupattha arumeyi awe, ni kaari mutthu oowiisoona. Hata vari siiso, Muluku ookimorela ikharari, okhala wira kaapaka itthu iyo kihisuwelaka ni kihirina waamini.
14 Masi, Apwiya aakireerela murima vaalupalexa, nave kinnaamini ni ophenta mwaha woowi ka mwiixutti a Kristu Yesu.
15 Moolumo ala teekeekhai, nave hiyo nikupaliki voomalela: Kristu Yesu ohoorwa moolumwenkuni wira owoopole anatampi. Eriyari ya anatampi awo, miyo kitepanxe okhala natampi.
16 Masi, koomoreliwa ikharari wira mwaha wa miyo kitepanxe okhala natampi, Kristu Yesu ooniherye opixa wawe murima wotheene, okikhalihaka ntakiheryo na ale anrowa omwaamini, wira aphwanye okumi ohinimala.
17 Vano, Mwene onikhala mahiku otheene, ohinikhwa, ohinooneya, Muluku mmosa paahi, ottittimihiwe ni ovuwihiwe mahiku otheene ni voohimala. Amen.
18 Nyuwo Timootheyo, mwanaka, kinnoovahani malakiheryo ala,* kittharihelaka iprofesia soohimyani nyuwo, wira muttharaka seiyo, muthipeleleke owana ekhotto yooreera,
19 mukhalanaka waamini ni murima* wooreera, itthu seiyo atthu akina akhoottale aya. Nto eyo yoohonona waamini waya, ntoko pakiti onyaanyiwe mphareya.
20 Mwa atthu awo, ookhala Himeneyo ni Alexandre, yaawo kaavaherenrye aka wa Satana, wira avahiwe ehukhumu, ni ahinveeheke Muluku.
Inoota
^ Nintaphulela, “Ole Onimuttittimiha Muluku”.
^ Aahiiso, “yooruma ela”.
^ Nwehe Moolumo Ootthokiheriwa.
^ Nwehe Moolumo Ootthokiheriwa ani: “Orupihana woohiloka”.
^ Ekereku, “alopwana anrupa ni alopwana”.
^ Aahiiso, “wooloka; oniphwanyiha mureerelo”.
^ Aahiiso, “kinnoorumani”.
^ Nwehe Moolumo Ootthokiheriwa.
