Luka 9:1-62
-
Arummwa 12 annivahiwa malakiheryo a olaleerya (1-6)
-
Herodi aahixanka mwaha wa Yesu (7-9)
-
Yesu onnaalyiha atthu 5.000 (10-17)
-
Pedru onihimya wira Yesu ti Kristu (18-20)
-
Okhwa wa Yesu onnihimmwa vahinatthi (21, 22)
-
Mwiixutti eekeekhai (23-27)
-
Othatuwa wa Yesu (28-36)
-
Mmiravo aavariwe nlaikha nootakhala onnipenuxiwa (37-43a)
-
Okhwa wa Yesu onnihimmwa-tho vahinatthi (43b-45)
-
Awiixutti anninyakulihana mwaha wa okhulupale (46-48)
-
Ole ohinnivirikanya, ori ni hiyo (49, 50)
-
Yesu onnikhoottiwa muttetthe wa oSamariya (51-56)
-
Moota woomutthara Yesu (57-62)
9 Yesu aahiwiihana arummwa 12, aavaha owerya wa woomola malaikha otheene ootakhala, ni waapenuxa atthu yaawereiwa.
2 Nave aahaaruma waalaleerya atthu Omwene wa Muluku, ni waapenuxa aretta.
3 Owo aahaahimeerya wira: “Muhikuxe etthu mwaarowaka mukwaha anyu, nnakhala ttootto, hata murupa wa yoolya ya mukwaha, nnakhala ephaawu, hata musurukhu.* Nave muhikuxe malaya manli.*
4 Khula etthoko enrowa anyu, mukhaleke vaavo mpakha okathi munikhuma anyu.
5 Khula opuro ohinrowa anyu waakheliwa, mwaakhumaka epooma eyo, mutatheke ntthupi na inawu sanyu, ntoko ethoonyeryo yoowi atthu awo aalopoliwa”.*
6 Vano, awiixutti yaahirowa mmuttettheni, enalaleya ihapari sooreera ni waapenuxa aretta mapuro otheene.
7 Mwene Herodi,* aahiiwa itthu sotheene siiraneya, nto aahixanka vanceene, okhala wira atthu akina yaahimya wira Yohani oohihimuxiwa mookhwaani.
8 Masi atthu akina yaahimya wira aari Eliya, nave-tho akina yaahimya wira aari profeta mmosa a khalai aahihimuxiwe mookhwaani.
9 Herodi aahihimya wira: “Miyo kooruma wira Yohani iikitthiwe muru. Nto, ti pani ola, kiniiwa aka wira onnipaka itthu iya sotheene?” Tivo, Herodi aaniphavela onweha.
10 Nuumala arummwa otthika, awo yaahimuleela Yesu itthu sotheene yaapanke aya. Nto Yesu aahaakuxa, aaroiha opuro wahaavira-viriwa, epooma ya oBethisaida.
11 Okathi mittitthi sa atthu saasuwenle aya, saahimutthara. Yesu aahiwaakhela saana atthu awo, onaaleela itthu sa Omwene wa Muluku. Nave aahaapenuxa ale yaawereiwa.
12 Vano nihiku naahala vakhaani omala. Nto arummwa 12 yaahimwaattamela Yesu, anamuleela wira: “Mwaamwarye atthu ala arowe mmawaani ni mittetthe soowaattamela, wira aphwanye opuro woophumurya ni woothuma yoolya, maana opuro ola ori ahu, ti woorakamela omuttettheni”.
13 Nto Yesu aahiwaakhula wira: “Mwaavaheke nyuwo yoolya”. Awo yaahihimya wira: “Hiyo nrina iphaawu thanu ni ihopa piili paahi. Khino nihaana orowa othuma yoolya yowaavaha atthu ala otheene?”
14 Veekeekhai, yaahikhala alopwana oowiiraka 5.000. Masi Yesu aahaahimeerya awiixutti awe wira: “Mwaaleele atthu akilaathi ikrupu sa atthu 50”.
15 Awiixutti yaahiira siiso, nto atthu otheene yaahikilaathi.
16 Nuumala-vo, Yesu aahikuxa iphaawu iyo thanu ni ihopa piili, aahiweha osulu, onavekelela. Vano aahikawanya iphaawu iyo, aavaha awiixutti iphaawu ni ihopa, wira yaavahe atthu ale.
17 Atthu otheene yaahilya mpakha ovona. Nuumala-vo, saahittotteliwa ipetaaso saahanle,* khusarya ittanka* 12.
18 Okathi mukina, Yesu ovekelaka mekhawe, awiixutti yaahimwaattamela, nto owo aahaakoha wira: “Atthu anihimya wira miyo ka pani?”
19 Awo yaahimwaakhula wira: “Yohani Mpatisa. Akina anihimya wira mwa Eliya. Akina-tho, anihimya wira mwa profeta mmosa a khalai ohihimuxiwe mookhwaani”.
20 Yesu aahaakoha wira: “Ankhi nyuwo, munihimya wira miyo ka pani?” Pedru aahaakhula wira: “Nyuwo mwa Kristu a Muluku”.
21 Nto, Yesu aahaalopola oratteene awiixutti ale wira ahimuleele mutthu.
22 Owo aahimmye wira: “Mwaana a mutthu ohaana ohaaxiwa vanceene ni okhoottiwa ni makhulupale a ayuda, ni makhulupale a anamukuttho ni alipa-oowiixuttiha Nlamulo. Nave ohaana wiiviwa, masi onrowa ohihimuxiwa nihiku na neeraru”.
23 Vano, Yesu aahaahimeerya awiixutti awe otheene wira: “Akhala mutthu oniphavela okitthara, aikhootte mmansawe, okuxe mwiri awe wa nihaaxeryo,* okitthareke voohihiyererya nihiku ti nihiku.
24 Ole oniphavela woopola okumi awe, onoomurimeela. Masi, ole onimurimeela okumi awe mwaha wa miyo, onoophwanya.
25 Mweekeekhai, mutthu oniphwanya-ni, waakhela olumwenku wotheene, variki okumi awe orowaka opweteya?
26 Tthiri, ole onrowa wuuliwa muru mwaha wa miyo ni moolumo aka, nave Mwaana a mutthu onimuuliwa muru mwaha wa mutthu owo, okathi Mwaana a mutthu onirwa awe ni ovuwa wawe, ovuwa wa Tiithi awe vamosa ni wa malaikha oowaarya.
27 Kinooleelani ekeekhai wira, aakhala ari vaava ahinrowa okhwa, ahoonale toko Omwene wa Muluku”.
28 Vano, mahiku oowiiraka 8 nuumala ohimya masu ala, Yesu aahimukuxa Pedru, Yohani, ni Yakobo, awela vamwaako wira avekele.
29 Okathi aavekela awe, owiitho wawe waahithatuwa, nave ikuwo sawe saahitteela vanceene, sinatutha.
30 Niinaano-ru, yaahikhumelela alopwana anli enavaanela ni Yesu. Awo yaari Moise ni Eliya.
31 Alopwana awo anli yaahirwa ni ovuwa, nto analavula moota Yesu aarowa awe okhuma valaponi, weiwo waarowa wiiraneya oYerusalemu.
32 Vano Pedru ni akhwaawe yiira arupaka. Nto okathi yaavennye aya, yaahoona ovuwa wa Yesu ni yaahiwoona alopwana anli yeemenle ene ni yoowo.
33 Okathi alopwana awo yaahala aya orowa, Pedru aahimuleela Yesu, wira: “Mwiixuttihi, vaareera hiyo okhala vaava. Nrowe nteke iheema tthaaru, emosa yawinyu, ekina ya Moise, nave-tho ekina ya Eliya”. Owo khaasuwela yaahimya awe.
34 Nlelo olavulaka itthu iya, naahikhumelela neeku, naakhuneela. Nto awo yaahoova.
35 Vano, naahiiwanyeya nsu nikhumaka muneekuni-mmo, nriki: “Ola Mwanaka, yoowo kimuthanlale aka. Mmwiiweleleke yoowo”.
36 Okathi nsu nle naiwanyeya aya, Yesu aahanle mekhawe. Vano awo khiyaalavunle etthu, nave mahiku ene yaawo khuuvo yaamulenle aya itthu iye yoonale aya.
37 Mmeeloni mwaya, akhuruwaka vamwaako, muttitthi muulupale wa atthu waahirwa okumana ni Yesu.
38 Okathi ene yoowo, mulopwana mmosa aari ni muttitthi owo, aahimuhimeerya Yesu wira: “Mwiixuttihi, kihoovarani metto, munwehe mwanaka mwaamulopwana, okhala wira kirina mmosa yoola paahi.
39 Nookhala nlaikha nootakhala nninvara. Nanvara vale, niinaano-ru ninnimukhuweliha, ni ninnimmoroxela vathi, onaluwela okhumaka nipheru mwaano. Nlaikha nlo khanimmuhiya nihimuhaaxale vanceene ni onvulaliha.
40 Kihaavekela awiixutti anyu wira yoomole, masi awo khawenrye”.
41 Yesu aahaakhula oriki: “Nyuwo atthu oohaamini ni ootakhala! Kinrowa okhala ni nyuwo mpakha silini? Kinrowa woovilelani mpakha silini? Mukiruuhele-va”.
42 Okathi mmiravo owo aamwaattamela awe Yesu, nlaikha nlo nootakhala naahimurihela vathi, nnamuluweliha vanceene. Masi Yesu aahipwapwela nlaikha nle nootakhala, ompenuxa mmiravo owo, ni onvahererya paapa awe.
43 Atthu otheene yaahitikinihiwa vanceene ni owerya wuulupale wa Muluku.
Atikinihiwe ene ni itthu sotheene Yesu aapaka awe, owo aahaahimeerya awiixutti awe wira:
44 “Nwiriyane oratteene moolumo ala ni muhiliyale, maana Mwaana a mutthu onrowa ovarihiwa ni ovahereriwa mmatatani mwa atthu”.
45 Masi awo khiyaiwexenxe moolumo awe, okhala wira yootaphulela ya moolumo awo yaahiipithihiwa. Nave-tho, yaanoova omukoha ele yaataphulela aya moolumo ale.
46 Vano, awiixutti yaahipacerya onyakulihana aphavelaka omusuwela ti pani a yaawo aari muulupalexa.
47 Yesu, osuwelaka etthu yuupuwelela aya vamurimani vaya, aahimukuxa mwanamwane, omweemexa vakhiviru vawe,
48 onaahimeerya so: “Ole onimwaakhela mwanamwane ola, mwaha wa nsina naka, onikaakhela miyo. Nave, ole onikaakhela, onimwaakhela Ole okirumme. Mweekeekhai, ole oniixoona okhala mwaamukhaani eriyari anyu, yoowo tori muulupale”.
49 Yohani aahimuhimeerya Yesu wira: “Mwiixuttihi, nonweha mutthu oomolaka malaikha ootakhala mwa nsina nanyu. Nto hiyo niheererya omukhoottiherya, maana khoneetta ni hiyo”.
50 Masi Yesu aahimuleela wira: “Muheererye omukhoottiherya, okhala wira ole ohinoovirikanyani, ori ni nyuwo”.
51 Waattamelaka* okathi wa Yesu orowa wiirimu, owo kheemerenrye etthu omukhoottiherya orowa oYerusalemu.
52 Siiso, aahaaruma anamitthaka* ohoola. Awo yaahiphiya muttetthe wa asamariya wira alokiherye itthu wira amwaakhele.
53 Masi atthu a muttetthe owo khiyaamwaakhenle, okhala wira aahilakela orowa oYerusalemu.
54 Awiixutti Yakobo ni Yohani voonale aya etthu ele, yaahimukoha Yesu wira: “Pwiya, munniphavela wira nirume okhuruwa mooro wiirimu wira waapwetexe atthu ale?”
55 Masi Yesu aahirukunuwa onaaweha ni onaapwapwela.
56 Nuumala-vo, yaahirowa muttetthe mukina.
57 Vano yeettaka mustaraatani, mutthu mmosa, aahimuleela wira: “Kinimoottharani khula opuro munrowa anyu”.
58 Nto Yesu aahimwaakhula wira: “Akhwatte aakhalana mittupha saya, nave axipalame* aakhalana ipuru saya, masi Mwaana a mutthu, khorina opuro awe woorupa”.
59 Yesu aahimwiirela mukina wira: “Mukhale mwiixutti aka”. Mulopwana owo aahimwaakhula wira: “Pwiya, mukeemererye toko orowa waavitha apaapa”.
60 Masi Yesu aahimuhimeerya wira: “Mwaahiye alipa-ookhwa, yaavitheke alipa-ookhwa, masi nyuwo murowe mwalaleyeke Omwene wa Muluku mapuro otheene”.
61 Nave-tho mukina aahimmye wira: “Pwiya, miyo kinimoottharani, masi mukeemererye toko orowa waalaxerya atthu a vatthokoni vaka”.
62 Yesu aahimwaakhula wira: “Ole oniira olimaka ottharaka eliinya, onaweha itthu sihanle ottuli, khoniphwanela okela Moomweneni mwa Muluku”.
Inoota
^ Ekereku, “eparatha”.
^ Aahiiso, “nlaya nikina”.
^ Ekereku, “wira yaakhalele onamoona wowaavirikanya”.
^ Eyo piiyo, Herodi Antipa. Nwehe Moolumo Ootthokiheriwa.
^ Aahiiso, “mapattuxa yaahanle”.
^ Aahiiso, “isestu”.
^ Nwehe Moolumo Ootthokiheriwa.
^ Ekereku, “Omalelaka”.
^ Aahiiso, “anamuhupi”.
^ Aahiiso, “axinuuni”.
