Masaalimu 46:1-11
Para tiretoore a isipo. Nsipo na osuulu wa Kora, nenlo nniipiwa otthariwaka alamoothi.*
46 Muluku tori ntthyawelo nahu ni ikuru sahu,Tonnikhaliherya voowaakuveya, okathi wa mixankiho.
2 Tivonto nihinrowa ahu woova etthu, hata elapo eturukeyaka,Hata miyaako simorelaka mphareya moowiixa,
3 Hata maasi a mphareya anyakulaka ni akhumaka nipheru,Aahiiso maasi awo ootupa yiirihaka miyaako otetereya. (Selahi)
4 Wookhala muro, yoowo maasi aya anitteeliha murima epooma ya Muluku,Maasi awo annitteeliha murima nipuro noowaarya,
Eyo piiyo, etapernaakulu yuulupale ya Muluku Muulupalexa.
5 Muluku ori epooma yeeyo, tivonto vahiniweryaneya aya onyaanyiwa.
Muluku onimoorwa oxaka, okhaliherya epooma eyo.
6 Maloko yaahoova vanceene, ikuvernu saahimala-malihiwa;Muluku aahivenxa nsu nawe, nave elapo yaahitothowa.
7 Yehova a anakhotto ori ni hiyo;Muluku a Yakobe, tori ntthyawelo nahu noolipa. (Selahi)
8 Murwe moone miteko sa Yehova,Moone moota onipaka awe itthu sootikiniha mulaponi.
9 Owo onnimaliha ikhotto elapo yootheene ya vathi.
Onnintakasa miyuura ni mavaka;Onnipaha ikaaro sa ekhotto* ni mooro.
10 “Mwiivahererye, ni musuwele wiira miyo ka Muluku.
Kinoovuwihiwa ni atthu a maloko ootheene;Kinoovuwihiwa elapo yootheene ya vathi”.
11 Yehova a anakhotto ori ni hiyo;Muluku a Yakobe, tori ntthyawelo nahu noolipa. (Selahi)
