Miruku 27:1-27
27 Muhiittottopeke mwaha wa meelo,Okhala wiira khamunsuwela enrowa wiiraneya meelo.
2 Mwaahiye atthu akina* yoottottopelekeni, ohiya nyuwo olavula ni moolumo anyu.Mutthu mukina* oottottopelekeni, ohiya wiittottopela mmansinyu.
3 Nluku ti noolemela, nave mihaava ti soolemela,Masi muxankiho onikumiheriwa ni mutthu ohirina ankhili, ti wootepa olemela ovikana itthu iyo.
4 Oviruwa ti wootakhala, nave onanariwa onlikana ni maasi manceene,Masi tani oniwerya ovilela nrima?*
5 Fataari omuttaruxa mutthu muhimukhuwaka, ohiya ohimya wiira munnimphenta, masi muhooniheryaka.
6 Mpatthani eekeekhai onnivaha miruku hata vawereyaka,Masi ipeexo sa awanani, ti soowaatta.*
7 Mutthu ovonne onnikhootta hata olya oravo mmahepepeni,Masi ole ovoliwe etala, hata etthu yoowaawa ti yoosiva.
8 Ntoko mwaapalame otthyanwe mpuruni mwawe,Ti siiso siri awe mulopwana okhumme vatthokoni vawe.
9 Makhura ni nsenso* annitteeliha murima,Siiso-tho, opatthani wooloka onikhumelela mwaha wa miruku seekeekhai.
10 Muhimunyanyale mpatthani anyu nnakhala mpatthani a paapa anyu,Nave muhirowe etthoko ya munninyu sookhumelelani mixankiho.Fataari namwaattamanani anyu onikhala vakhiviru, ohiya munninyu onikhala ottaiwene.
11 Mwanaka, mukhale mutthu orina ankhili, nave mukitteeliheke murima,Wiira kisuweleke omwaakhula ole onikivirikanya.
12 Mutthu orina ankhili onniweha etthu yoowoopiha, oniipitha,Masi ole ohinsuwela itthu sinceene, onrowa weiwo sinamukhumelela mixankiho.
13 Mukuxe nlaya na mutthu aaleihenrye wiira aamuliva itthu saakomphwale ni mutthu muhinimusuwela anyu, vakhala wiira mutthu owo kholinve.Mmukhanyererihe woovahani neemexeryo vakhala wiira owo omukophenle muthiyana a elapo ekina.
14 Okathi mutthu onimureeliha awe mukhwaawe ni nsu noowiiwanyeya voosiisu ene,Onoona wiira munoomutakhaliha.
15 Muthiyana ootheliwa onimusivela onyakulihana, onlikana ni empa ehinimaala ottonya nihiku na epula.
16 Ole oniwerya ommaaliha, onniwerya omaaliha epheyo,Nave onniwerya ovarela makhura ni ntata nawe noolopwana.
17 Eyuuma ennoniwa ni eyuuma ekhwaaya,Siiso-tho, mutthu onikhaliheriwa ni mukhwaawe wiira ovareke itthu sooloka.*
18 Ole onikhapelela mwiri wa efiiku, onimoolya mihokorokho saya,Nave ole onimukhapelela pwiya awe, onoottittimihiwa.
19 Siisaale maasi anooniherya aya owiitho wa mutthu,Nave murima wa mutthu onooniwa ni atthu akina.
20 Mahiye ni opuro anipwetexiwa aya atthu, khaniphiyeriwa,Nnakhala maitho a mutthu khaniphiyeriwa.
21 Siisaale mooro onireeriha aya eparatha ni eweero,Siiso-tho, mutthu oneehereriwa okathi onittottopeliwa awe.
22 Hata mmunyakattaka mulolo,Ntoko sinnyakattiwa aya ipyo vanxiloni,Ololo awe khonimmalela.
23 Muhaana osuwela saana mukhalelo wa nikoto nanyu.
Mukhapeleleke saana ipwittipwitthi sanyu,
24 Okhala wiira mihakhu khasinkhala mahiku ootheene,Nnakhala ekhara ya omwene khenihiyeraniwa nloko ti nloko voohimala.
25 Malaxi makithi annilakaseya, nto annikhumelela malaxi makina,Nave munyepu wa omiyaakoni, onnithukumanyiwa.
26 Manri a ipwittipwitthi saamukhaani annoophwanyihani ikuwo,Nave ipuri soolopwana sinnoophwanyihani ematta.
27 Nave-tho, enookhala eleeti yinceene ya epuri yoothiyana,Eniphiyerya woolyihani nyuwo, waalyiha atthu a etthoko anyu ni waalyiha arumeyi anyu axithiyana.
Inoota
^ Eheeperi, “muhinimusuwela anyu”.
^ Eheeperi, “Namurwa”.
^ Eheeperi, “ehace”.
^ Aahiiso, “ti soowoothereriwa; ti sookhanyereriwa”.
^ Aahiiso, “erupani”.
^ Eheeperi, “mutthu onnoniwa ni mpatthani awe”.
