Miteko 26:1-32
26 Agripa aahimuhimeerya Paulo wira: “Vano munneemereriwa olavula wira mwiixaakihe”. Nto Paulo aahookola ntata nawe, onapacerya wiixaakiha oriki:
2 “Mwene Agripa, kinnihakalala okhala ohoolo wanyu olelo-va, wira kiixaakihe itthu sotheene ayuda anihimya aya wira koopaka,
3 vanceenexa okhala wira nyuwo munnisuwela oratteene soolema sa ayuda, ni itthu anivaanyihana aya. Tivo, kinnooxonttelani wira mukiwiriyane voopixa murima.
4 “Ayuda anceene annikisuwela saana okhuma omiravo aka, mpakha okathi kaari aka oYerusalemu.
5 Awo yaaphavenle, yaamooleelani wira miyo kaari nfarisi. Nto, afarisi annitepa ovarexexa voohikhalela etiini aya, waavikana ayuda akina.
6 Vano kinniphukeliwa mwaha wa omulipelela natiri Muluku aamanenle awe amuhavinre ahu.
7 Mahimo 12 a nloko nahu yaanilipelela wiiraneya wa natiri owo, okathi yanvarela aya muteko Muluku, voohihiyererya. Tivo, nyuwo mwene, ayuda anihimya aya wira kookhalana mulattu, mwaha wa nlipelelo nenla.
8 “Xeeni akina a nyuwo ahinikupali aya wira Muluku onnaahihimuxa alipa-ookhwa?
9 Miyo kaanikupali wira kaahaana orumeela itthu sotheene wira kinvirikanye Yesu munazarethi.
10 Eyo ti etthu kaapanke aka oYerusalemu. Tthiri kaahaarihela mukhatteya awiixutti* anceene, kirumeelaka owerya kaavahiwe aka ni makhulupale a anamukuttho. Nave kaaneemererya okathi yaalamuliwa aya wiiviwa.
11 Miyo kaanirowa khula esinagoga,* kaahaaxaka ni kaakhanyereryaka ohiya waamini waya. Nave, okhala wira kaanaakhalela owali vanceene, kaanirowa mpakha ipooma soorakamela wira kaalupatthe.
12 “Nihiku nimosa, kiira kirowaka oDamaasiko, maana kaahikhalana owerya ni makhulupale a anamukuttho yaahikiruma orowa waatthukwa awiixutti a weiwo.
13 Othana eriyari, keettaka mustaraatani, waahikhumelela waarya waavikana nsuwa, okhumaka wiirimu. Waarya iwo waahikirukurerya, vamosa ni ale keettana aka mukwaha.
14 Nuumala otheene ahu omorela vathi, kaahiiwa nsu nikilavulihaka ni nttaava na eheeberi, nriki: ‘Saulo, Saulo, xeeni munikilupattha anyu? Munniixooniha owereya mwaawanaka ni miyo’.*
15 Miyo kaahikoha wira: ‘Atokweene, nyuwo mwa pani?’ Nto Apwiya yaahikaakhula wira: ‘Miyo ka Yesu, yoowo munimulupattha anyu.
16 Vano nvenye, mweemele. Miyo kihookhumelelani wira koothanleni, ni wira mukhale murumeyi aka ni namoona a itthu moonale anyu, ni kinrowa aka owooniheryani.
17 Miyo kinoowoopolani eriyari ya atthu ala, ni ale ahikhanle ayuda, yaawo kinrowa aka woorumani,
18 wira mwatthukule maitho aya, ni mwaakumihe mweepiphini, mwaaroihaka opuro woowaarya. Nave, mwaakumihe mmatatani mwa Satana, mwaaroihaka wa Muluku. Siiso, Muluku onimwaalevelela itampi saya, ni animwaakhela itthu Muluku onaavaha awe ale aakhalinhe awe oowaarya mwaha wa okaamini’.
19 “Tivo, mwene Agripa, miyo koopaka ele Yesu aakirumme awe moolohani.
20 Siiso, kaahipacerya waalaleerya atthu a oDamaasiko. Nuumala-vo, kaahaalaleerya atthu a oYerusalemu, ni atthu a elapo yotheene ya oYudeya. Nave-tho, kaahaalaleerya ale ahikhanle ayuda, wira erukunuxe murima aya ni amukokhoreleke Muluku, evaraka miteko sinooniherya orukunuxa waya murima.
21 Eyo ti etthu ewiirinhe ayuda okivara mutemplo, anaphavela okiiva.
22 Nto kikhaliheriwaka ni Muluku, olelo-va kinnaalaleerya ale acikhaani ni aalupale. Masi, kinlaleya paahi ele soolempwa sa Maprofeta ni sa Moise sinihimya aya wira saamwiiraneya. Soolempwa iyo, sinihimya wira
23 Kristu onrowa ohaaxiwa ni tonrowa opacerya ohihimuxiwa mwa alipa-ookhwa. Nave, onrowa waalaleerya ni waakumiherya waarya atthu a nloko nla, ni ale ahikhanle ayuda”.
24 Vano, okathi Paulo aixaakiha awe, Festo aahikhuwela ohimyaka wira: “Nyuwo Paulo, munikhwa anepa! Osoma vanceene woowiirihani okhwa anepa!”
25 Masi Paulo aahihimya wira: “Nyuwo oottittimiheya Festo, miyo nkinikhwa anepa. Masi kinilavula moolumo eekeekhai ni ookhalela.
26 Tthiri, mwene kinilavulana aka mootaphuwa, onnisuwela itthu iya, maana kinnikupali wira khiivo ehinsuwela awe, okhala wira khiivo epakiwe wiiphiini.
27 Nyuwo mwene Agripa, kiireke munnikupali itthu sihimmwale ni Maprofeta? Miyo koosuwela wira munnikupali”.
28 Masi Agripa aahimuhimeerya Paulo wira: “Mwa okathi vakhaani, mwaamukikhaliha mukristau”.
29 Siiso Paulo aahimwaakhula wira: “Kinninvekela Muluku wira, mwa okathi vakhaani aahiiso munceene, nyuwo vamosa ni atthu ala otheene anikiwiriyana olelo, akhale makristau ntoko miyo, masi ehitthukiwe ni ikwirinti ntoko miyo kitthukiwe aka”.
30 Nuumala-vo, mwene Agripa aaheemela, vamosa ni kuvernatoro, ni Berenisi, ni alopwana akina yaakilanthi naawo.
31 Masi okathi yaakhuma aya, yaahipacerya ohimeeryana wira: “Mulopwana ola khopanke etthu enimwiiriha ophwanela wiiviwa aahiiso otthukiwa”.
32 Agripa aahimuleela Festo wira: “Mulopwana ola ahaavekenle orowa wa Seesari, aamutaphuliwa”.
Inoota
^ Ekereku, “ale oowaarya”.
^ Nwehe Moolumo Ootthokiheriwa.
^ Ekereku, “mwamanaka ni mwetto ekopo ya eyuuma”. Enihimmwa ekopo yoothokoliwa, yaarumeeliwa wira eettihiweke mwaamunama.
