Miteko 9:1-43
9 Masi Saulo aahilakela waahaaxa ni owiiva awiixutti a Pwiya. Tivo, aahirowa wa namukuttho muulupale,
2 onvekela ipaphelo wira ooniherye musinagoga,* oDamaasiko. Ipaphelo iyo, saaninvaha owerya wira aatthukwe ni aaroihe oYerusalemu, alopwana aahiiso athiyana, yaatthara Ephiro ya Apwiya.
3 Vano, okathi Saulo eetta awe mustaraatani, aattamelaka oDamaasiko, niinaano-ru, waarya waakhuma wiirimu waahimmwaleela.
4 Nto owo aahimorela vathi, onaiwa nsu naahimya wira: “Saulo, Saulo, xeeni munikilupattha anyu?”
5 Saulo aahikoha oriki: “Atokweene, nyuwo mwa pani?” Nsu nlo, naahimwaakhula wira: “Miyo ka Yesu, yoowo munimulupattha anyu.
6 Mweemele, mukele mpooma, nto weiwo munooleeliwa etthu yoopaka”.
7 Alopwana yeetta mukwaha ni Saulo, yaaheemela atikinihiwe ene, ahiweryaka ohimya etthu, okhala wira yaaniiwa nsu, masi khiyaamoona mutthu.
8 Nto Saulo aaheemela. Nnaamwi maitho awe yaatthukunwe, owo khaawerya woona etthu. Tivo, alopwana ale yaahinvarela ntata, anamuroiha oDamaasiko.
9 Siiso, yaahivira mahiku mararu ohiweryaka woona, nave khaalya nnakhala owurya etthu.
10 Aahikhala mwiixutti mmosa oDamaasiko, aihaniwa Ananiya. Nto Apwiya yaahimwiihana moolohani, yiiraka: “Ananiya!” Owo aahaakhula oriki: “Miyo-va, Pwiya”.
11 Vano, Apwiya yaahimuleela wira: “Nvenye, murowe ephiro eniihaniwa Yowookowa, mwamphavele vatthokoni va Yuda, mulopwana mmosa oniihaniwa Saulo, a elapo ya oTarso. Okathi ene yoola, owo onoovekela.
12 Nave moolohani, oomoona mulopwana oniihaniwa Ananiya, ophiyaka ni omwiixaatheryaka matata, wira otthikele woona”.
13 Masi Ananiya aahaakhula iiraka: “Pwiya, koowiiwa atthu anceene amulavulaka mulopwana owo, ni ahimyaka itthu sotheene sootakhala owiirenle awe awiixutti anyu* oYerusalemu.
14 Nave ohoorwa nno orummwale ene ni makhulupale a anamukuttho, wira aavare* otheene ale anromola nsina nanyu”.
15 Masi Apwiya yaahimuhimeerya wira: “Murowe, okhala wira miyo koomuthanla mulopwana owo wira aalaleerye nsina naka atthu a maloko otheene, vamosa ni mamwene ni anaisarayeli.
16 Tthiri, miyo kinoomooniherya oratteene itthu sotheene onrowa awe ohaawa, mwaha wa nsina naka”.
17 Tivo, Ananiya aahirowa, aahikela mpaani, ni aahimwiixaatherya matata Saulo, onahimya wira: “Saulo, munnaka! Pwiya Yesu, yoowo ookhumelenleni mustaraatani mweetta anyu murwaaka nno, ookiruma wira mutthikele woona ni musareye munepa woowaarya”.
18 Okathi ene yoowo, saahimora mmaithoni mwawe, itthu saakhala ntoko maapaliwe* a ihopa, onatthikela woona. Nto aahivenya, khupatisiwa.
19 Nave aahilya, khuphwanya ikuru.
Owo aahikhala mahiku vakhaani ni awiixutti oDamaasiko.
20 Moohipisa, aahipacerya omulaleya Yesu musinagoga,* ohimyaka wira Yesu owo, Mwaana a Muluku.
21 Vano, atthu otheene yanwiriyana, yaahitikinihiwa vanceene, anahimya wira: “Ola khahiyo mulopwana yoole oYerusalemu, aalupattha vanceene atthu yaaromola nsina nla? Kiira ti yoola orwenle waavara awiixutti a Yesu wira aaroihe* wa makhulupale a anamukuttho?”
22 Masi Saulo, aamutepa osuwela olaleerya saana ni aanaatikiniha ayuda yaakhala oDamaasiko, okathi aawooniherya awe oratteene wira Yesu ti Kristu.
23 Nuuvira mahiku manceene, ayuda yaahithukumana, ampaka palano wira amwiive.
24 Masi Saulo aahimusuwela palano owo. Nave-tho, othana ni ohiyu, yaaniwehaweha saana mikhora sa epooma, wira amwiive.
25 Siiso, ohiyu, awiixutti awe Saulo yaahimuhela muttankani,* ananviriha vaxanelani ya exiri, amukuruxelaka vathi.
26 Nuumala ophiya oYerusalemu, Saulo aaheererya okhala vamosa ni awiixutti, masi otheene aya yaanimoova, maana khiyaakupali wira owo aari mwiixutti a Yesu.
27 Siiso, Baarnaba aahirwa omukhaliherya Saulo, ni aahimuroiha wa arummwa. Nave aahaahimeerya arummwa moota Saulo aawehale awe Apwiya mustaraatani, ni moota Apwiya yaalavunle aya ni Saulo. Aahaaleela-tho moota Saulo aalalenrye awe oDamaasiko, mwa nsina na Yesu, ohoovaka etthu.
28 Nto, Saulo aahikhala naawo, nave aaneetta mootaphuwa oYerusalemu, olaleyaka nsina na Pwiya, ohoovaka etthu.
29 Owo aanilavula ni ovaanyihana ni ayuda yaalavula ekereku. Masi awo yaaneererya omwiiva.
30 Okathi axinna yaasuwenle aya eyo, yaahimuroiha oKesareya, amuruma orowa oTarso.
31 Nave, awiixutti otheene a oYudeya, ni oGalileya ni oSamariya, yaanikhala ni murettele, ni yaanilipihiwa. Okathi yooniherya aya omoova Yehova, ni yaakhala aya alipihiwaka ni munepa woowaarya, awo yaanitepa wuncerereya.
32 Okathi Pedru eetteetta awe mittetthe sotheene, aahiphiya wa awiixutti* yaakhala oLida.
33 Aahimphwanya weiwo, mulopwana mmosa aihaniwa Eneya, yoowo ahaakhuma vakhaamani mwa iyaakha 8, mwaha woowi aari oorakala.
34 Vano Pedru aahimuleela wira: “Eneya, Yesu Kristu onnoopenuxani. Nvenye, mulokiherye ekhaama anyu”. Siiso, owo aahivenya moowaakuveya.
35 Okathi atthu otheene anikhala oLida ni oSaroni yanwenhe aya mulopwana ole, yaahiwaamini Apwiya.
36 Muttetthe wa oYope, aahikhala mwiixutti muthiyana, aihaniwa Tabitha, nsina nenlo nintaphulela “Dorka”.* Owo aanivara miteko sinceene sooreera ni aanaakhaliherya alipa-oohaawa.
37 Okathi Pedru aari awe oLida, Dorka aahiwereiwa ni aahikhwa. Nto murutthu awe waahirapihiwa, waataleliwa ekwartu ya osulu.
38 Muttetthe wa oLida waahaattamela oYope. Nto okathi awiixutti yaiwale aya wira Pedru aari oLida, yaahaaruma alopwana anli orowa omwiihana, ariki: “Xontte murwe nno, voohipisa”.
39 Vano Pedru aahivenya onarowa ni alopwana ale. Nuumala ophiya, awo yaahimuroiha ekwartu ya osulu. Nto, anaamukhweli otheene, yaahimurukurerya Pedru, yinlaka. Nave yaanimooniherya malaya ni ikuwo sinceene Dorka aapanke* awe, ori ene mukumi.
40 Nto Pedru aahaaruma atthu otheene okhumela vate. Owo aahikokhora, onavekela. Vano aahirukunuwa onaweha murutthu ole, onahimya wira: “Tabitha, nvenye!” Siiso, Tabitha aahihula maitho awe, onanweha Pedru. Amoonaka-ru, aahikilaathi.
41 Pedru aahinvarelela ntata, khimweemexa. Nuumala-vo, aahiwiihana awiixutti* ni anaamukhweli, onawooniherya Tabitha ori ene mukumi.
42 Etthu ela yaahisuweliwa muttetthe wotheene wa oYope, nto atthu anceene yaahiwaamini Apwiya.
43 Pedru aahikhala oYope mahiku manceene ni mulopwana mmosa aavara muteko ni isapala, yoowo aihaniwa Simoni.
Inoota
^ Nwehe Moolumo Ootthokiheriwa.
^ Ekereku, “ale oowaarya”.
^ Ekereku, “aatthukwe”.
^ Aahiiso, “maapanuwa”.
^ Nwehe Moolumo Ootthokiheriwa.
^ Ekereku, “aahoole atthukiwe ene”.
^ Aahiiso, “musestuni”.
^ Ekereku, “ale oowaarya”.
^ Nsina na ekereku noowi Dorka ni aramaiko noowi Tabitha, oowanli aya anitaphulela “Naahe”.
^ Aahiiso, “aattontthe”.
^ Ekereku, “ale oowaarya”.
