Mwene mukina a oBabilonia aitthaniwa Dario a oMedia. Dario aahiweha wira Daniyeli aari mutthu ooreera murima. Nto aahimuthanla Daniyeli wira aahooleleke atthu otheene oottittimihiwa a elapo ele. Masi atthu awo yaanimukhalela nrima Daniyeli ni yaahiphavela omwiiva. Awo yaanisuwela wira Daniyeli aaninvekela Yehova ikwaha tthaaru vanihikuni. Vano alopwana ale yaahimuleela Dario wira: ‘Mwene ahu, mpake nlamulo ninhimya wira atthu otheene ahaana woolompani nyuwo paahi. Akhala mutthu ohiniiwelela nlamulo nlo, ohaana oriheliwa munlittini na akharamu’. Miruku iyo saahimusivela Dario ni aahikumiherya nlamulo nlo.

Daniyeli vaasuwenle awe wira nookumiheriwa nlamulo nlo, aahirowa owannyawe. Aahikokhora ohoolo wa ejanela awe ni aahimulompa Yehova. Ananrima ale yaahirowa owannyawe Daniyeli, yaahimphwanya alompaka. Awosa yaahitthimakela wa mwene khumuleela so: ‘Daniyeli khaniiwelela nlamulo nanyu. Owo onnimulompa Muluku awe ikwaha tthaaru vanihikuni’. Mwene aanimphenta Daniyeli nto khaaphavela omwiiva. Nihiku notheene aaniphavelasa inamuna wira omoopole Daniyeli. Nuumala-vo, mwene ole aahaaruma arumeyi awe omurihela munlittini na akharamu.

 Ohiyu ole, Dario aahixankiheya ni Daniyeli ni khaawenrye orupa. Mmeeloni mwaya voosiisu, aahitthimakela vanlittini naari akharamu ni aahiikhuwela ohimyaka so: ‘Daniyeli, niireke Muluku anyu oowoopolani?’

Dario aahiiwa nsu. Aari Daniyeli! Owo aahimuhimeerya Dario wira: ‘Nlaikha na Yehova nootthuka iyano sa akharamu. Awo khakiirinhe etthu yootakhala’. Dario aahitteeliwa murima vanceene! Aahiruma okumihiwa Daniyeli munlittini mme. Daniyeli khiirihiwe etthu yootakhala ni akharamu ale. Nto Mwene aahaaruma maguarda wira: ‘Haya mwaavare makhulupale otheene yaamoothenrye Daniyeli ni mwaarihele munlittini’. Okathi atthu ale yaariheliwe aya munlittini, yaahikhuuriwa ni akharamu.

Dario aahiruma olaleiwa yooruma yaahimya so: ‘Atthu otheene emuttittimiheke ni omoova Muluku a Daniyeli. Owo oomoopola Daniyeli munlittini na akharamu’.

Niireke munninvekela Yehova mahiku otheene ntoko Daniyeli?