Anna Oophentiwa:

Ntoko arumeyi a Yehova, hiyo ninnittittimiha Nuulumo nawe, Biibiliya. Ninnikupali wira Biibiliya onihimya itthu siiraneyale, onnivaha malakiheryo oororomeleya, ni onnooniherya wira Yehova onnaaphenta vanceene apinaatamu. (Esalimo 119:105; Luka 1:3; 1 Yohani 4:19) Hiyo ninniphavela vanceene waakhaliherya atthu akina wiixutta ikeekhai siri mBiibiliyani. Tivonto, ninnihakalala okumiherya eliivuru ela eni: Mwiixutte Myaha sa Biibiliya. Vano, nimphavela wootthokiheryani vakhaani itthu siri muliivuruni-mu.

Eliivuru ela epakiwe yuupuweliwaka anamwane. Masi, hata vari siiso, pooti orumeeliwa wira yiixuttihiwe atthu aalupale yaawo aniphavela osuwela itthu sikina sa mBiibiliyani. Nave, okhala wira Biibiliya olepeliwe atthu otheene, moohaaniherya otheene ahu nnoottottela mureerelo wuuluula myaha sawe, seiyo sikhanle oonikhaliherya ophwanya ohakalala wekeekhai.

Erumeelaka sowiiraneya sa mBiibiliyani, eliivuru ela enninleela sowiiraneya sa apinaatamu okhuma woopaceryani orowa muhoolo. Nihiimananiha vanceene wira nitthokiherye myaha sa mBiibiliyani mwa enamuna yookhweya ni yoowiiweya, moovarihana ni okathi siiraneyale aya.

Masi eliivuru ela khahiyo paahi enitthokiherya myaha sa mBiibiliyani. Moolumo ni idesenyu saya, silokiheriwe mwa enamuna yoovara murima ni enikhaliherya owuupuwela atthu awo ntoko akumi.

Eliivuru ela enninikhaliherya oweha wira Biibiliya onnaaromola atthu yaamwiiwelela ni yahaamwiiwelela Yehova. Nave enninikhaliherya wiixutta ni sowiira sa atthu awo. (aRoma 15:4; 1 aKorinto 10:6) Eliivuru ela ekawanyiwe ipantte 14. Woopaceryani wa khula epantte, ennuuluula myaha sinrowa ahu wiixutta epantte eyo.

Akhala wira mwa namuyari, pooti osomaka mwaha, nuumala-vo mmutthokiheryeke ni omutaphulela mwaninyu idesenyu. Moottharelana,  oowanli anyu pooti osoma epantte ya mBiibiliyani okumihiwe aya mwaha owo. Mmukhaliherye mwaninyu oweha moota ele esomme awe mBiibiliyani enivarihana aya ni mwaha onithokoreriwa. Pooti opakiwa etthu emosaru okathi onikhaliheriwa awe mutthu muulupale wira iiwexexe ihapari sa Biibiliya.

Ninlipelela wira eliivuru ela enimwaakhaliherya atthu otheene, anamwane ni atthu aalupale, wira yiixutte Nuulumo na Muluku ni weettela mookumini mwaya. Eyo enimwaakhaliherya awo omukokhorela Yehova, yiirelaka mpantta emusi awe yoophentiwa.