YOOSOMA 8
Xeeni Muluku Onihiya Awe Ohaawa ni Sootakhala Siiraneyaka?
1. Sootakhala sipacenrye sai okhumelela?
Muluku ohaahiya apinaatamu yiilamulelaka ovinyerya khalai, wira owooniherye ohiwerya waya omaliha mixankiho saya
Otakhala opacenrye nuumala Satana olavula itthu sowootha. Khalai Satana aari nlaikha noomalela, masi owo khaaphavela ‘okhala n’ikekhai’. (Yohani 8:44) Satana aakhalela nrima ediretu ya okokhoreliwaka Muluku paahi, nto owo anaphavela okokhoreliwa. Satana aahinwoka muthiyana oopacerya, Eva, nto khumwiiriha ohimwiiwelela Muluku. Adamu aahiiwanana ni Eva khuhiya omwiiwelela Muluku. Ele Adamu yaapanke awe yaahikumiherya ohaawa ni okhwa.—Musome Maphattuwelo 3:1-6, 19.
Vaavo Satana aamutumererya awe Eva ohimwiiwelela Muluku, Satana aapaceriha ovaanyiha ediretu ya Muluku waalamulela atthu, wala okhulupale awe ntoko Muluku. Atthu anceene animutthara Satana nto annikhootta Olamulelo wa Muluku. Ti maana aya Satana tonilamulela ‘olumwenk’ula’.—Mmusome Yohani 14:30; 1 Yohani 5:19.
2. Niireke soopattuxa sa Muluku khisaalonke?
Miteko sotheene sa Muluku ti soomalela oloka. Soopattuxiwa sotheene sa Muluku, apinaatamu ni malaikha, yanwerya omwiiwelela Muluku moomalela. (Otumererya 32:4, 5) Muluku oonipattuxa khunivaha otaphuwa woothanla opaka itthu sooloka wala soohiloka. Mwa enamuna eyo hiyo ninniphwanya eparakha ya wooniherya omphenta wahu Muluku.—Mmusome Yakobo 1:13-15; 1 Yohani 5:3.
3. Muluku onihiyeryani ohaawa wiiraneyaka mpakha vano?
Mwa okathi vakhaani, Yehova ohaahiya yeettelaka otthuna waya ale anivaanyiha ediretu awe ya olamulela. Mwaha aya? Wira owooniherye apinaatamu yaale anithanla wiilamulela, wira khanikhumela saana voohikhala Muluku. (Musuweli 7:29; 8:9) Vano nuumala ovira iyaakha 6.000 apinaatamu yiilamulaka, vannooneya saana wira pinaatamu khoniwerya omaliha ikhotto, otakhala, ohikhala exariya wala iretta.—Mmusome Yeremiya 10:23; aRoma 9:17.
Moovirikana ni olamulelo wa apinaatamu, olamulelo wa Muluku onnaaphwanyiha mureerelo yaale aneemererya. (Yesaya 48:17, 18) Moohipisa Yehova onrowa omala-maliha iguvernu sotheene sa apinaatamu. Atthu yaale paahi anithanla olamuleliwa ni ekuvernu ya Muluku tanrowa okhalaka valaponi. —Yesaya 11:9.—Mmusome Daniyeli 2:44.
Nwehe eviidiyu Xeeni Muluku Onaahiya Awe Atthu Ehaawaka?
4. Opixa murima wa Muluku onniphwanyiha exeeni?
Satana aahimyale wira apinaatamu animukokhorela Muluku mwaha woophavela mihakhu paahi. Niireke munoowerya ovaanya masu ala eethiru a Satana? Aayo, munoowerya! Opixa murima wa Muluku, woonivaha okathi wira nithanle, olamuleliwa ni Muluku, wala olamuleliwa ni pinaatamu. Mweettelo ahu tonooniherya olamulelo ene onithanla ahu.—Mmusome Yobi 1:8-12; Miruku 27:11.
5. Ninrowa omuthanla sai Muluku okhala Mwene ahu?
Mweettelo ahu, tonooniherya wira nimphavela olamuleliwa ni Muluku
Nnoomuthanla Muluku okhala Mwene ahu, akhala wira ninneettela okokhorela wekeekhai onivarihana ni Biibiliya. (Yohani 4:23) Nnoomukhootta Satana, akhala wira ninnimutakiha Yesu ohiirela mpantta ipoliitika ni ikhotto.—Mmusome Yohani 17:14.
Satana onniwiiriha atthu osiveliwaka ohaaxana. Nto okathi ninkhootta ahu opaka itthu iyo, apatthani wala amusi, pooti onivaanyiha wala oniveeha. (1 Pedru 4:3, 4) Nto nihaana othanla. Niireke ninrowa opatthanaka ni atthu animphenta Muluku? Nnimweettelaka malamulo awe amiruku ni oophenta? Opaka eyo onooniiriha wooniherya wira Satana nawoothe, maana onihimya wira okathi wooxanka khuuvo mutthu onimwiiwelela Muluku.—Mmusome 1 aKorinto 6:9, 10; 15:33.
Moota Muluku onaaphenta awe apinaatamu, onooniherya wira otakhala ni ohaawa onoomala. Otheene yaale animukupali Muluku, anrowa okhalana okumi woohimala valaponi.—Mmusome Yohani 3:16.
