Yehova onlipelela wira ale athelanne akhaleke oororomeleya mukasamentoni mwaya. Okathi aamuthelinhe awe mulopwana ni muthiyana oopacerya, Yehova aahimmye so: ‘Tivó mulopwana . . . onikhalawe vamosá ni mwar’awe: òwanli aya enakhala ntoko mutthu mmosaru pahi’. Muhoolo mwaya, Yesu Kristu aahilavula-tho masu ale nisomme ahu ni khincererya oriki: “Tivó, yeyo Muluku ephitanyalyawe mutthu ahimwalanyihé-tho”. (Maphattuwelo 2:24; Matheyo 19:3-6) Moonelo wa Yehova ni Yesu, ti woowi ekasamento eri nivarihano na mahiku otheene, nenno nnimala paahi akhala wira mmosa ohookhwa. (1 aKorinto 7:39) Okhala wira ekasamento eri murehereryo woottittimiheya wa Muluku, nto mutthu ahuupuweleke wira pooti omwalana nuule othelanne awe khuta okathi oniphavela awe. Mwekeekhai, Yehova onninyokha omwalana vahikhanle nthowa nnihimmwa mBiibiliyani.​—Malakhiya 2:15, 16.

Mathowa xeeni anihimmwa mBiibiliyani animweemererya mutthu omwalana? Tthiri, Yehova onninyokha oraruwa ni itthu seekhapa. (Maphattuwelo 39:9; 2 Samuweli 11:26, 27; Esalimo 51:6) Yehova vannimunanara vanceene itthu s’ekhapa, tivonto oneemererya awe wira ole onitthekeliwa pooti omwalana. (Mwaphavela soohimmwa sikina sa itthu sa ekhapa, nwehe Muru 9, ettima 7.) Yehova onnimweemererya ole oraruweliwe othanla akhala wira oniphavela omwalana wala ovikaniha okhalana ole orarunwe. (Matheyo 19:⁠9) Tivonto, akhala wira ole oraruweliwe onithanla omwalana, Yehova khonrowa onanariwa. Masi-tho, anna a mmulokoni, khanrowa omutumererya ole otthekeliwe wira omwalane. Sookhala itthu sinimwiiriha ole oraruweliwe ovikaniha okhala nuule orarunwe, akhala wira oottharuwa tthiri. Nto, ale arina nthowa na mBiibiliyani nniweemererya omwalana, ahaana opaka mmensaya yoothanla aya, nave-tho yeemereryeke sookhumelela saya.​—aGalasia 6:5.

Sookhala mikhalelo sikina sootakhalexa, siniwiiriha maKristau makina othanla omwalana wala ovalaana nnaamwi ohikhanle orarunwe. Nto mmikhalelo iyo, Biibiliya onihimya wira ole onikhuma vatthokoni, “ahitheliweké-tho ni mulopwana mukina: ohiya vo, atthikelane n’iy’awe. Siso-tho, mulopwana ahimwalané ni mwar’awe”. (1 aKorinto 7:11) MuKristau owo khotaphunwe wira athelane ni mutthu mukina. (Matheyo 5:32) Nkahaya muthokorerye itthu sikina sootepexa, siniwiiriha atthu akina othokoreryaka ntoko mathipelo a ovalaana.

Okhootta okhaliherya etthoko. Atthu a vatthokoni pooti ohaawaka, mwaha woohikhala yoolya ni soowara, akhala wira mulopwana owo khoniphavela oruuha itthu iyo. Biibiliya onihimya so: ‘Akhala mutthu ohinithokorerya . . . etthoko awe, mutth’uwo òhiya wamini wawe: owo t’otakhala murima onvikana mutthu ohinamini’. (1 Timótheyo 5:8) Akhala wira mulopwana ole khonttharuwa mweettelo awe, muthiyana pooti othanla ovalaana moovarihana ni nlamulo, mmureerelo awe ni wa anaawe. Nto, axitokweene a mmulokoni, ahaana othokorerya saana mwaha owo wa muKristau onikhootta waakhapelela atthu a vatthokoni vawe. Ole onikhootta okhapelela etthoko awe, pooti okumihiwa mmulokoni.

Omuhaaxa ole othelanne awe mmukhalelo wa werutthuni. Pooti wira mulopwana wala muthiyana oowali, onnimuhaaxa vanceene ole othelanne awe, nto ekumi ya ole onihaaxiwa khinakhala mmaxakhani. Akhala wira ole onihaaxa muKristau, axitokweene a mmulokoni ahaana otokosa mwaha owo. Mutthu oowali, ni oohaaxa, pooti okumihiwa mmulokoni.​—aGalasia 5:19-21.

Omukhoottiherya ole othelanne awe omukokhorela Yehova. Mulopwana wala muthiyana, pooti weereryaka ikwaha sinceene wira ole othelanne awe, ohiye omukokhorela Yehova, aahiiso omukhanyererya otthekela sooruma sa Muluku. Nto akhala wira ti siiso, ole onihaaxiwa pooti othanla ovalaana moovarihana ni nlamulo wira avikaniheke “omwiwelela Muluku ovikana owiwelela atthu”.​—Miteko 5:29.

Mmikhalelo sotheene sootakhala sithokorenrya ahu, ohikhale mutthu onimutumererya ole onihaaxiwa wira ovalaane wala ohivalaane. Nnaamwi apatthani ni axitokweene oolipa momunepani waaniheryasa arowaka okhaliherya ni ovaha miruku siri mBiibiliyani, atthu awo khansuwela itthu sotheene siniiraneya eriyari ya anamathelana awo. Paahi Yehova toniwerya oweha itthu sotheene. Aayo, mulopwana wala muthiyana muKristau, khaarowa omuttittimiha Muluku aahiiso ekasamento, akhala wira onoothererya itthu soohikhalela moophavela ovalaana. Yehova onnisuwela ele enimwiiriha mutthu ovalaana, nnaamwi mutthu owo waaniheryasa ophavelaka wiipithiha. Nto, “khivo etthu epattuxiwe envitheya vamaithoni va Muluku: vamaithoni vawe itthu sothene tisowoneya. Owo t’unrowa onikoha mwaha wa miteko sahu”. (aHéberi 4:13) Masi, vakhala wira ohaaxa iwo onnivikaniha, ohikhale mutthu onrowa ompwapwela, vaavo vanithanla awe ovalaana. Nto, “othene hiyo nihana okhumelela oholo wa Muluku, wira niphukiwe ni yowo”.​—aRoma 14:10-12.