MAPROFETA a khalai yaanimwamini Muluku. Yaanikupali sooleiherya sa Muluku ni yaaneettela seiyo. Itthu xeeni kamosa-kamosa Muluku aaleihenrye awe?

Nuumala Adamu ni Eva omwareya ojardim wEdeni, Muluku aahihimya wira aarowa omuthanla mutthu wira onyaanye muru wa “enowa”, ekhanle ‘enowa yulupalexa’, enowa ya khalai “enìhaniwa Nwanani walá Satana”. Owo aarowa ompwetexa Satana moomalela. (Maphattuwelo 3:14, 15; Wisupulula 12:9, 12) Ti pani aarowa opaka eyo?

Nuuvira iyaakha 2.000 vaavo yaahimmwale aya eprofesia ela yoopacerya, Yehova aahimuleela Abrahamu wira Ole aaleiheriwe aarowa okhala osuulu awe. Muluku aahimuleela Abrahamu iiraka: “Maloko othene a mulaponi anorerihiwa mwaha wa nloko nanyu, okhala wira muhìwelela molumo aka”.​—Maphattuwelo 22:18.

Mwaakha wa 1473 Ahinatthi Kristu Orwa, Muluku aahimuleela profeta Moise itthu sikina voohimya sa “osùlu”. Moise aahaaleela aIsarayeli wira: “Apwiya Muluku anyu anomuthanla munlokoni mwanyu ni mw’amusi anyu profeta onlikana ni miyo: ti yowo orinanyu onwiriyana”. (Otumererya 18:15) Moolikanasa ni Moise, profeta owo aakela orwa wa emusi ya Abrahamu.

Profeta owo, aarowa okhala-tho osuulu wa Mwene Davidi ni mwene muulupale. Muluku aahimuleiherya Mwene Davidi ohimyaka so: “Miyo kinrowa omukhaliha mwené mwan’inyu, yowo onrowanyu oyareliwa: miyo kinolipiha omwene awe wa mahiku othene”. (2 Samuweli 7:12, 13) Nave-tho, Muluku aahooniherya wira osuulu ole wa Davidi aarowa okhala ‘Mwené a murettele, [ni] Owerya wawe wamunnuwa: murettele onruhawe khunrowa omala-tho. Owo ontthuna  okhaliha n’ulipiha omwene awe n’ihakhi n’ixariya, okhuma vano mpakha vohimala-tho’. (Yesaya 9:5, 6) Mwene owo axariya aarowa oruuha murettele ni omaaleleya elapo yotheene. Masi aarowa ophiya okathi xeeni?

Muhoolo mwaya, nlaikha Gabriyeli naahimuleela profeta Daniyeli masu ala: “Musuweleke, mphaveleke wiwa orattene: okhuma okathi onrummwaya otekiwa-tho oYerusalemu mpakha orwa wa mukhulupale [Mesiya] ottikittheliwe ni Muluku, sinovira iyakha [“isumana”, Tradução do Novo Mundo] thanu na pili  . . . [ni] iyakha miloko mithanu na mosa ni pili”. (Daniyeli 9:25) Isumana 69 sinooniherya okhala isumana sa iyaakha, eyo piiyo, khula esumana yaathonyerya iyaakha 7. Nto isumana 69 sinithoonyerya iyaakha 483. Okathi owo, wiiraneyale okhuma eyaakha ya 455 Ohinatthi Kristu Orwa, mpakha eyaakha ya 29 Nuumala Kristu Orwa. *

Niireke wira Mesiya, yoowo ori profeta oolikana ni Moise ni “osùlu” aaleiheriwe, aarwiiye tthiri mwaakha wa 29 E.C? Nrowe niwehe.