1, 2. Exeeni woonasa wene Pedru aalipelela awe okathi Yesu aalavula awe oKafarnawu, masi yiiraneyale exeeni?

PEDRU aanaawehexexa atthu ale yanwiriyana Yesu. Atthu awo yaari musinagoga oKafarnawu. Nave waari muttetthe yoole aakhala awe Pedru; ni aatumiha awe ihopa, waattamela Ephareya ya oGalileya; nave apatthani awe anceene, amusi awe ni ale yaavarana awe muteko yaakhala muttetthe yoole. Voohaaniherya, Pedru aaphavela wira atthu a muttetthe awe, amooneke Yesu ntoko saamoona awe, ni aphaveleke wiixutta myaha sa Omwene wa Muluku, saixuttihiwa ni mwiixuttihi ole muulupale. Masi vaakhala ntoko wira khivaaweryaneya.

² Anamunceene yaahihiya onwiriyana Yesu. Vaaniweryaneya owiiwa akina amulavulaka voohankawani ni voohiloka voohimya sa ihapari sa Yesu. Masi etthu ekina yaamuxankiha Pedru waari moonelo wa awiixutti akina a Yesu. Maana khiyaahakalala ni ekeekhai yaamanle aya wiixutta. Awosa yaakhala ntoko atthu ooxanka ni ooriipiwa murima. Nave akina yaahilavula muupuwelo aya, ahimyaka wira moolumo ala aatepa orika. Akhoottaka omwiiwa Yesu, yaahikhuma musinagoga khuhiya weetta ni Yesu.—Mmusome Yohani 6:60, 66.

3. Waamini wa Pedru waamukhalihenrye sai ikwaha sinceene?

³ Tthiri mwaha ole waari woovila wa Pedru ni arummwa akina. Pedru khaiwexenxe ele Yesu aahimmye awe nihiku nne. Nave aahoona wira moolumo a Yesu yaari tthiri oovila wiiwexexa, akhala wira khaarowa woona ntoko moolumo a nthoonyeryo. Vano, Pedru aapanke exeeni? Ela khahiyo yaari ekwaha yoopacerya Pedru eehereriwa awe ni Pwiyawe, ni khahiyo yaari ekwaha yookiserya. Niwehe moota waamini wa Pedru waamukhalihenrye aya omaliha muxankiho ole ni ovikaniha okhala oororomeleya.

4, 5. Yesu oonihenrye sai wira aarina muupuwelo woovirikana ni wa atthu akina?

⁴ Ikwaha sinceene Pedru aanitikinihiwa ni moolumo ni miteko sa Yesu. Yesu aanilavula ni opaka itthu mwa enamuna atthu anceene yahaalipelela aya. Mahiku vakhaani avinre, Yesu aahaavaha yoolya atthu anceene mwa mwiiriirya. Nuumala-vo, atthu awo yaaphavela  omuhela omwene. Nto atthu anceene yaahitikinihiwa nuumala omoona Yesu okhumaka opuro ole, ni waahimeerya awiixutti awe owela ekalawa wira arowe epooma ya oKafarnawu. Ohiyu, awiixutti yeettihaka ekalawa, awo yaahitikinihiwa nuumala onweha Yesu eettaka vasulu va maasi Ephareya ya oGalileya, ni omooniheryaka Pedru otthuneya waya waamini.

⁵ Vaasiisu ene, awiixutti ale yaahoona wira muttitthi ole waahatthara mpakha waaphwanya. Masi vanikhala wira muttitthi ole waatthara wira Yesu opake mwiiriirya wa okumiherya yoolya paahi, ohiya ophavela olya wa omunepani. Nto Yesu aahaapwapwela, mwaha woophavela waya itthu sa werutthuni paahi. (Yoh. 6:25-27) Ovaanela iwo waahivikaniha osinagoga ya oKafarnawu, weiwo Yesu aawiixuttinha awe etthu yootthuneya nnaamwi atthu ale yoonale ovila.

6. Nlikanyiho xeeni Yesu aavanhe awe, ni ale yaawiriyana yoonenle sai?

⁶ Yesu aaphavela wira atthu ale ahimooneke ntoko namavaha yoolya ya werutthuni paahi, masi amooneke ntoko yoovaha ya Muluku, orweela mwa yoowo atthu ale yaakhanle aya oophwanya ekumi ehinimala yaamwaamini. Tivonto aapanke awe ntakiheryo nimosa ailikanyihaka ni emana, yoolya yeeyo yaakhuma wiirimu mahiku a Moise. Okathi atthu akina yaakhoottale aya, owo aahilavula nlikanyiho nikina, otthokiheryaka wira vaatthuneya okhuura erutthu awe ni owurya ephome awe wira mutthu ophwanye ekumi. Nuumala olavula nlikanyiho nla, atthu yaahinanariwa vanceene. Akina yaahimya so: “Molumo ala àtepa orika. T’ani onwerya okupali?” Awiixutti anceene a Yesu yaahihiya omutthara. *—Yoh. 6:48-60, 66.

7, 8. (a) Exeeni nlelo Pedru ahiiwexenxe awe voohimya sa Yesu? (b) Pedru aakhunle sai nikoho na Yesu wa arummwa awe?

⁷ Pedru aarowa opaka exeeni? Woonasa wene owo khaiwexenxe masu yaalavuliwe ni Yesu. Nlelo khaiwexexa saana wira Yesu aahaana okhwa wira aakhwaniherye yoolakela ya Muluku. Niireke Pedru aarowa omuhiya omutthara Yesu ntoko awiixutti ale yaamuhiyale? Nnaari; yookhala etthu emosa yaamwiiriha Pedru ohaatakiha atthu ale. Yaari exeeni?

⁸ Yesu aahaakoha awiixutti awe wira: “Khino nyuwo-tho munnitthuna orowa?” (Yoh. 6:67) Nnaamwi Yesu aalavula ni awiixutti ale 12, Pedru taapacenrye olavula. Okhala wene owo taapacerya olavula. Woonasa wene Pedru taari muulupale waavikana akhwaawe. Nto, vannooneya wira Pedru taalavulexa waavikana akina, woonasa wene  khaawerya okhala siiso ohilavulaka ele yuupuwela awe. Vano masu ootepa ootthuneya aalavunle awe taala: “Pwiya, nintthuna omutthara pani? Murina molumo anvaha ekumi yohimala, ti nyuwo”.—Yoh. 6:68.

9. Pedru oonihenrye sai ororomela wawe wa Yesu?

⁹ Niireke masu ala khanivara murima anyu? Pedru omwaamini wawe Yesu waahimukhaliherya olipiha mukhalelo mmosa wootepexa oreera, eyo piiyo, ororomeleya. Pedru aahiiwexexa oratteene wira Yesu taari Moopoli paahi, yoowo aathanliwe ni Yehova, nave masu a Yesu, niire so, sowiixuttiha sawe voohimya sa Omwene wa Muluku, sinnivaha woopowa. Pedru aanisuwela wira hata ahiiwexexa itthu sikina, khiwaakhanle-tho woorowa, okhala wira aaphavela okhaliheriwa ni Muluku ni waakhela mareeliho a okumi woohimala.

10. Nitakiheke sai ororomeleya wa Pedru?

¹⁰ Niireke ni nyuwo munoona siiso? Vooriipiha murima, akina olelo-va anihimya wira annimphenta Yesu, masi khanimuroromela. Omuroromela Kristu mwekeekhai, onivekela woonaka sowiixuttiha sawe, ntoko Pedru soonela awe. Nto nihaana ophavela osuwela yootaphulela ya sowiixuttiha iyo, ni weettela sowiixuttiha, hata ikwaha sikina nihiiwexexaka saana wala woona ohikhalela. Nto namuroromela, nikupaliki wira nnoophwanya ekumi ehinimala ntoko Yesu siniphavela awe.—Musome  Esalimo 97:10.

11. Yesu ni awiixutti awe yaaronwe vai? (Nwehe enoota.)

¹¹ Ohivinre okathi munceene nuumala ovara miteko sinci, Yesu aahaakuxa arummwa awe ni awiixutti akina arowaka mpantta onikela epheyo. Ikwaha sikina, mutthu oryeene Ephareya ya oGalileya, vaaniweryaneya oweha Mwaako Hermoni okhuneeliwe ene ni eneevi, mpantta onikhuma epheyo wa Elapo Yolaiheriwa. Okathi atthu ale waattamela aya opuro ole, mwaako waanitepa wunnuwa, nave yaaniwerya oweha mittetthe sookhuveela sa oKesareya wa Filipe. * Opuro ola, yaawerya aya oweha saana mpantta wa okuusini wa Elapo Yooleiheriwa, Yesu aahaakoha awiixutti awe etthu yootepa otthuneya.

12, 13. (a) Xeeni Yesu ohalaka okoha ele atthu yuupuwela aya sa yena? (b) Olavulaka sa Yesu, Pedru oonihenrye sai waamini wekeekhai?

¹² Yesu aahaakoha wira: “Atthu anihimya wira miyo t’ani?” Hiyo pooti omuupuwela Pedru onwehaka saana Yesu, khiyoona  itthu ntoko osuwela, miruku ni owerya wa Yesu. Nto Yesu aaphavela woona ele atthu yaasuwela aya voohimya sa yena. Awiixutti yaahaakhula nikoho nle, ahimyaka muupuwelo wa atthu akina voohimya sa Yesu. Masi Yesu aaphavela osuwelexa. Niireke awiixutti awe yaarina muupuwelelo mmosaru wa atthu awo? Nto aahaakoha wira: ‘Ankhi nyuwo munihimya wira miyo t’ani?’—Luka 9:18-20.

¹³ Mukwaha ola, Pedru khoovelenle-tho waakhula nikoho na Yesu. Olavulaka vowiiweya ni moolipiherya, aahihimya moonelo wa awiixutti akhwaawe oriki: “Nyuwo mwá Kristu, Mwana a Muluku mukumi”. Hiyo pooti wuupuwelela ohakalala wa Yesu ni masu a niphento yaalavuliwe ni Pedru. Yesu aahimuupuxerya Pedru wira ti Yehova Muluku aamukhalihenrye wiiwexexa ekeekhai eyo, ohiya pinaatamu. Yehova aahimwiiriha Pedru woona ekeekhai yuulupale Yehova yuupulunle awe, eyo piiyo, ekeekhai voohimya sa Mesiya, wala Kristu, yoowo aaleiheriwe khalai!—Mmusome Matheyo 16:16, 17.

14. Miritti xeeni sootthuneya Yesu anvahale awe Pedru?

¹⁴ Kristu ola, ti yoowo eprofesia ya khalai yaamuhimya aya okhala nluku nenno naarowa okhoottiwa ni alipa-ooteka. (Esal. 118:22; Luka 20:17) Yesu uupuwelaka iprofesia iyo, aahuupulula wira Yehova aamuteka vamwala aahiiso vanlukuni, muloko awe; nto mwala owo tuule Pedru aahimmye awe okhala Kristu. Tivonto Yesu anvanhe awe Pedru iparakha sikina sootthuneya sa mmulokoni. Pedru khaavahiwe muritti wa waahoolela arummwa akina, ntoko itiini sikina siniixuttiha aya, masi Yesu anvahale miritti sinceene. Owo onvahale “mihulelo s’omwene”. (Math. 16:19) Pedru aarowa okhalana eparakha yoopaceriha okela momweneni mwa Muluku mwa ikrupu tthaaru, niire so, yoopacerya: aYuda, ekina, aSamariya, ni yookiserya, Amalapo wala atthu oohikhala aYuda.

15. Exeeni yaamwiirihale Pedru omulopola Yesu, nto masu xeeni aalavunle awe?

¹⁵ Nto ohoolo waya Yesu aahooniherya wira ale yaavahiwe miritti sinceene yaarowa waakhula-tho vanceene, nto eyo ti etthu enooneya wa Pedru. (Luka 12:48) Yesu aahivikaniha wuupulula ikeekhai sootthuneya voohimya sa Mesiya, ohela muhina ohooxiwa wawe, ni okhwa wawe oYerusalemu, waarowa wiiraneya voohipisa. Pedru aahixankiheya nuumala wiiwa itthu iyo. Owo aahimwiitthana Yesu okhwipi khumulopola oriki: “Pwiya, Muluku ahitthuné eyo. Nnari! Etthu iyo ehokhumeleleni!”—Math. 16:21, 22.

16. Yesu aamukhalihenrye sai Pedru, nave miruku xeeni soovareleya muteko nimphwanya ahu wa masu a Yesu?

 ¹⁶ Veekeekhai muupuwelo wa Pedru waari wooloka, tivonto aatikhinne awe moota Yesu aamwaakhunle awe. Owo aahimurerya ettuli Pedru, onaaweha awiixutti akina, yaawo woonasa wene yuupuwelela etthu emosaru, nto khuhimya wira: “Satana wé! Khuma vamaithoni vaka! Weyo onokererya: khunupuwela itthu sa Muluku, onupuwela s’atthu pahi”. (Math. 16:23; Mar. 8:32, 33) Moolumo a Yesu annivareleya muteko wa hiyo. Maana hiyo apinaatamu onikhweela opacerya otthara muupuwelo wa atthu ohiya wa Muluku. Hata niphavelaka onvaha miruku mutthu, naahivahe ephoole pooti omwiiriha opaka etthu yaarowa omuhakalaliha Satana ohiya Muluku. Masi Pedru oonenle sai?

17. Yaataphulela exeeni masu a Yesu wa Pedru, oowi: “Khuma vamaithoni vaka”?

¹⁷ Masi Pedru aahisuwela wira masu aalavunle awe Yesu khiyaataphulela wira Pedru aari tthiri Satana Diabo. Okhala wira Yesu khaalavunle ntoko saalavunle awe ni Satana. Olavulaka ni Satana, Yesu aahimyale so: “Khuma va, Satana!”; masi wa Pedru aahimyale so: “Khuma vamaithoni vaka!” (Math. 4:10) Yesu khaamukhoottale murummwa ola, maana aahimoonana mikhalelo sooloka, masi aamukhaliherya mwaha wa muupuwelo woohiloka aarina awe. Ohiya Pedru okhala ntoko nluku nookwattuliha wa Yesu, owo aahaana omukhaliherya.

18. Pedru oonihenrye sai ororomeleya, nto nimutakiheke sai?

¹⁸ Niireke Pedru aahimusakaleela, anaakhulana ni Yesu, aahiiso onanariwa? Nnaari; moowiiyeviha owo aaheemya okhaliheriwa. Ela yaari-tho ekwaha ekina Pedru oonihenrye awe ororomeleya. Okathi mukina, atthareli otheene a Kristu, annitthuneya okhaliheriwaka. Akhala wira nnimweemya moowiiyeviha okhaliheriwa, nnoovikaniha omwaattamela Yesu Kristu ni Tiithi awe, Yehova Muluku.—Musome Miruku 4:13.

19. Exeeni Yesu yaalavunle awe, khino Pedru uupuwelani nuumala wiiwa masu awo?

¹⁹ Nuuvira mahiku vakhaani, Yesu aahilavula etthu yootikiniha, oriki: “Kinolèlani ekhweli wira: àkhala vava ahinrowa okhwa, ehimonne toko Mwana a Mutthu arwaka n’umwene awe”. (Math. 16:28) Voohaaniherya masu ala yaahimutikiniha vanceene Pedru. Nto Yesu aaphavela ohimya exeeni? Woonasa wene Pedru uupuwela  wira mwaha woopwapweliwa khulopoliwa ni Yesu, khaarowa-tho ovahiwa iparakha sa vameekhaaya.

20, 21. (a) Mutthokiherye ele Pedru oonale awe. (b) Ovaanela wa atthu ale waalokihenrye sai muupuwelo woohiloka wa Pedru?

²⁰ Masi nuuvira esumana, Yesu aahimukuxa Yakobo, Yohani, ni Pedru khurowa “vamwaako woorakama”, woonasa wene Mwaako Karmelo woorakamela ikiloomo 25. Pooti wira waari ohiyu okhala wira ooraaru aya yaahoosela. Masi okathi Yesu iira awe olompaka yaahikhala etthu yaamwarexale ikhove saya.—Math. 17:1; Luka 9:28, 29, 32.

²¹ Awosa yahoona wira erutthu ya Yesu yaahipacerya ovirikana. Owiitho wa Yesu waahipacerya waarya, mpakha okhala ntoko waarya wa nsuwa. Ikuwo sawe sahitteela ni waarya. Vano yaahikhumelela atthu anli yaari ni Yesu, mmosa aakhala ntoko Moise, mukina aalikana ni Eliya. Alopwana ala yaalavula sa okhwa wa Yesu, “warowa wiraneya oYerusalemu”, woonasa wene ni ohihimuxiwa wawe.  Vaahooneya oratteene wira Pedru aahivonya okathi aahimyale awe wira Yesu khaarowa ovira mohaawani!—Luka 9:30, 31.

22, 23. (a) Pedru oonihenrye sai okhala mutthu oohakalala ni a niphento? (b) Pedru, Yakobo, Yohani yaatthuveliwe sai ohiyu ole?

²² Pedru aaphavela-tho wiirela mpantta ovaanela wuulupale wiiraneya okathi ole, woonasa wene omananihaka wira ovaanela waya ohaakuvele omala. Vaakhala ntoko wira Moise ni Eliya yaaphavela okhuma opuro wavaanela aya ni Yesu. Tivonto Pedru aahimyale awe so: “Mwixuttihi, varerenle hiyo okhala vava. Nrowé nteké ihema ttharu: ekina yawinyu, ekina ya Moise, ekina-tho y’Eliya”. Masi, yowoonihiwa ele yaari-vo atthu a nthoonyeryo yaalikana ni arumeyi a Yehova yaakhwiiye khalaixa, khiyaavekela opaka iheema. Pedru aalavunle ohinatthi wuupuwela saana. Vano, niireke khamunoona oreera osuwela sa mulopwana ola oohakalala ni oophenta?—Luka 9:33.

²³ Pedru, Yakobo, ni Yohani yaahitthuveliwa ohiyu ole. Neeku nimosa naahikhumelela, khwaakhuneela vamwaako vale. Vano nahiiwanyeya nsu, niire so, nsu na Yehova Muluku! Niiraka: “Ola mwan’aka omuthanlalyaka: mmwiweleleke yola”. Nto sowoonihiwa saahimala, khuhala vamwaako vale Yesu ni awiixutti ale.—Luka 9:34-36.

24. (a) Waarya wa Yesu, waamukhalihenrya aya sai Pedru? (b) Ninrowa oottottela sai mureerelo waarya wa Yesu?

²⁴ Tthiri waarya wa Yesu waari wa vameekhaaya wa Pedru, ni wa hiyo! Nuuvira iyaakha sinceene Pedru aahilepa sa eparakha ele yaarina awe ohiyu ole, woovuwihiwa Yesu ntoko Mwene a wiirimu, ni aari mmosa wa ale ‘yònale ni maitho aya ovuwa wawe wulupalexa’. Yowiiraneya ele yaakhulela iprofesia sinceene sa Nuulumo na Muluku, nave yaahilipiha waamini wa Pedru weiwo waarowa omukhaliherya owanana mixankiho. (Mmusome 2 Pedru 1:16-19.) Yowiiraneya eyo, pooti-tho olipiha waamini wahu ntoko Pedru, navikaniha omuroromela Pwiyahu othanliwe ni Yehova mmureerelo ahu, niixuttaka etthu sa yena, ni weemererya okhaliheriwa ni ovahiwa miruku nuuwo, ni omutthara mowiiyeviha nihiku ti nihiku.