1, 2. Etthu xeeni yoovara murima yaamwiiranenle Eliya?

ELIYA aamutthimaka veepulani vahalaka wiila. Aahaana weetta mukwaha woorakama orowaka wIzireyeli, masi khahiyo-tho aari mmiravo. Hata vari siiso, aanitthimaka voohiphumurya okhala wira ‘owerya wa Yehova’ waahimurweela. Ikuru saarina awe saari sinceene, ni khaatonko okhalana ikuru siisaale. Maana aahiwerya ovikana ekaaro ya ikhavalo aawenle awe Mwene Akhabi!—Mmusome 1 Mamwene 18:46.

² Vano aari ekhawe yena ni ephiro yaatthara awe oriki otthimaka. Nto nkahaya muupuwele Eliya oriki otthimaka epula erupaka yinceene emanaka owiitho wawe, uupuwelelaka etthu yiiraneyale yootepexa oreera wa yena. Tthiri waari oxintta woovuwa wa Yehova, Muluku a Eliya, ni wa okokhorela wekeekhai. Vano mwaako muulupale Karmelo khonooneya-tho, maana variipa mwaha wa epula enirupa, masi waari mwaako yoole Yehova aamurumale awe Eliya ovara itthu sa miiriirya ooniheryaka owerya wowaaxintta ale yamukokhorela Bayali. Maprofeta manceene a Bayali yaahooneya okhala oowootha, nto khuphwanelaka wiiviwa. Eliya aahipaka nivekelo ovekaka wa Yehova wira emala-male elimwe yahaareere okumiherya oxanka valaponi muhina mwa iyaakha tthaaru nnimeya. Nto epula yaahirupa!—1 Mam. 18:18-45.

3, 4. (a) Okathi aatthimaka awe orowaka wIziriyeli, xeeni Eliya oona awe wira vano itthu saarowa weettaka saana? (b) Makoho xeeni anrowa ahu othokorerya?

³ Okathi Eliya aatthimaka awe ikiloomo 30 mpakha wIziriyeli woonasa wene uupuwela wira vano itthu saarowa weettaka saana. Khino yena uupuwela wira ole waari okathi wooturuka itthu sahaalokale. Akhabi aahaana orukunuxa makhalelo awe! Nuumala oweha ele yiiraneyale aahaana ohiya omukokhorela Bayali, waaleela amwaarawe Yezabeli wira arukunuxe murima aya, ni ohiya waalupattha arumeyi a Yehova.

⁴ Okathi itthu sineetta aya saana, nto murima ahu onniwehererya itthu sikina sooreera. Hiyo pooti wuupuwelaka wira vano makhalelo ahu anrowa okhala ooreera ovikana khalai, ni wira mixankiho saawanana ahu soomala-mala khuluwi. Okhala wira Eliya aari mutthu “ntoko hiyo”, woonasa wene owo uupuwela siiso. (Yak. 5:17) Masi, mixankiho sa Eliya khisaamanle okathi ene yoole. Tthiri nuuvira iwoora vakhaani paahi owo aarowa okhala oowoova, ookhulumuwa, mpakha ophavela okhwa. Mwaha wa xeeni? Yehova aamukhalihenrye sai profeta awe wira ovikanihe waamini ni olipa murima? Nrowe noone.

5. Nuumala woona itthu saakhumelenle Omwaako Karmelo, niireke Akhabi aahiixutta omoova Yehova, nto exeeni enniiriha ohimyaka siiso?

⁵ Okathi mwene Akhabi aaphiyale awe vapuwani vawe wIzireyeli, niireke aahirukunuxa murima awe wootakhala? Biibiliya onihimya so: “Akhabi ahimwalikelela Yezabeli sothene sìralyawe Eliya, awivaka maprofeta othene”. (1 Mam. 19:1) Moone wira Akhabi khaaromonle nsina na Muluku a Eliya, Yehova. Mwaha woohimoova Muluku, Akhabi oona wira miiriirya iye saapakiwe ni pinaatamu, nto khuhimya wira “Eliya topanke”. Tthiri Akhabi khaaxuttale omoova Yehova Muluku. Ankhi amwaarawe ootakhala murima, yoonela sai miiriirya iye?

6. Muhupi xeeni Yezabeli aamuroihenle awe Eliya, ni waataphulela exeeni?

⁶ Yezabeli aahisareya owali! Olavulaka moowali, owo aamuhimenrye so Eliya: “Amuluku ekitakhalihe ekìrihaka sotakhala sothene, miyo kahiwìriheni-ru nyuwo melo okathi ene yola, siwìrihalyanyu maprofet’awo”. (1 Mam. 19:2) Ela yaari enamuna yootakhalexa murima yaawerya omwiiva mutthu. Tthiri, Yezabeli aaphavela ohimya wira owo aamwiixiiva, akhala wira khaarowa omwiiva Eliya mmeeloni mwaya, owunlelaka ikuhu maprofeta a Bayali yaivakasiwe. Vano nkahaya muupuwele etthu eniireya ohiyu ole waarupa epula, vootutuxerya Eliya onnivenxiwa vaarupa awe opuro waamakale awe wIzireyeli, wira oleeliwe mitthaka sa pwiyamwene ootakhala murima. Eliya oonenle sai?

7. Eliya oonenle sai moolumo oowoopiha a Yezabeli, nto aapanke exeeni?

⁷ Akhala wira Eliya uupuwela wira ekhotto yaawana awe ni atthu a muluku Bayali yaahimala, nto okathi owo Eliya aahoona wira eyo yaari ethiru. Yezabeli khaaturunke murima awe, nnaamwi saakhumelenle itthu iye sotheene. Yezabeli aahiruma wiiviwa maprofeta anceene oororomeleya ntoko yena, nto vano, vaakhala ntoko wira Eliya aarowa wiiviwa. Nto Eliya oonela sai olaphela wa Yezabeli? Biibiliya onihimya wira: “Eliya ahòva”. Niireke Eliya uupuwela moota saarowa awe wiiviwa ni Yezabeli? Akhala wira ti etthu yuupuwela awe, eyo yaahimwiiriha opweteiwa olipa wawe murima. Hata nihisuwelaka etthu yuupuwela awe, etthu yiiraneyale tiila: Eliya “ahivenya vo, wira òpole ekumi awe”, niire so, aahitthyawa.—1 Mam. 18:4; 19:3.

8. (a) Moota xeeni muxankiho wa Pedru oryaaya woolikana ni muxankiho wa Eliya? (b) Ntakiheryo na Eliya ni Pedru ninniixuttiha exeeni?

⁸ Eliya khahiyo tori oopacerya wala ookiserya wa arumeyi a Yehova yaatonko oxinttiwa ni woova. Ohoolo waya, murummwa Pedru waahimukhumelela muxankiho mmosaru. Mwa ntakiheryo, okathi Yesu aamulenle awe Pedru wira eetteke vasulu va maasi omutakihaka Yesu, murummwa ole aahipacerya weetta “ònaka epheyo yatepa wopa”. Nto owo aahoona khupacerya omiryeya. (Mmusome Matheyo 14:30.)  Matakiheryo a Eliya ni Pedru anniniixuttiha etthu emosa yuulupale. Akhala wira hiyo nimphavela ovikaniha okhala oolipa murima, nto niheemye wira muupuwelo ahu otepeke wuupuwela itthu sowoopiha. Hiyo nihaana ovikaniha omuupuwelela ole okhanle mathipelo a nlipelelo ni ikuru sahu.

9. Muhimye moonelo ni weetta wa Eliya otthyawaka wiiviwa ni Yezabeli.

⁹ Mwaha wa woova, Eliya aahitthyawa orowaka mpantta onikela nsuwa, mukwaha wa ikiloomo 150 mpakha ophiya oBerixeba, waattamela oYuda. Nto opuro ole owo aahimuhiya namakhaliherya awe, khurowa ekhawe otakhwani. Biibiliya onihimya wira owo ‘ahetta nihiku nlo mpakha wila’. Vano nkahaya muupuwele, woonasa wene Eliya aavenyale oxaaka ohikunxe etthu yoolya hata mireerelo sikina! Oriipiwe ene murima, woova wawe waahimwiiriha orowa otakhwani, oviraka moothakoni mooviha ni moohaatta miri. Nto okathi nsuwa nenno naakhala ntoko etthu yooxeerya naakhuruwela aya ottaiwene, ikuru sa Eliya saanimala. Mwaha wookhulumuwa, owo aahikilaathi vathi va mwiri, yoowo waari ntoko opuro wootthyawela, muttetthe ole ohinikhala miri sinceene.—1 Mam. 19:4.

10, 11. (a) Yaataphulela exeeni masu a nivekelo na Eliya wa Yehova? (b) Murumeelaka soolepa siromoliwe ettima ela, muhimye moota atthu akina yaamoova Muluku saariipiwe aya murima.

¹⁰ Eliya aahipaka nivekelo nooniherya wira khaarina-tho nlipelelo. Owo aavekale wira okhwe. Aahimyale so: “Miyo nkinavikana alipa-akiyanre”. Eliya aanisuwela wira amuhavinre awe yaahipakeya ntthupi ni makhuva paahi omahiye, khiyaawerya-tho opaka etthu wira amukhaliherye mutthu mukumi. (Mus. 9:10) Eliya oona wira khaarina-tho efaita. Tivonto vahinitikhina ahu wira aahilavula masu ala: “Okumi wokimalela. Kuxani eroho aka!”

¹¹ Niireke eyo ehaana onuukhula osuwela wira mutthu a Muluku aahitoko oriipiwa murima vanceene? Nnaari. Atthu anceene oororomeleya aniromoliwa mBiibiliyani, alopwana ni athiyana anihimmwa wira yaatoko ooriipiwa murima mpakha ophavela okhwa; atthu ntoko Rebeka, Yakobe, Moise vamosa ni Yobi.—Maph. 25:22; 37:35; Moth. 11:13-15; Yobi 14:13.

12. Akhala wira nyuwo munniriipiwa murima vanceene, munrowa omutakiha sai Eliya?

¹² Olelo-va, hiyo ninkhala “mahiku òxanka”, tivo vahinitikhina ahu owoona atthu, hata ale ari oowaamini akhalaka ooriipiwa murima. (2 Tim. 3:1) Akhala wira sinnookhumelelani itthu sooriipiha murima,  mutthare ntakiheryo na Eliya, niire so, munvekele Yehova vooluttuweliwa mmuleelaka etthu eniwiirani. Nto Yehova Muluku, ‘onimohakalalihani’. (Mmusome 2 aKorinto 1:3, 4.) Nto niireke Yehova aahimukhaliherya Eliya?

13, 14. (a) Yehova oonihenrye sai omphenta wawe Eliya yoowo aari ooxanka? (b) Xeeni varyaaya voohakalaliha osuwela wira Yehova onnimusuwela khula mutthu ohela mpuwa itthu sinimuxankiha?

¹³ Yehova oonenle sai okathi aaweha awe vathi oryeene wiirimu nto khumoona profeta awe oophentiwa, ammaathale ene mmukhitte mwa mwiri moothakoni ovekelaka wira okhwe? Biibiliya onnihimya etthu yiiraneyale. Okathi Eliya aarupa awe, Yehova aahiruma nlaikha nawe. Vooreera murima nlaikha nle nahimukhwannya Eliya ni khuhimya so: “Nkavenyani: mulyeke”. Eliya aahiira siiso, nto aahoona nlaikha nle niruuhale ene ephau yooviha ni maasi. Niireke Eliya aahixukhurela nlaikha nle? Biibiliya onihimya wira profeta ole aahilya ni owurya nuumala aahimpaathi-tho khiyarupa. Niireke aarootepa oriipiwa murima vahaawerya awe olavula? Etthu enisuwela ahu tiila: nlaikha nle naahitthikela onvenxa ekwaha ya nenli, woonasa wene makaaripi. Nlaikha naahitthikela omutumererya Eliya wira; “Nkavenyani: mulyeke”, nave-tho mukwaha ola naahihimya-tho moolumo makina niriki: “muhojeyé ekwaha enohalelani”.—1 Mam. 19:5-7.

¹⁴ Nlaikha nle naahisuwela opuro waarowa awe Eliya, okhala wira naahilakiheriwa ni Muluku. Nlaikha naahisuwela-tho wira mukwaha ole waari woorakama nto Eliya khaawerya opaka eyo ohikhaliheriwe. Tthiri etthu yoohakalaliha onvarela muteko Muluku onisuwela soolukama sahu ni itthu sinnixankiha! (Musome Esalimo 103:13, 14.) Vano, yoolya ele yaamukhalihenrye sai Eliya?

15, 16. (a) Yoolya yaakhumme wa Yehova yaamukhalihenrye sai Eliya? (b) Xeeni hiyo vanitthuneya ahu ovaha efaita enamuna Yehova ennikhaliherya awe olelo-va?

¹⁵ Hiyo ninsoma so: “Eliya ahivenya, ahilya, khuwurya. Alipihiwene ni yolya yeyo, ahetta mahiku miloko mixexé, othana n’uhiyu, mpakha ophiya oHorebi (Sinayi), ori mwako wa Muluku”. (1 Mam. 19:8) Voolikana ni Moise yoowo aakhanle iseekulu 6 khalai, ni Yesu yoowo aarowa okhala iseekulu 10 ohoolo waya, Eliya aahitthukwa mahiku 40 othana ni ohiyu. (Okhum. 34:28; Luka 4:1, 2) Yoolya ele vakhaani khiyaamalihale mixankiho sotheene saarina awe, masi mwa mwiiriirya yaahimphwanyiha ikuru. Vano nkahaya muupuwele ela: Eliya mulopwana oowunnuwela oneetta moothakoni woovila weetta, masi yena onneetta khuyavira mahiku, isumana mpakha mahiku 40!

¹⁶ Olelo-va Yehova onnaakhaliherya arumeyi awe, masi khonipaka miiriirya ntoko okumiherya yoolya, masi onnaakhaliherya mwa enamuna ekina enivikana yoolya. Owo onnaakhapelela mwa omunepani arumeyi awe otheene. (Math. 4:4) Omusoma Biibiliya ni iliivuru sikina  onoowerya onilipiha omunepani. Ekeekhai wira opaka eyo khonimaliha mixankiho sahu sotheene, masi onoowerya onikhaliherya ovilela khula etthu ennikhumelela. Ohiya-vo, onrowa oniphwanyiha-tho “ekumi yohimala”.—Yoh. 17:3.

17. Eliya eettale mpakha woowi, nto xeeni opuro ole waryaaya wootepexa otthuneya?

¹⁷ Eliya aaheetta ikiloomo sinaattamela 320, mpakha ophiya oMwaako Horebi. Nipuro nle naari nootthuneya vanceene, okhala wira Yehova aahikhumelela nipuro nle orumaka nlaikha nawe wa Moise; okathi aakhumelenle awe mwiri waavarela; ohoolo waya Yehova aahikumiherya-tho Nlamulo na wataana ni aIsarayeli. Nto Eliya khukela munikhukuni.

18, 19. (a) Nikoho xeeni naapakiwe ni nlaikha na Yehova nto Eliya aakhunle sai? (b) Mathowa xeeni mararu yaamwiirinhe Eliya oriipiwa murima?

¹⁸ Nuuphiya oHorebi, “masu” Yehova; woonasa wene yaalavuliwe ni nlaikha, yaahipaka nikoho nla: “Eliya nyu, munìra-ni vo”? Woonasa wene nikoho nle naapakiwe mwa enamuna yoopatthaneya, nto Eliya khoona wira aahaana ohimya etthu yaamwiira. Nto owo aahihimya tthiri! Owo aakhunle so: “Apwiya Muluku òwerya sothene: wophentani waka wokiwereiha murima, okhala wira atthu a Israyeli yahihonona watàna wanyu, yahapwanyula altari anyu, yahiwivakasa maprofet’anyu n’ikatana. Miyo kihanle mekhaka: vano awo anniphavela okìva”. (1 Mam. 19:9, 10) Moolumo a Eliya yaahooniherya mathowa mararu yaamwiiriha ooriipiwa murima.

¹⁹ Noopacerya, Eliya oona wira muteko aavanre awe waari wa ethiru. Nnaamwi owo aavirinhe iyaakha sinceene ‘murima onwereyaka’, omurumeelaka Yehova, ovahaka efaita otthuneya waya okokhoreliwa Yehova, nto Eliya oona wira khuuvo mureerelo waakhumelenle ni wira mixankiho sawe saamutepa paahi. Atthu ale otheene yaahivikaniha ohimwaamini ni ommwareela Muluku, okokhorela weethiru waamutepa wuulaana valaponi. Nanenli, Eliya oona wira aari mekhawe. Owo aalavunle so: “Miyo kihanle mekhaka”, nto vaakhala ntoko wira mwa nloko nle notheene, Eliya paahi taamurumeela Yehova. Naneeraru, Eliya aamoova. Maprofeta makhwaawe anceene, yaahiiviwa nto owo uupuwela wira aarowa wiiviwa. Tthiri khahiyo wira varokhweya ohimya etthu yaamwiira, masi kheemyale wira wiixinnuuha wala wuuliwa muru, omooceelihe omuleela Yehova ele yaari vamurimani vawe. Mwaha womutthukulela murima awe munivekeloni, Eliya oovaha ntakiheryo nooloka wa atthu otheene oororomeleya.—Esal. 62:9.

20, 21. (a) Mutthokiherye ele Eliya yaawehale awe oryeene vamukhora wa nikhuku Omwaako Horebi. (b) Ikuru sooniheriwe ni Yehova samwiixuttihale exeeni Eliya?

²⁰ Yehova oonenle sai woova ni oxankiheya wa Eliya? Nlaikha naahimuruma Eliya weemela vamukhora wa nikhuku. Owo aahiiwelela  nnaamwi ahaasuwela yaarowa awe wiirihiwa. Yaahoopa epheyo yuulupale! Woonasa wene, etthu ele yaahikumiherya onyakula wuulupale, mpakha Eliya ohiwerya wiiwa etthu, maana onyakula waya waahikhalana ikuru saawerya opwexakasa mwaako. Vano nkahaya muupuwele, Eliya ottiyelelaka maitho awe, ni ovarelela ikuwo sawe wira sihivavihiwe ni epheyo yuulupale. Okathi omosaru aahaana wiilipiha nipuro neemenle awe, okhala wira etthaya yaahipacerya otetereya, maana yaari etetere! Nlelo ohinatthi olipa, waahikhumelela mooro ohoolo wawe, nto eyo yaahimwiiriha otthikela okhukuni wira ohivye mwaha wooviha wa mooro.—1 Mam. 19:11, 12.

²¹ Wa khula etthu yiiraneya, ninnileeliwa wira Yehova khaakhanle mpuwa wa etthu eyo yiiraneya mwa mwiiriirya. Eliya aanisuwela wira Yehova khahiyo aari muluku eethiru ntoko Bayali, yoowo aavuwihiwa ni atthu oowokiwa yuupuwela wira owo aari muluku aakumiherya meeku eepula wala aakumiherya soolya. Yehova tokhanle mwaneene ikuru sotheene sookuxa murima sikhanle olumwenku ola, nto munnuwelo awe onnivikana etthu ti etthu epattunxe awe. Hata erimu yotheene kheniphiyerya okhala Yehova! (1 Mam. 8:27) Nto itthu iya sotheene saamukhalihenrye sai Eliya? Kiira munnuupuwela woova wa Eliya? Okhaliheriwaka ni Muluku oowerya, Yehova, yoowo oonihenrye wira awanani awe otheene kharina owerya, Eliya khaakhanle oowoova atthu ntoko Akhabi ni Yezabeli!—Musome Esalimo 118:6.

22. (a) “Nsu” naalavula voohituperya ni voohirunya naamukhalihenrye sai Eliya woona wira aahikhalana efaita? (b) Woonasa wene ‘nsu’ nle naakhumale woowi? (Nwehe enoota.)

²² Nuumala ovira mooro ole, opuro ole wahimaaleleya nto Eliya aahiiwa “nsu” naalavula voohituperya ni voohirunya. Nsu nno naahinvekela ekwaha ya nenli Eliya wira ohimye etthu yaari vamurimani vawe. * Woonasa wene eyo yahimmaaliha Eliya. Ohiya-vo, Eliya aahiphwanya nimaaliho nikina okathi aiwale awe “nsu” naalavula voohituperya ni voohirunya. Yehova aahimulipiha Eliya omuleelaka wira owo aari mutthu a efaita yuulupale. Moota xeeni? Muluku aahimooniherya ele yaarowa awe opaka ohoolo wira omalamalihe okokhoreliwa Bayali elapo ya wIsarayeli. Nto eyo yaahimwiiriha Eliya woona wira muteko awe khiwaahiyo wa mahala, okhala wira yoolakela  ya Yehova yaarowa wiiraneya tthiri. Ohiya-vo, Eliya aahoona wira nlelo Yehova aarowa ovikaniha omuruma, maana aahitthikela omuruma onvahaka malakiheryo oowiiweya saana.—1 Mam. 19:12-17.

23. Mwa inamuna xeeni piili Yehova aakhapelenle awe mixankiho sa Eliya?

²³ Nto nihimye exeeni sa moonelo wa Eliya oowi aari ekhawe? Yehova aahipaka itthu piili wira omalihe muxankiho owo. Yoopacerya, owo aahimuruma omuthanla Eliseyo wira okhale profeta aarowa omuranttela. Mwa iyaakha sinceene mmiravo ole aarowa okhala namakhaliherya ni mwaapara awe Eliya. Tthiri ele yaari yoomaaliha yuulupale! Yanenli, Yehova aahimuleela ihapari sookuxa murima oriki: “Nto miyo kinowopola atthu vakhani a Isarayeli: alopwana ikonto thanu na pili, yawo ehinakokhore oholo wa Bayali, nnákhala ehinamurumele”. (1 Mam. 19:18) Aayo, Eliya khaakhanle ekhawe. Tthiri owo aahihakalala osuwela wira yaahikhala atthu ikonto sinceene oororomeleya yaakhoottale omukokhorela Bayali. Vano Eliya aahaana orowa olipiha waamini waya, ovahaka ntakiheryo nooloka na omuroromela Yehova voohittikinyeya, okathi ole woolupatthiwa. Tthiri Eliya aahilipa vanceene nuumala wiiwa masu ale a Yehova yaalavuliwa ni nlaikha nawe, niire so, “nsu” naalavula voohituperya ni voohirunya.

24, 25. (a) Vaniweryaneya sai hiyo owiriyana “nsu” na Yehova ninlavula voohituperya ni voohirunya olelo-va? (b) Ninsuwela sai wira Eliya aaheemya omaalihiwa ni Yehova?

²⁴ Ntoko Eliya, ti vookhalela hiyo otikinihiwa ni ikuru wala itthu suulupale sipattuxiwe ni Yehova. Itthu iyo sotheene sinooniherya owerya orina awe Mpattuxa. (aRom. 1:20) Yehova nlelo onnisiveliwa orumeela ikuru sawe wira aakhaliherye arumeyi awe otheene oowaamini. (2 Wah. 16:9) Masi, olelo-va Muluku onnilavula ni hiyo orumeelaka ipaaxina sa Nuulumo nawe, Biibiliya. (Mmusome Yesaya 30:21.) Mwa enamuna eyo, Biibiliya onoolikana ni “nsu” naalavula voohituperya ni voohirunya akhala wira nnimwiiwelela. Orweela mwa Biibiliya, Yehova onninlakiherya, onilipiha, ni onooniherya wira nlelo onniniphenta.

²⁵ Niireke Eliya aaheemya nikhaliheryo naavahiwe awe ni Yehova Omwaako Horebi? Aayo owo aaheemererya! Voohipisa owo aahitthikela ovara miteko sawe moolipa murima, khukhala profeta yoowo aakiherya okokhorela wekeekhai. Akhala wira hiyo nnoovarexexa ni murima ahu wotheene ‘nikhaliheryo na solempwa sa Muluku’, eyo enoonikhaliherya otakiha waamini wa Eliya.—aRom. 15:4.