Esinagoga ya oKafarnawu, Yesu aahiixuttiha voohimya sa ephaawu ekhumme wiirimu. Woonasa wene, aatthikenle olavula masu yaale aalenle awe atthu yaatthikale mpantta onikhuma nsuwa wa Ephareya ya oGalileya. Awo yaari atthu yaale yaakhuurale ihopa ni iphaawu Yesu aakumihenrye awe mwa mwiiriirya.

Yesu aahivikaniha olavula mwaha awe oriki: “Axitith’inyu yahilya emaná mothakoni, numalá khukhwasa”. Moovirikana ni eyo, Yesu aahimmye so: “Miyo ka ephau ekumi, yeyo ekhurunwe wirimu: mutthu oni akhure ephau ila onokhala vohimala-tho. Vano ephau enrowaka ovaha t’irutthu aka, yeyo entthunaka ovahererya wira atthu othene ephwanye ekumi”.​—Yohani 6:48-51.

Elimwe ya 30 EC, Yesu aahimuleela Nikodemo wira Muluku oophentexa olumwenku khunvaha Mwanawe ntoko Moopoli. Vano Yesu aattittimiherya otthuneya waya okhuura erutthu awe, eyo piiyo, waamini mukuttho wowoopola aarowa awe ovaha. Eyo ti ephiro wira mutthu ophwanye okumi woohimala.

Masi, atthu ale khiyeemerenrye masu a Yesu. Nto yaanikohana wira: “Onwerya sai ula onivaha erutthu awe wira nikhureke?” (Yohani 6:52) Yesu aaphavela wira asuweleke wira masu awe yaari a nlikanyiho. Etthu aalavunle awe ennooniherya etthu aaphavela awe ohimya.

Yesu aahimmye wira: “Kinolèlani ekhweli wira: mwahikhurekeru erutthu ya Mwana a mutthu, mwahiwuryekeru ephome awe, khamunkhalana ekumi mwa nyuwo. Ole onkhura erutthu aka ni onwurya ephome aka, òkhalana ekumi yohimala: . . . Tthiri, erutthu aka ti yolya y’ekekhai, ephome aka ti yowurya y’ekekhai. Ole onkhura erutthu aka ni onwurya ephome aka, onnikhala mwa miyo”.​—Yohani 6:53-56.

Mwekeekhai, pooti wira moolumo ala a Yesu yaahaakhumuliha aYuda yanwiriyana! Woonasa wene, atthu ale yuupuwela wira Yesu aatumererya waakhuura atthu aahiiso opaka etthu yaahonona nlamulo na Muluku naakhoottiha olya ephome. (Maphattuwelo 9:4; Onamukuttho 17:10, 11) Masi, khahiyo wira Yesu aahimya okhuura erutthu awe ni owurya ephome awe. Owo aaphavela ohimya wira atthu ale yaaphavela okumi woohimala, yaahaana waamini mukuttho wowoopola, eyo piiyo, erutthu awe yoomalela ni ephome awe yaarowa oyiihiwa. Nave awiixutti awe anceene khayiiwexenxe mwiixuttiho awe. Tivonto akina yaahimmye wira: “Molumo ala àtepa orika. T’ani onwerya okupali?”​—Yohani 6:60.

Okhala wira Yesu aahoona wira awiixutti awe akina yaanimwaapa, owo aahaakoha wira: “Molumo aka annokwattulihani? Mankhi, mwamona Mwana a mutthu awelaka wirimu, weiwo waryawe khalai? . . . Vano molumo kohimenryakani t’iroho ni ti ekumi. Nto, variyari vanyu àkhala-vo akina ahinamini”. Mwaha wa yeeyo, awiixutti awe anceene yaahihiya omutthara.​—Yohani 6:61-64.

Olavulaka ni arummwa awe 12, Yesu aahaakoha wira: “Khino nyuwo-tho munnitthuna orowa?” Pedru aahimwaakhula wira: “Pwiya, nintthuna omutthara pani? Murina molumo anvaha ekumi yohimala, ti nyuwo. Vano hiyo nihamini, nosuwela wira nyuwo mwá Kristu, orummwe ni Muluku”. (Yohani 6:67-69) Tthiri nnaamwi Pedru ni arummwa akina yahiiwexenxe saana mwaha ole, awo yaahivikaniha ororomeleya!

Yesu aahisiveliwa ni waakhula wa Pedru, khuhimya so: “Nkihiyó miyo kothanlaleni nyuwo, mulokó nanli [12]? Vano mmosá a nyuwo sataná!” (Yohani 6:70) Yesu aamuhimya Yuda Isikaryoti. Pooti wira Yesu aahilavula eyo okathi ole, okhala wira Yuda aahipacerya okhalana soophavela soohiloka.

Tthiri Yesu aahihakalala osuwela wira Pedru ni arummwa akina khiyaahiyale omutthara. Nave khiyaahiyale olaleya muhupi onoopola ikumi, muteko yoowo Yesu aavara awe.